COVID-19 VANGA NUNNA CHÂN KAN LA AWM LO HI A VA LAWMAWM EM

Covid-19 hi mi hrisel pangngai tan chuan hritlang satliah ang deuh maia hlauhawm lo a ni tih hi kan hriat dan leh kan hmuh dan a ni a. Mahse, zunthlum, thawhah, TB, HIV, cancer, hepatitis natna veite, kal ṭha lo leh kal thlâk tawh te, kum upa tawh te leh naupang te tan erawh chuan a hlauhawm em em thung a ni.

Mizoram hi hetiang natna nei tam em emna a nih avangin kan inkaidarh a hlauhawm zual bîk a. Chuvangin mi dang zawngte aia fimkhur tur kan ni. Vanneihthlak takin hetianga kan inven theih nan kan sawrkar hian inkaihhruaina ṭha tak a duang chhuakin ṭha tak bawkin a kalpui a. A bîk takin kan Health Minister, Dr. Lalthangliana hian ṭan a la nasa a. TV-ah te leh hmun dang dangah fuihna thu a sawi fo va. Hetiang thute hi a sawi fo ṭhin a ni: 

1. Natna benvawn nei, ngaihtuahawm bik heng- diabetis, TB, HIV , cancer, hepatitis natna veite, Kal ṭha lo leh Kal thlak tawh te, kum upa tawh te leh naupang te hi vulnerable group an ni a. An chhungte pawhin an fimkhurpui a ngai hle a, heng mite hian an vei chuan thihpuina chance a sang hle a ni.

2. Ka sawi chamchî ṭhin a, ralmuang sual thei kan ni. COVID-19 hrileng lakah kan dinhmun a ziaawm chho deuh nia a lan rual hian kan inthlahdah phah ang tih a hlauhawm em em a. A tira he hri vanga tuar nasa, a bikin Europe-ah te pawh an dinhmun ziaawm an pan emaw an intih mek laiin tun hnaiah hri kai an pung thar leh ta hluai mai a ni.

3. Puipunna leh thil tihkhawmte pawh a ṭul tawpkhawkah lo chuan huaihawt lo ila, ṭhenawm khawveng inlenpawh pawh hi kan insum chhunzawm rih hram hram a ṭha.

 Kan doctor te, kan staff nurse te leh Health Department-a thawktu dangten inpumpêkna tak takin an thawk a. Khawi emaw laiah sawisel tur lo awm ve zeuh mah se, Local Task Force te pawhin hna an thawk ṭha em em a. Ramri-a duty te phei chuan tlaivar ṭhak khawpin lui dung an véng ṭhin a ni. 

 A tlangpui thuin mipuite pawh Sawrkar thu kan awih ṭha a. Biak in inkhawmte hial pawh kan la insûm thei hram zel a. Hei hi kan himna chhan ber chu a ni tih hria ila. Fimkhur tak leh thuawih takin i awm zel ang u. 

 Sawrkar kalphungah chuan ram pum huapa fak tlâka thil a awm chuan Chief Minister-in fak a hlawh a; thil duhawm lo a thlen chuan mawhphurtu a ni. Chutiang bawk chuan Department thiltiha fak tlâk a awm chuan Minister-in fak a hlawh a ni. He hripui kaia thih phah hlauhawmna, Zunthlum, Cancer, HIV, TB, Hepatitis, Kal thlâk, Thawhah te a nei nasa ber pawl kan nih lai a, hri kâi 2,000 chuang zet kan neih tawh pawha vanneihthlak taka nunna chân kan la awm lo hi, a vanneihthlakin a lawmawm tak zet a. 

 Hetianga kan awm theihnaa fak tlâk ber chu Health Minister Dr. Lalthangliana hi a ni a. Sawisel ngai chu huai taka sawisel a, fak tlâk chu lawm taka fak ṭhin ka nihnaah Dr Thangtea fakna thu hi ka han sawi ve a ni e.

Hetiang thute hi a chhan awm mang si lova, HAPPIEST STATE  nih ngawt ai chuan a chhuanawmin a lawmawm a ni.