BENGNGAWNG KHAWVEL - II

Engin nge bengngawng chu thlen ta ber tih han sawifiah dawn ila.

A. Sensorineural Hearing Loss (Nerve chak lo avanga bengngawng) : Ri hriatna thazam luruh chhunga awm te, hemi zawmtu nerve bundle thluaka a chhohnate leh thluaka ri hriatna center natnain a tihbuaiin.

1. Inherited causes: Inthlahchhawngah eg: Usher’s, Wardenburg’s Syndrome.

2. Naute pianghlimah: Malaria, khawsikpui, CM virus, toxoplasmosis, neonatal jaundice.

3. Pianpui bengngawng: Natna hengte- Rubella , Syphillis, CM virus, toxoplasmosis nu naupaiin a veiin.

4. Damdawi effect: Nu naupaiin antibiotics…mycin/mycin tih te, cancer damdawite, malaria damdawi ei te in (Dose adjust mumal lohin)

5. Ri bengchheng a darkar tam tak hun hman ṭhin hi tunlai bengngawnna thlentu lain tak a ni bawk e.

6. Presbycusis: Kum upat avanga ri hriatna tlahniam hi a thlentu lian tak a ni bawk a.

B. Conductive Hearing Loss : Bengkua, bengdar leh bengdar chhung pindanah natna/harsatna a awm in. Heng avang a ngawng te hi chu nerve chak lo avanga ngawng aiin a nep tlangpui.

1. Wax : Beng ek tlang lian bengkua hnawh phui vek khawp hi a thlentu pawimawh tak a ni.

2. Bengdar chhung pindan vung emaw tui tling emaw hi bengngawnna thlentu tam ber a ni. Naupang hritlang benvawn, thla hnih/thla thum awh chi ang enkawl si lohin an tuar ngun ber.

3. Beng kherh (CSOM), beng dar a pawh a, a khat tawka hnai chhuak a hul loh a chhuak fo ang chi te hi.

4. Bengdar chhung pindan a tuihnang tling (OME)

Bengdar chhung pindan vung emaw tui tling emaw (bengkherh) bengdar pawp hnai chhuak ṭhin naupang chuan phone emaw TV a en/khawihin a volume a tiring tlangpui. Biak/auhin mi an chhang thuai lo ṭhin. Nu leh pa leh zirtirtuten luhlulah an chhuah fo ṭhin a. Pawimawh deuh mai chu 'a chunga kan sawi' pathumte thlentu chu hritlang (hnarping/ hnaptui/ hahchhiau, hnar za) an nei a. Nu leh pa in an en liam mai mai ṭhin vang a ni ber a. Beng, hrawk leh hnar (ENT) Specialist a entir nachang hriat loh vang a ni tlangpui. Naupang ri hriatna nei ṭha lo chu an ṭawng mai har a, ṭawng a fiah lo ṭhin a, zirnaah an hnufual ngei ngei ṭhin. Tetlai aṭanga ‘bengkherh’ enkawl ngai mang loh avanga nula tlangval bengngawng ang reng tak si hi high school leh college student ah hian zu awm ṭeuh a. Kan Zoramah hian zirtirtu thusawi hre kim lo zirlai chu ngaihtuahawm tak a ni.