LUIKAWR KHUH VAT A ṬUL E
Hman deuh khan Aizawl khawpui bakah kan tui tlan ber Tlawng lui leh Chite lui a lo thianghlimna'n, Aizawl khawpuia Luikawr zawng zawng hi Cement concrete leh Thirlen hmanga khuh vek ka rawt tawh a. Vawiinah hian kha ka rawtna pawimawhna chu kan CM hova luikawr thenfai hnatlang neih lo ṭul ta hian a tichiang hle mai. Lui chu a hnar a fim chuan a mawng lam thlengin a fim mai a ni, tih thudik chu Tlawng lui leh Chite luiah hian kan hmu mek a, a hnar ber kan Aizawl khawpui leh a chheh vel hi a lo fim lo em a nih hi. Aizawl veng tinah ni tin bawlhhlawh paih Motor a kal reng chungin luikawr bula awmte leh thuawih lo mi ṭhenkhatten luikawrah bawlhhlawh an la paih reng tho va, tun hi kan thleng ta a ni. Branded thawmhnaw changkang tak tak ha chungin lirthei changkang tak aṭangin kawngpui leh luikawrah bawlhhlawh kan han paih duh mai aṭang hian, kan rilru put hmang dik loh zia a lang ṭhin. 'An compound faina a nih chuan mi compound leh vantlang hmuna bawlhhlawh paih hnial lo hnam' min ti ta se, kan inhmeh viau awm asin! Ni tina bawlhhlawh phur motor-a paih duh lo, luikawr leh dai hnaia bawlhhlawh paih chingte hian dan an bawhchhiat mai piah lamah, an mihring puite tûrin an hrai mek tih lo inhria se la, lo sim vat tawh teh se.
LUIKAWR KHUH HI A HARSA LO:- Aizawl khawpui chhungah hian khawpui enkawltu AMC Ward 19 leh MLA bial 11 kan nei a, ruahmanna fel tak nen, chan insemin tih tak takin hma lak ni se chuan, Luikawrte hi khuh vek theih a ni ang. Thil engpawh hi tumna tak tak nena hmalak a nih chuan kawngro a su ṭhin a, thu mai hi chuan min tidam zo ṭhin lo a ni e. Ṭum khata khuh vek a harsat pawhin a tahtawlin hma lak ni se, ngaih pawimawhah neih a hun ta hle mai. Luikawr hi a theih zawng zawng Concrete-a khuh vek ni se, kalkawnga hman theih chin kan hmang ang a, Concrete-a khuh harsa chin zawng chu bawlhhlawh paih theih loh turin thirlen emawa ṭha taka khuh/zar vek ni bawk se la. Luikawr hnar lam aṭanga bawlhhlawh luhna tur zawng zawng hi ping vek bawk ila, luikawr a nih angin tui luanna'n chauh hmang ila, kan fai mai ang . Bawlhhlawh paihna hmun ni lova paih ṭhinte hremna dan hi strict taka kenkawh ni bawk se, siam ṭhat ngai a awm chuan tun aia khauh zawka dan siam ni bawk se. Smart City Project hnuaia pawisa tam tak kan hmuhte kha heti lam hawi atana hman ka lo awt ve ṭhin hle a, tunah chuan a project kha a tawp tawh si a ni awm e. Hma thar kan lak vat loh chuan kan bawlhhlawh thli tui hi kan in leh si a, hnam hrisel lo kan nihna chhante pawh hi a ni thei mai awm e.
Faina kawnga hma la pawl hrang hrang, Save Tlawng, Save Chite Lui tih leh pawl hrang hrang hi an awm nual tawh a. Kan sawrkar pawhin faina hapta hial 'Cleanliness Week' te siamin kum tin hma a la ṭhin bawk a. Kohhran leh khawtlang, zirna in leh sande sikul thlengin faina pawimawhna kan inzirtir hi a ṭha hle a ni. Hetih lai hian luikawr leh khawlaia bawlhhlawh paih ṭhinte hi naupang aiin puitling an tam zawk tlat niin a hriat a, a zia lo hle a ni. Khaw pawn leh kan tui tlan mek hnara bawlhhlawh paih ṭhinte phei chu puitling deuh vek an niin a lang a, zirtirtu tur zawk kha zirtir an ngai tihna a nih chu. Ṭhal ruah a lo sur a, kan bawlhhlawh paih ruk kawngpuia a rawn len chhuakte hi a zahthlak em em a ni, i sim hram tawh teh ang u.
SAVE THE RIPARIAN AN CHE E - Keini ang chuan an pawl hming pawh kan la hriat ngai lohte chu tun hnaiah an lo lang nawlh mai a, kan tui tlan ber Tlawng lui fintu lui thianghlim lohzia hriain an lo thian fai ṭhin hi a lo ni a. Pawl hrang hrang leh zirlaite nen Tuikual lui leh a dangte then fai hna hi an lo thawk ṭhin a ni. Tun hnai khan kan sawrkar beng a lo thleng a, kan Chief Minister Pu Lalduhoma hovin, Ministers, MLA leh Political party mi ṭhenkhat leh mi tlawmngai ṭhahnem tak hnatlang chu Social media lamah kan lo hmu a nih kha. Kan CM chuan sawrkar anga engmah an tih theih loh laia mi tlawmngaite (Save The Riparian) lo lang phut mai leh, an hnatlang lai video-a a lo hmuh khan a tihlawm thu leh chhuanawm a tih thute, mipui leh sawrkarah pawh harhna (awareness) a thlen thute May 24, 2024 khan hnatlannaah a sawi a nih kha.
Kan CM meuh hnatlanga a chhuak ve kha mipuite tan thil zahthlak tak a nih thu, The Aizawl Post Editorial-a lo lang kha mipuite'n inenfiahnan hman a ṭha hle awm e. Kan CM hnatlang kha a zahthlak lam ni lovin, kan CM hial hnatlan ngai khawpa mipui kan che ṭawp kha a zia lo ti zawnga a rawn sawi kha a dik khawp mai. A hma lama kan sawi tak ang khian, faina kawnga hma latu pawl hrang hrangte an lo awm ṭhin a, an mutan ber pakhat chu tih tak takna a tam lo ṭhin hi niin a lang. Pawl ang leh sawrkar ang pawha thu ṭha tak tak dawhkana rel ṭhinte hi a bawhzui lamah kan ṭuan a fum fo a ni ber mai. Ram roreltu apiangte hi thil ṭha tih kawngah hian hma hruaitu ni thei zel se, dawhkan nuam tak kalsana hmun hrehawm zawk thleng hmasaah te hian ṭang fo se, kan danglam mai ang. Election campaign ah, "Hnathawh kawr min haktir ve ula, chumi khami chu kan ti ang," ti ṭhinte hian a ṭul hunah Mizo pa hnathawh kawr hi han inbel tak tak se la, an hnungah mipui tam zawkin an zui mai ang chu. Kan Mizo hnathawh kawr leh tlawmngaihnate hi dinhmun sàn tàk avanga kalsan mai tur a ni lo va, dinhmun sang zawk aṭanga chawi nun zel zawk tur a ni ang.
Fak tlak hi chu fak zel mai ila, entawn tlakte entawn zel bawk ila, hma kan sawn mai ang. Tun ṭumah pawh hian Save The Riparian pawlte hian fak an phu thlawt a, kan sawrkar leh mipuite an thil ṭha tihin a kai harh hi chhunzawn zel teh se. Kan CM ngeiin hnathawh kawr haa hmanraw ṭha tak nen, khup thleng thlenga tui dai chunga hnawmhnawk a ham bawrh bawrhte kha faina kawnga min zirtirtu ni ngei teh se. Tu mahin pol.party zawnga la lovin, a phûte hi chu fak leh chawimawi hi hreh lo ila, thil dik loah chuan insawisel leh insiam ṭhat hi hreh lo bawk ila, chu chu Mizo Kristian zia tur a ni ang .
Kan thupui ang khian kan sawrkar hian ruahmanna fel tak siam se, Aizawl khawpuia Luikawrte hi a vaia khuh turin ka rawt nawn leh e. Chu chuan Save Tlawng leh Save Chite lui a huam nghal avangin he lama pawisa awm ang ang pawh hi hman ni se. Kan CM leh a Minister-te ngei hi kan fai lohna chhan hriaa hnatlanga thawkte an ni bawk a, kan Aizawl khawpui Luikawr khuh hi hna hmasaah han nei ngei teh u le.
- H.Lalchhuanliana