A hêktu zawk an insawifiah hlauh!

Mizo upain, Pân lovah tho a fu lo, a tih leh, misual chu um lovin an tlanchhe ṭhin, an tih hi tun lai thil thlengah hian hriat chhuah a va han awl si em. 

ZPM-in inthlan hmaa, Chief Minister candidate chu Pu Lalduhawma a ni, tia an puan dum dum chunga Serchhip mipuiin duh taka Pu Lal Thanhawla (Congress) leh Pu Lalramzauva (MNF) aia an thlan tak chu, ZPM Office-ah a kal a, ZPM-ah mi a lawm lut. Dan a bawhchhia a, MLA aṭanga bantir tur a ni, tih vangin MNF MLA 12 te chuan bang turin Speaker-ah an hêk a. A hêktu lam hi an inthiam thei ngang lo a nih hmel a, anmahni an in sawi fiah daih nia mawle! 

Mizoram hi a la awm zel ang a, an sawi khawchhak ral lian leh thim thuah hnih hian min ṭingmit vek lo a nih phei chuan Mizoram history-ah, Pu Duhawma hêktu zingah khan a tel ve duh reng a ni, an tih zui vawng vawng palh a hlauhawm ta a ni. 

Tun ṭumah kher hi chuan mipa hi mipa angin awm se, mi puitling hi mi puitling angin awm se, lehkhathiam hi lehkhathiam angin awm se, rawngbawltu chu sawi kai lo phawt ang. Kan MLA te hian an chhia leh ṭha hriatna hmangin thil tih âwm lo hi chu hnial ngam se, 'Yes man,' tih hi chu a ṭha lo. 

Pu Duhawma hi bang âwma an ngai tak tak a nih loh chuan Party-a rel ngai lovin MLA chuan a hek thei reng a ni. Mahni aia upa, mahni aia politics lama senior, mahni aia MLA rei tawh zawk, ZPM Office-ah ZPM-ah mi a lawm lut, tih chhuanlama hêk hi chu Mizo leh Mizo inhekna atan chuan a mak a ni. 

Tin, an hêk tawh a nih chuan an hêk thu kal zel hi Mizoram Speaker in ngun taka lo zirin thutlukna lo siam mai se a ṭhat dawn nen, inthiam lo ru tak tih hriat ngawih ngawihin kan MLA 12 te chu an han insawifiah ta hlauh zawk a ni awm e! 

Pu Duhoma'n dan a bawhchhia a nih chuan Pu Duhawma kha insawifiah ta mai se, a hêktute awm a nuam ngang lova, an Mizo rilru leh an Kristian rilruin an han ngaihtuah a, ni thei ngangin an hre lo pawh a ni thei - Party hruaitu senior zawk aṭangin, Ekhai, mipuiin min dem lêt tlat mai va insawifiah law law mai teh u, an ti pawh a ni mai thei - an han in sawifiah ta chu a nia le! 

Mahni bial nei ṭheuh an ni a, thil ṭul bikah lo phei chuan inhmuh khawm a harsat ve nen kan MLA rual District hrang hranga awmte chu insawifiah turin an han kal khawm rap rap mai a. A thiam zawk tan insawifiah a ṭul ngai loh tehlul nen a hêktu zawk an in sawifiah hian ngaih chu a ti ṭha zan lo a ni. 

Engpawhnise, ZPM-in CM atana an zawrh, ZPM Manifesto, ZPM Flag leh ZPM Symbol hmanga campaign avanga MLA-a tling kha MNF a zawm vang ni lo, Congress a zawm daih vang pawh ni lo ZPM hminga a inlan ṭhin avanga bang tura hêk hi chu Mizo pa thil tihah chuan inhmeh lo tak a ni. 

Thil tiha mawi ni se MNF hian MLA 27 an nei a, a senior lamin an hêk tur a ni. A senior an ngawi hmiah mai a, MNF zingah pawh MLA vawi khat tlinnaah rau rau pawh Minister ni phak lo zawngin Pu Duhawma hi an hek - he thil hi ziaka chhin­chhiah a ni kumkhua tawh dawn si a aw...