Khawi lam lanu nge maw i nih le?

Tleirâwl leh nula hmêlṭha deuh tawn thut châng hian artist ropui ber Pathian kutchhuak an nih miau avângin mit khap lo lêka thlir veng veng hi a nuam ṭhin. Ṭhenkhatte chuan miin lêrh min ti palh ang tih an hlauh avângin an melh ṭha ngam lo vêl a; nimahsela, a rûkin an melh fo tho. Hmêlṭhaho hi an vânnei bîkin mit an titlai ve ngawt mai.

Elementary stage-ah hian zirlai naupangte hi kan enkawl ṭha thawkhat viau a, fuihnate an bengkhawn ṭha a, an zâwm mai ṭhin. Nimahsela, high school an han lût chho chiah tihah an han tleirâwl ṭan a, an ti tuai a lo duhawm ṭan bawk nên hmeichhia niin mipa ni se an pian a nalh a, an hair style-in a zir bawk a, an thuam inbel an inhmeh bawk chuan an opposite sex-te mit an la lo thei lo. Chu an pian nalhna, hmelṭhatna leh duhawmna chuan university an rah thlengin bengkhawn leh ûm zui a hlawh ta ṭhin a, beih lêtna (resistance power) nei ṭha lo, rilru nghet nei lote phei chu mipa niin hmeichhia ni se an tâlbuai fo a, an zirna hian nasa takin a tawrh phah fo ṭhin.

Nupui pasal neih hun pawh la ni loa inngaihzâwnna leh induhna lo la thu tak viaute chuan chutiang lamah rilru an pe nasa a, duh âia thui an kal phah fo ṭhin. A mâwl fâl bik ṭhenkhatte phei chuan dam chhûnga inṭhen tawh lo tûr emaw tiin an engkim an lo hlân hial ṭhin a; nimahsela, awlsam taka engkim an inhlan hian an lo inning thuai leh si a, inhmuhsitna leh inzah lohna nên hun an hmang dûn a, a tâwpah an inṭhen a, rilru natna leh nun khawlohna tuipuiah an pil ta ṭhin a, a pawi hle.

Finna tel lova hmelṭhat hi thihchilh bomb pâi ang chauh a ni. Zirlai hmelṭha phei chu rilru nghet tak an neih loh phei chuan khawngaihthlâk tak an ni. Kan hmelṭhat a, kan duhawm miau chuan ṭha min ti suh, min duh suh va tih ngawt theih pawh a ni lo. Keimahni thiam loh a nihna lai pawh a awm ve tho. Amaherawhchu, ngaihzâwng neih kan duh miau loh chuan tuma’n min ngaizâwngin min tibuai lui thei tlat lo. Mipa niin hmeichhia ni se miin an rilru an hawn tlat loh chuan signal hmu lovin tuma’n an ngaizâwng thei ngawt lo. Rilru an lo hawnsak avâng zâwkin an va tibuai fo zâwk a lo ni.

Hmangaihna game khelh nuam ti leh chîng an awm bawk. Mihring nih phung hrim hrimah fak te hi kan lâwm a, i hmelṭha lutuk, i duhawm tawp, i zei thlâwt, han intihte hi thil lâwmawm tak a ni. Chu chu mi tam takte chuan an lo chai tâwk êm êm ṭhin. Hemi kawngah hian nu leh pate’n kan tu leh fate rilru nghet tak pu tûra kan zirtir nasat a pawimawh hle.

Tleirawlte hringnuna thu-tlûkna sang ber leh pawimawh ber siam theihna (superego) hi an nu leh pate, leh zirtirtute tuhsak tûr a ni. Nu leh pate’n an fate an zirtir ṭhata an rilru an hmin tlat chuan an fate zu, drugs leh sex hman khawloh theihna hmunah tâl eng ang mah sela, an him mai dâwn a lo ni. Khawi hmunah pawh kan fate kan hmu reng thei lo a, kan vêng reng thei bawk hek lo. An tlat fâl hun a awm ṭhin. Chutih hunah, mahnia thutlûkna pawimawh tak siam thei tûr chuan nu leh paten kan fate kan buatsaih ṭhat a pawimawh.

Tûnlaia zirna kawnga mipa âia hmeichhia an chungnung zâwk kan tih fo pawh hi hemi kaihhnawih deuh tho niin a hriat. Hmeichhiate âiin mipate hian inngaihzâwnna kawngah rilru an pe nasa zâwk niin a hriat a, hei vâng hian an hna pawimawh ber lehkha zir hi an ngaihthah fo ṭhin niin a lang. Hmeichhia an duh laklawk tawh hi chu an vei ve êm êm a, an vil reng peih bawk a, hei hian an nun nasa takin a tikhawlo ṭhin. Hmeichhia, rilru nghet lo leh ngaihtuahawm tak tak awm bawk mah sela, a tam zâwk chuan ngaihtuahna fing leh fîm an hmang a, hmathlir an nei ṭha a, mâwl takin an khawsa lo zâwk a, hei vâng hian an hlawhtling ṭhin niin a lang.

Mipate hi an thiam lo zâwk a ni hauh lo. Hmeichhia angin rilru fim hmangin zirna lamah rilru pe ta se hmeichhia chuan an tluk hauh lo ang. Chuvângin, mipate hian hmeichhia ringawt kan âtchilh laiin hmeichhia chuan min ât chilh ve lêm lo a, an zûna kan uai chhûng hian officer min lo nihsan zêl a lo ni. Sual lian tak khura Adama hruai lûttu hmeichhiate hi ât chilh chin tâwk neih a ṭha.

Hmêlṭhatte hi thil lâwmawm leh hmuhnawm tak ni mah sela mi dangte tân thlunglu tihaitu a ni thei a, a ṭhenah phei chuan hmelṭhate tân pawh buaina thlentu mai a ni. Eng pawh ni se, kan hmelṭhat miau chuan a intihhmêlchhiat theih tawh bawk si lo a, kan hmêlṭhatna hi finna hmangin humhalh ila, mi dang hmelṭha kan duh viau a nih paw’n finna bawk hmangin duh ila, chu chuan kan zirna kawngah harsatna min thlen a rinawm lo.

Hmelṭhat hi malsâwmna nge ânchhia? Kan fin leh fin lohah a chhânna a awm.

- Miltona,

Vaivakawn