Kan buaina traffic jam

Ni 17 March 2016 ah khan, “kan buaina traffic jam” tih thupui hmangin ka rawn ziah tawh a. Khatah khan kawng leh kawng inzawmna (junction) tam lutuk avangin intlan chhawk system hman a ngai vek mai hi kan buaina bul ber a ni tih te, Traffic jam chhan bulpui ber ‘kan kawng te siam danglam tumna lam aia mi eizawnna khawih chingpen sak leh ngam zawng zawng mawhchhiat ringawt hi a Kristian zia lo’ ti te in ka rawn ziak tawh a.

UD&PA Minister Pu Zodintluang’an kan khawpui Traffic jam nasa lutuk a veizia, khawpui chhung kawng siam danglam a tum chhoh dan aṭangin a rawn lantir bawk a, a fakawm hle.

Tun ṭumah hi chuan, kan Minister zahawm tak puihna ni pah fawmin kan buaina Traffic jam part-2 ang reng, kan buaina tih ziaawm theih dan tur, man tlawm tak ni bawk si chu a ṭhen azar han sawi leh dawn a ni.

Kan Aizawl khawpui hi mipui, lirthei, in leh lo pun chakzia kan hria a, hman aṭang tawhin kan system kan thlak bawk si lo. Kawngpui neih tlem naklaiin kan kawng neih ṭhenkhat phei chu dah pawimawh bik lai te kan nei a! (Entirnan: chhim lam aṭanga hmar lam pan tam tak chuan, Agriculture Office kawt kawng lama kal ai chuan, Treasury lama chhoh an duh zawk zel. A chhan chu kawng dah pawimawh bik kan neih vang a ni ) a pawi hle. Kan kawng te hi dah pawimawh thiam vek ila a ṭhat tehlul nen.

Engpawh nise, Tun ṭumah chuan Zodin Square aṭanga chhim lam chauh hi han thlurbing ang.

Zodin : Hetilai hmunah hian kawng pakhatah kal turin ṭhuang thum aṭanga a kal theih avangin jam a nasa ṭhin hle.

Treasury : Hetilai hmunah hian chhim lam aṭanga lo pheite tan Venghlui lama kual thlak phal sak an ni a, chu chuan jam a siam a, Aizawl S.P office te D.C Office leh Office dang aṭangin, chhim leh hmar hawi zawnga a kal theih avangin jam a siam bawk. Treasury office kawt Governor Gate bul Traffic point-ah pawh motor intlan chhawk tir a ngaih avangin jam a siam reng bawk.

Khatla : Hetilai hmunah hian, Khatla kawn aṭanga rawn phei chhim leh hmar lam pan tum te, hmar lam kawng aṭanga rawn phei Khatla kawn lama kal tum te, Sikulpuikawn lam aṭanga rawn chhuk, hmar lam pan te leh Khatla kawn lama kal tumte an han intawh khawm tak tak tawh chuan, kan traffic Police te lu pawh a hai ṭhin ngawt mai.

Sikulpuikawn : A bu pui emaw tih mai turin motor tam vanglai chuan kan phu mur mur a ni deuh ber e. Khatla lam kawng chung leh hnuai aṭanga chhim lam pan tumte bakah Republic Road lama kal tum te, Kulikawn lam a ṭanga hmar lam pan tum leh Republic kawng lama kal tum te, Republic kawng aṭanga chhim leh hmar pan tum kal hmasak vek duh ding khawm ṭhup mai, Traffic Police ten an han siam rem vel hmuh chuan, Traffic Police te hahzia hi a hriat hle ṭhin.

Two(2)way one(1)way a thlak : Zodin Square aṭanga chhim lam pan tumte tan kawng pakht chauh, Vanapa Hall kawt kawngpui phei hi Sikulpuikawn thlengin an kawng ni se la. Sikulpuikawn aṭanga Hmar lam pantute tan kawng chuan hnuai zawk Agriculture Office kawt kawng hi Zodin thlengin an kawng bik ni bawk se la. Tichuan, Two way chu One way-ah kan thlak tihna a ni dawn a, kan ziaawm viau chuan a rinawm.

1. Hmar lam aṭanga lo kal, Zodin-a kual tumte chu Zodin-ah kual tawh loin Treasury lamah an phei tlang ang a, Tennis Court-ah chhuk thlain, one way an zuk pawh ang a, Hmar lam an pan tawh mai ang. 2. Aizawl S.P office aṭang te, D.C office aṭang te leh office dang aṭanga hmar lam pan tumte pawh chutiang tho chuan an kal ang. 3. Vaivakawn aṭanga rawn chho, chhim lam pan tumte pawh Zodin-ah an han kual phawt ang a, chhim lam an pan ang. 4. Hmar lam aṭanga Khatla kawn lam kal tumte pawh, Tennis Court lama chhuk tawh lovin, Sikulpuikawnah kualin Khatla kawn an pan thung ang. 5. Khatla kawn aṭanga Sikulpuikawn pan tumte chu hmarlam hawiin an kal hmasa phawt ang a, Tennis Court-ah chhoin one way an han pawh ang a. Sikulpuikawn lam hawiin an phei tawh mai ang. 6. Chhim lam aṭanga lokal DC office leh a bul vela kal tumte chu kawng hnuai zawk Agriculture office kawt kawng zel one way-ah kalin Zodinah an kual tawh zawk ang. 7. Kulikawn aṭanga Republic kawng lama kal tumte pawhin Traffic Point an hel phawt ang a, kan buai zualpui chu a fel deuh kuar mai lo ang maw.

Khitiang khian rawtna ka han siam chhin a, a felfai zawk dan tur lam chu ka sawi vek seng lovang. Hetih lai hian a buaithlak zawnga lo la duh tan chuan a buaithlak a ni mai a, mahse, km. khat bawr vel lek chhunga kan buaina zualpui a reh theih dawn chuan mipuite hi kan inhuam thui ve deuh a ngai a ni. Motor nei/ kawl ve si a hma aia hla deuh hreta kal hreh leh a hnai zawk ringawt kan beisei fan a nih chuan, kan buaina hian zual lam a pan zel zawk ang.

Khitianga kan tiha kan system kan thlak hunah kan kawng neih chhun chhunte hi kan dah pawimawh vek tawh ang a, kan Traffic Police te pawh an hahdam phah sawt ang.

- Chhartea Lelhchhun