Hnawm Hnawk Zahawm

Ṭhangtharte khawvel chuan a ni telin hnahthel ro ang maiin min len kual mek zel a nih hi ti r'u. He tih mek lai hian kan hun tawn mek leh, kan tawng buak tur dawn lek lovin Naupang chhun rawl ngen ang maiin, kan duhna lam hawiin kan khu chuk chuk a. Tuna kan thil chin dan leh kan duh zawng hian nakin lawkah engtin nge kan ram, kan khawtlang leh chhungkua a nghawng dawn? tih te hi kan ngaihtuah a, kan hun tawn mek hi ngun deuh zawka kan inbih let a ngai ta hle mai. Tuna kan ngainat leh duh em emte hi nakinah engtin zel nge ni ang? tiin rilru leh ngaihtuahna a tibuai vawng vawng ṭhin.

Zep nak a awm lo vang, a tute pawhin chhiat ṭhat kan han tawk a. He ta kan chelek leh kan hman nasat em em THU ZIAK (Citation) hian rilru leh ngaihtuahna a va tithui ṭhin em. Kan ngaih em emten he khawvel min kalsan tak hriatrengna atan kan hmang a, kan inchawimawina lantir nan kan hmang leh bawk a. A ṭha em em a, hman zui zel atan pawh a ṭhain a rinawm. Amaherawhchu, tawk chin nei leh awmze nei taka hmang thiam tura kan inzirtir a ngai e, ka'n ti lek fang chauh a ni. Tuna kan ngaihhlut leh duh em em hi nakin lawkah hmun hnawk a chang ang a. Paih dawna ni thei si lo, tar vek dawn ila, Kan bang laiah tarna tur hmun a awm chuang si lo. An chawimawiate hian zankhat mit chhin kan tawh hunah kan chhungte ngaihhlut leh ngaihpawimawh a rawn chang pha tawh kher ang em? tih pawh hi chhut tham a tling hrim mai.

Hetiang hian duhthu han sam ta ila. Chawimawina leh thihna lam thil bik a nih chuan, a lawina Kohhran ṭhalai pawl leh YMA Branch hian hlan mai ila. Mi dang Section leh ṭhianho te, a rawngbawlpui leh department lama a thawhpui bakah, chu mi In leng tih ang rivate nen lam kan han inhlan hi chuan, a hlutna leh ropuina a tibo vek nite pawh hian a lang a. Hengte avang tak pawh hian hmun hnawk leh HNAWM HNAWK ZAHAWM hming a lo put tak ni.

Ṭum khat chu, mi In hnuai kawmkarah hna kan thawh mek laiin thil mak deuh mai ka hmu a. Kan ngaih em leh kan Nghilh loh tur, tih thuziak leh hlimthla (Citation) hi ka hmu a. Ngaihtuahna a tithui duh vang vang khawp mai. Kan nghilh loh turte hlimthla leh thuziak meuh pawhin kan hmun laili a luah phak tawh loha hnu, tiin rilru leh ngaihtuahna a tithui vawng vawng.

Ṭum khat leh pawh hi kan ṭhianpate inah ka lenglut a. Bawm pakhatah hian eng emaw hi a lo thun lut mawlh mawlh a lawm le. Eng nge tia ka belhchian nak chuan kar kalta maia an inneihnaa an dawn, Lawmpuina thuziak ṭhahnem tak hi bawmah chuan a lo beng lut mawlh mawlh hi lo niin. Ni e, a ni tak asin. Thil ṭha leh mawi tak nia kan ngaihte hian eng nge a thlen a, eng tin zel nge? tih hi kan ngaihtuah chian a hun ta tak zet ta. Hetia lawmpuina thuziak hlu tak leh man to tak tak ai hian, sum leh pai zawnga inṭanpui leh in lawmsakte pawh hi kan zir a, kan tih dan phung her rem deuhte pawh hi a lo ngai reng mai tih hian, kan ṭhalaite hnuk hi dek se a va duhawm tak em.

- Hranghminga