Chhungkaw hlimna thuruk
Mitin hi hlimna zawngin kan buai a. Hlimna hi amaha lo awm tawp a ni lo a, keimahnin kan nitin nuna hlimna kan siam a ngai zawk a ni. Khawvela mi zawng zawng hian harsatna kan tawk vek a, mah se hlimna chu kan nei thei vek tho. Chhungkaw hlim theih dan tur i han thlir teh ang.
1) Chhungkua in hriat-thiam tawn:- kan chenpuite inhriatthiam tawn a, duh zawng leh duh loh zawng thlenga in hriat sak a pawimawh.
2) Chhungkaw member inzah tawn:- Nu berin pasal a zah ang bawkin pa berin nupui pawh a zah thiam tur a ni. Unau kan inzah tawn ang a, faten nu leh pate kan zah ang. Hetianga kan tih chuan chhungkua a hlim ang.
3) Chhungkuaa hun hman hnem:- Pa ber office leh hna ṭul danga a chhuah reng a, nu ber fate uap lum hman lo khawpa a buai a nih chuan chhungkua a hlim thei ngai lo. Chhungkuaa titiho leh ṭhutkhawm, picnic leh zinhote hi chhungkaw inpawh tawn nan a ṭangkai hle. West Bengal-te kan thlir chuan chhungkaw tam zawk hian kum tin family tour an buatsaih ṭhin - entawn atan a ṭha khawp mai.
4) Chhungkaw hun ruat:- Chhungkua a member tin duh dan milin chhung tin hian hun ruat lawk fel tak nei ila. Entirnan, Inrinniah chhungkuain zanriah kan ei chhuak ang a, Chawlhni-ah i pite kan tlawh ang etc. hetianga kan tih hlawhtlin theih chuan kan chhungkua ava hlim dawn em!
5) Fate school a thil thleng hriatpui:- Nu leh paten kan fate zirna dinhmun leh an harsatnate hriatpui a pawimawh hle. Puih ngai a awm chuan puih a, an lehkha zir laia lo ṭhutpui leh ei tur lo siamsakte hian naupangte a tihlim
ṭhin. Kan nitin nuna thil thleng sawihote hian inpawhna a siam.
6) Nu leh paten fate hma-ngaihna kan lanchhuah tir thiam a pawimawh. Naupangten kan hma-ngaih tih an hriat chuan in chhung an ngaina ang a, thu pawh an awih phah dawn a ni.
7) Ṭawngṭai ho:- Chhung-kuaa Pathian biak ho hi a pawimawh hle. Kan harsatna leh lawm-thute Pathian hnenah thlen fo a ṭul. Kan nitin nun Pathian hnena kan kawl tir ṭhin chuan chhungkaw hlim tak kan ni dawn a ni.
8) Surprise party:- Beisei loh taka thil ṭha kan hmuh hian a hlimawm lehzual ṭhin. Paten nupui fanaute tan surprise party a chang changa buatsaih te hi thil ṭangkai tak a ni.
9) Chhungkaw rorelna:- Thutlukna siam dawnin nu leh paten mahni a siam mai lovin fate rawn a, chhung-kuaa rorel khawm te hian fate a tihlimin an puitlin phah ṭhin.
10)Langsar taka nupa inhauh loh tur:- Kan nupui pasalten tih dik loh an neihin fate hriat loha in hrilh hram hram tur. Naupang hmuh laia inhauh leh diklohna te kan sawi chhuah hian naupang a tithlabarin nu leh pa an zahna a tlakhniam phah thei.
Chhungkaw hlimna hi Pathian aṭanga neih a ni a, Pathian kan chawi-mawi ṭhin ang bawkin kan chhungkuate kan chawimawi a pawi-mawh. Ministry of Social Welfare ten emaw, MHIP/ YMA te hian kum tin Best Family Award te hi siam ta se, chhungkaw hlim kan neih belh phah ngei ka ring.
- Rohit Sharma,
Kolasib