Police suspend ngawt kha

ZPM sorkar a pian tirh khan hmalakna eng eng emaw an nei a. Police checkgate-a lirthei khalhtute hnen aṭang pawisa lak ching an awm thu an sawi a. Khami kal zelah khan Police pahnih suspend an ni a, a ṭhen an transfer bawk.

Kha thilah khan Home Minister thupek chu a ni meuh mai. Dan awm loa gate-a pawisa lo lak ngawt kha bawhzui tur a ti a, an bawhzui ta reng a ni. Minister thusawi an zawm ṭha viau.

Vairengte bik han thlur ila: khami lai vel khan a thil tihsual hriat miah si lohin OC an han trasfer thawr mai a. Vairengteah khan awm reng pawh a chak kher lo ang, mahse, kum khat em pawh a awm dawn em ni tih turin an transfer ngawt kha mi tam tak ngaihdan a ni hauh lo.

Police hotu ṭhenkhat mahni ṭanghma hai chingte hian minister tihlawm nan an naute chunga ṭuan an ching hi an kalphung dik lo leh ṭha lo tak a ni. Police officer an nih vanga an in sak nana police lirthei an hman nasatzia mit ngeia kan hmuh fo an awm a, an naute nasa taka chhawr hriat leh hmuh tur an awm reng bawk.

Department hrang hrang zingah Home department baka naute laka inluling leh vua leh vang sorkar hnaa thun hnem an awm lo ang. An pension hnu thlengin motor an kawl a, driver an kawl a, ardali an kawl bawk a. Heng hi tireh tur chuan anmahni bawk a chingfel theitu an ni.

Vairengteah mipa leh hmeichhia, ASI leh SI chu checkgate-a driver hnen aṭang pawisa laah puh an ni a, an han suspend thawr ringawt a. Suspend mualpho lo pawhin an chhui fiah theih reng. An pute hlauh vanga suspend ngawt kha a dik thei lo hrim hrim. Pute hlauh vang mai mai.

An han chhui ta a. A chhuitu khan thla eng emaw zat hnuah thiam lohna a hmu lo a, suspend an sut a, an chawlh chhung pawh an hlawh an la leh vek a, "Suspend lo ang an ni," tin order a awm ta.

Kha'ng police officer pahnih kha suspend mualpho lo khan chhui mai dan a awm. Ministry hlauh vanga a lal lam hmai phih fai tumna mai niin a lang. Police hotute zinga ṭhenkhat an corrupt hlawm viau si. Naute laka thikthu tichhe viau si hi Mizoram mipui mai bakah a hre chiangtu chu an ṭhenawm hnaivai an ni. Corrupt ching leh mi dik chu an sawi zat zat thei.

Khatia an naute suspend khan an service ah nghawng nei lo mah se, mi dang en dan leh anmahni ngei tan pawh a rilru natthlak hle ang. Khatiang rup rup lo khan a chinfel theih ngei ang. Naute chunga kut tih ram viau hi an pension hunah an nuihzat ve duh viau an ti a nia.

-Lal Khirhvela