RP Act, 1951 Section A

Kan tunlai boruakah Pu Lalduh­oma hektu MLA 12 te chuan, Pu Lalduhoma an hek chhan chu amah an huat vang bik pawh ni loin, dan an ngaih pawimawh vâng a nih thu Zoram mipuite hnenah an pho chhuak a. Hetianga dan ngai pawimawh kan MLA zingah an han pung thar hluai hi a lawmawm tih zawnga kan thlir thiam mai a ṭha awm e. 

India ram dan hi tute emaw chungah chauh lekkawh tura siam a ni lo a, kan zavaia kan zawk tur atana siam niin, dan hmaah chuan intluk tlang vek kan ni. Chutih rual erawh chuan dan chungah erawh khawngaihna a awm a, khawngaihna chu zavaia chunga ken kawh a nih loh chuan, dik taka rualkhai taka  lek kawh tur a ni thung ang10th schedule Para 2(2) mai ni loin, RP Act 1951 Section A te pawh hi zawm ngei tur a ni. 

Chutih rual erawh chuan, chu dan zawm lo leh palzuta MLA tling ta hi tuna kan MLA zingah ringawt pawh hian mi eng emaw zat an awm a , ruling MLA te zingah hian he dan palzuta MLA hi mi 4 lai an awm a,  hetiangin:- 

Serlui bialtu Pu Lalrinsanga Ralte

Tuivawl bialtu 

Pu Lalchhandama  Ralte

Ṭawi bialtu Pu R Lalzirliana

South Tuipui bialtu 

Dr. R. Lalthangliana

A chhan chu Aizawl East 1 tih loh hi chu tribal list a chuang hnamte chauhin an chuh theih bial an ni. Chu dan lakah chuan tuna kan MLA zinga Ralte hnam (Ralte hnam ang zawnga inbeihna a ni lo, entirna mai a ni) mi te hi an tlin zawh loh avangin, heng MLA te hi ban a, an bial ruakah bye election buatsaih tur a ni ang. Tin, heng mite hian MLA nih chu sawi loh, Mizoram chhunga in leh lo leh ram an neih pawh hi phal sak an ni lo. 

Tuna Pu Lalduhoma hek duhna rilru ang hi opposition MLA te hian pu ve duh ta se inthlang ṭha reng rengin hun kan hmang zo thei mai dawn a, kan buai nuai nuai khawp ang. Tin, chutianga RP Act 1951 Section A dan palzuta MLA tling zingah pawh chuan Pu Lalduhoma hektu te ngei pawh hi  an tel ve a ni. 

Ram dan leh sakhaw dan te hi kher mei taka inkherna tur atana siam a ni lo a, kal sual tur leh mi dik lo venna tur a tana siam a ni zawk. Kher mei taka inkherna atana kan ram dan te hi kan hmang dawn a nih chuan inthlang ṭha reng rengin tuna MLA term kal laia kum kan ka neih te hi chu kan hmang zo thei hial dawn a ni. A ṭul loah sawrkar sum tam tak a luang ral ang a, tha leh zung tam tak a luang ral ang a, mipuite hun hlu tak khawhral tir an ni bawk ang.

Opposition awm ve lohna ram N.Korea dinhmun chu kan hria a. Sawrkar khalh ngiltu an awm loh avangin an ram dinhmun a chhia a, sawrkar ding lai chu a sapatal ringawt mai a ni. Sawrkar chak kan nei thei lo a nih pawhin opposition chak tak kan mamawh a, sawrkar an chak loh hlei hleiin opppsition chak kan mamawhna a lo lang zual zawk ṭhin. 

Assembly house-ah emaw a pawn lamah emaw pawh nise, lepse leh phawrh ruah vek ngam khawpin sawrkar dinglai chu a inring tawk tur a ni. Chutianga in phawrh hun a lo thlen pawhin, sawrkar chuan tlawmah la mai loin, a diklohna insiam ṭhat nan a hmang zawk tur a ni a, a lepsetu oppostion-te bei mai loin, phuba lak mai pawh tum hek loin, ram tan dik takin a thawk chhunzawm mai tur a ni. Dan hi phuba lakna tur atana siam a ni lo tih hi i hre reng ang u. 

Heng MNF MLA, Ralte hnam mi 4 te  hian RP Act 1951, Sec A bawhchhe mah se  MLA aṭanga paih­thlak kher an ngai lo a, dan palzut angin lang mah se dan chunga awm khawngaihna leh Mizo thinlung chhunga awm ṭhatna hmanga en rem leh mai tur a ni bawk. Chutiang chu tuna kan ruling MLA te rilru put dan hi ni ve se a lawmawm khawp ang. 

Hetianga kher mei leh verther taka inkherna hi vai pawhin an tih duh loh a ni.