Mitthi lumen leh khawhar lenpui

Mizo hnam a ral hma chuan, mitthi lu-men leh khawhar in lenpui te, thlan laih te hi chu a awm reng turah ngai ta ila. Chutih rual erawh chuan khaw-pui zawkah chuan eizawnna avang te in tlawmngaih chhuaha thlan laih leh khawhar inlenpui tih erawh hi chu a awm tawh lo mai thei a, pawisa chawia thlan laih leh khawhar in lenpui hi a awm tawh lo maithei. Aizawl khawpui chhunga Veng ṭhenkhat phei hi chuan hlawhfa ruaiin thlan an in laih tir hial tawh a ni.

Mizote hi chu hman ata tawh khuang nena khawhar hla sa chunga khawhar inlenpui a, an thih hun darkar a zira mitthi ruang tlai-var pui te a ni ṭhin a. He kan hnam nun ze timawitu pakhat hi kan hnam hmasawn dan ang zel leh, kan nun dan mila kan her rem thiam erawh a ṭha ang.

Mitin mai hi ei in zawnna avang leh mahni mimal hna avangte in kan buai tawh em em a, a buai lo tawk leh a tlawngawl tawk eng emaw zat chu an awm ve tho ang. Chutih rual erawh chuan a tam zawk, mi ṭhenkhat, private company leh mahnia sumdawnna kalpui ang chi hi chu sum leh pai thawk chhuak tura chhun leh zan pawh thliar lova hna thawk kan nih a rinawm tawh. Chumi avang chuan tuna mitthi ruang tlaivar kan kalpui dan leh khawhar chhungte lenpui hun kan siam dan hi kan thlak danglam a, kan tihdanglam a hun niin a lang.

Tuna kan kal danah hi chuan zing dar 10 hmaa thi chu chawhnu lamah kan in vui mai tlangpui a, dar 10 hnu lama thi chu kan tlaivar pui mai ṭhin. Hemi tak hi kan thlak danglam a hun hle. Zing dar 10 hma chauh ni lo, chhun dar 12:00 hmaa thi hrim hrim chu tlai lam dar thum emaw, dar li vela in phum tur ang zawnga ruahmanna kan siam a, kan inphum mai hi a hun tawh hle.

Zing dar 10 hnu lamah chuan thlan lai tur tlangval kan inhmu lo ang, hmun dang leh khaw danga an chhung leh khatte an rawn thleng hman lo ang, kan ti a ni mai thei. Zing dar 10:00 hnu lama thi chu an thlan lai turin daily rate anga thlan lai tur ruai mai ila. Ṭhalai sawrkar hna hmu lo leh nitin a inhlawhna tur nei lem lo mi tam tak an awm a, hna kan siam sak a ni mai dawn a ni.

Khaw dang leh hmun danga awm an chhung leh khatte an rawn thleng hman lo ang, kan ti a nih chuan, a ruang tlak tukah thlan ṭhut ni a awm leh tho a, he thlan ṭhut ni hi mitthi ruang awm laia ruang rawn nang hman lote tana kan neih a ni; i buaipui lo ang u.

Tin, mitthi ruang tlaivar hi a section emaw a unit ang zawnga tlaivar zan bik siam ta ila hah fal lutuk bik kan awm lo ang. Tuna kan kal dan, khawhar lenpui zan, zan thum hi chu duh ai a tam mah mah a. Kohhran leh khawtlang, mimal thil buaipui tur a tam si a, khawiah zawk nge kan kal ang tiin kan in khap buai zo a, zan hnih ti tawh ila.

Khawhar chhungte riahpui tih phei hi chu awm tawh lo tawp se a ṭha ang. A chhan chu dinhmun chhe zawk leh hnuaihnung zawka dingten riahpuitu pawh an neih mang loh laiin dinhmun ṭha zawka dingte erawh chuan riahpuitu an ngah hle thung ṭhin.

- Nawlchunga Chinjah, Siaha