Roreltute hi Pathian ruat an ni
‘Pathian thu lovin tu mah roreltu an awm si lo; roreltua awmte hi Pathian ruat an ni.’
- Rom 13:1
Roreltute hi Pathian ruat an ni ngei e, Bible-in a sawi miau alawm. Mahse, kan Pathian hian kan chunga roreltu tur leh min enkawl a, min thununa, min suasam tur hian mi fel tak leh ṭha tak, thil ṭha leh dik tak chauh duh mi leh ti ṭhin tur hi a ruat vek kher lo.
Keimahni rilru puthmang leh kan phak tawk te, kan thil tih duh ṭhinte hi Lalpan chiang takin a hria. Chumi avang chuan kan awm dan leh kan phu ang ngei roreltute hi min pe zawk ṭhin.
A hnam thlante chungah a lungawi lohvin, anmahni hrem leh zilhhau nan ringlomite a tichakin a tilian ṭhin a, hrehawm leh lungngaiin an rum fo. Anmahni hneh tur leh an chunga rorel tura a tihlente chu ama mite leh a lung tiawitute an ni ngai hek lo. Amah leh a mite hawtute leh dotute an ni zawk.
Chuvangin, kan chunga roreltu leh thuneitute chungah leh kan kalhmangah hian buai buai lo ila, hemi aṭang hian mahni lam inenfiah zawk ila. Engnge ka nih, engnge ka duh zawng, engnge ka tum ber leh ka duhthusam, eng rilru pu mi nge ka nih? Pathian malsawm tlak mihring leh, ka tana ṭha tur hlir leh nuam tur hlir ringawt ka chunga lo thleng tur hian Pathian lawm tlak ka ni em tih hi ngaihtuah ṭheuh ila.
Tichuan, Pathian lama sim ngai kan neih zawng zawngte kan sim hunah leh keimahni lam ṭheuh kan insiamṭhat hunah chuan Lalpan ama duhzawng ang rilru pu mi, kan tana ṭha tur chu roreltu min pe mai ang.
Mahni lam insiamṭhat leh intihdik kan tum si loh a, mi dik lo leh mi dik lo, mi sual leh mi sual, mi bawlhhlawh leh mi bawlhhlawh, Pathian thu awi lo leh Pathian thu awih lo hlir kan insawisel chhung chuan engmah a ṭha tak tak dawn lo.
Thil pakhat dik lo hailangin chingfel emaw inti mah ila, a dang, a aia tam a lo awm zel tho ang. Lalpan chiang takin min hmu a, kan phu ang tawk leh phak ang tawkin roreltute min ruatsak a ni. ‘Lalpa avang chuan mihring ruat apiangte hnenah intulut rawh u, chungnunga awm lalber hnenah emaw...’ I Petera 2:13
Mahni lam kan insiamṭhat hma chuan lungawi lohna khawvel hi kan tan a bang dawn lo. A lama rilru dik kan put hunah Lalpan a chakzia kan chungah a rawn tilang dawn nia. II Chronicles 16:9
‘A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia.’ Matthaia 6:33
- K. Hmingthankaia