SAMARI NGE MIZO?

Zofate hian hma kan sawnin kawng tam takah rual kan ban pha ve dawn ta a, hming lanna kan nei ve ta zauh zauh mai. India ram huapa kan mi lang awm chhunte kan chhuang a, team work-ah leh mi malahte kan lang ve ta nual mai.

Mi malah phei chuan gold medal hawn te pawh kan awm nual a. Asian leh World level-ah pawh medal kan dawng ve ta, hma kan la sawn zel dawn ni paw’n a lang. In ṭanpui tawnnaah te pawh kan hawi zau ta kawp mai. Chhiat ni-ah erawh thung chuan rual kan chhin vena a ni hial awm e.

Tlema hman lai deuhah kha chuan mo lawm tih lohah chuan thil danga mite lawmna lawmpui hi kan thiam em em lo a, infiamnaah emaw, miin hlawhtlinna an neihin, “Khaw’nge hei hian kan lawmpui teh ang,” tih aiin “I chawi thei,” kan ti a. Vanneihna hmutu tan khan hekna hi a tam em em mai a. Kan zai ve ṭhin laia min hluttute chuan lengah min sawm a, tape cassette khatin min zaitir a, chaw-te kan ei a, a nih loh vek leh eng eng emawte chu min leisak ve zauh chu a awm. Tunah chuan chung hun chu kan pel ta.

Mite hlawhtlinna lawmpui lamah te, Idol leh Icon a lo awm ta bawk nen, kan hawi zau ta hle mai. Chu chauh ni loin mite
ṭanpui te, mi mal emaw pawl emaw pawh kan awm ta nual mai, a lawmawm hle. Chulai karah chuan mite
ṭhat-na azarah, a tiṭhate hming bo ṭhaka tlawm-ngai pawl an awm hi uihawm ka ti a, ka han pachhe ṭo ve phawng mai a ni.

Tlawmngai pawl pakhat 'Samari Miṭha' tih hi, thilpek petute ka hmuh ve theih chin chu ka Mizopui te vek an ni si a. Mizo Mi-
ṭha-te thiltihah Samari Mi-te'n hmingṭhat an hlawh daih mai a. Khasi ramah chuan Mizote'n thlan laihnaa an tlawmngaihzia an hre lo a. “Mizo chuan thlan laih an châk, nuam an ti,” te an ti mai mai a. Anni khu lo ṭhangharh se, tlawmngaihna hlutziate han hre ve se, Pawl din sela, “Mizo Tlawmngai Pawl” ti ta sela Khasi ni bawk siin, chhiat ni ṭhat ni-ahte ṭha takin inhmang sela, mi chuan an hlut ve hle ang. Mahse, Mizo tlawmngai pawla Khasi ho hlir awm kha chu thil mak tak a ni thei a nia.

Non-Mizo zaipawla Mizo hlir lan pawh kha ni meuhin an hre lo a ni ang, “Mashihi Sangati” tih a ni ta daih mai. Samari Miṭha hi a mawi viau laiin “Mizo puitu pawl emaw ni ta sela a va inhmeh dawn em!” Bible-a inziak a ni a, hei pawh hi Samari mi hian a ti tak tak ni pawhin a lang lo, kan vengte leh kan lainate chu tute nge ni ang? tia tehkhin thua Isua'n a sawi mai a ni lehnghal a. Hawh u, kan ṭawnga vuah theih leh harsa ni si lo te, nakina ṭhangthar awm zelte'n kan ṭawng an rawn bo loh nan hming, pawl hming leh thil hming dangte pawh hi i vuah lui hram hram ang u.

Mizo Miṭhate u, in ṭhatna kha in hnam leh in nihna tar lan nan lo hmang hram hram turin ka ngen che u a, a dik bawk si a, tuna thlak mai a harsa a nih chuan hetianga pawl emaw, mi mal emaw hming vuah turte chuan chik taka ngaihtuahin hming hi i vuah ṭheuh ang u.

- B. Lalthlengliana

Saron Veng, Aizawl