Mamawh lohnaa pawisa ngah hi!

Mizoram sorkarin pawisa a neih loh avanga sorkar hna­thawk hlawh a puk chawp laiin Mizoram sorkar tho chuan cheng maktaduai tam tak sengin Aizawla mi hausaho garage atan PAHOSS hnuaiah hna an lo thawk mup mup mai a. Mizoram sorkar tho chuan kan mamawh aia tam kan neih tawh phullem phah belh zelna tur pawisa a neih bakah Five Star Hotel te pawh sak a tum hial a ni awmin kan lo ralkhat hriat ve a, sorkar pawisa hi chu sem rual dan awm se tiin ngaihtuahna kan lo seng ve a ni. 

Tunah hian Mizo­ram sorkar hian sorkar hnathawk thla tin hlawh pek hi a harsat chho ṭan dawn nia an sawi bakah contract-a thawk hrang hrang hlawh la thei lo an awm tam hle a. Chutihlaiin a tel lo pawha kan awm theih thil dangah pawisa a tam leh em em bawk si a. Covid-19 a rawn len ṭan tirha ICU leh ventilator kan neih tlem avanga kan dinhmun kan Chief Minister-in a sawi te khan kan lo ip chawih chawih a ni. 

ICU siam belhna tur sum te, ventilator lei belhna tur sum te, sikul building tlabal lutuk luah pawh hrehawm khawpa chhia siamna tur sum te, thingtlang khaw tam tak kal pawhna tur kawngpui chhe em em tawh thawm ṭhatna tur sum te, Civil Hospital hrang hranga first aid damdawi a thlawna pekna tur sum te, HIV/ AIDS veite enkawlna tur sum te pawh kan mamawh em em tih an sawi lai hian, chu sorkar tho chuan thil dangah chuan pawisa a ngah leh viau lawi si hi keini ak zat hnih hnuai lam chu kan bo ve khawp a ni. 

Mithiamte chuan plan fund leh non plan fund an sawi fo a, chu bakah chuan projrct atan bik pawisa dil chhuah thil danga hman thiang miah lo a awm thu pawh min hrilh ṭhin. Tin, a hmanna tur chiang sa CSS pawisa pawh an sawi ve bawk ṭhin a, heng bakah hian Externally Aided Project tiin hmun dang aṭanga pawisa puka a ṭhen kan rulh tur hmanga project siam te a awm an ti leh zel a ni. Heng lo pawh hi pawisa kal dan hrang tam tak a la awm thei ang. 

Pawisa lo lut hi khawh luta liam zawih zawih chu a ni lo ta phawt a, chu pawisa lo lut pawh chu mamawhna lamah awm mang lo, mamawh lohna lamah chuan tam em em ang lawi siin kan sawi hreh leh bawk si lova! Heti reng reng chuan retheite ṭahna khua a la sei zel dawn a nih ber hi maw?