CHHIATNA KARA LAWMNA THLENTU TLAWMNGAIHNA
Mizo Tlawmngaihna a thi ṭan tawh tia an sawi fo ṭhin hi i hre tawh em? Mi ṭhenkhat chuan kan hnam hi a chhe tawh, kan rilru put hmang leh sukthlek enin zuai lam kan pan tial tial an ti chawk a, thil ṭhenkhatah chuan a dikna chen a awm mahna. Sual leh dik lo a langsar a, mi pakhatin thil tisual se, a sualate vangin a felaten an tuar chang a awm a, a felte nen lam thil dang ngaihtuah tawh lovin kan inpawng dem a, sual ta vek leh chhe vek tur angin kan inngai ta ṭhin. Hetiang chiah hian mi inpe tak tak leh thil ṭha ti duh tlat, dikna leh rinawmna, tlawmngaihna sahuai thing vawn tlat mihringte avangin kan zavai hian kan thang mawi mêk bawk. Thil kan thlir dan hi kan thlak thiam a ngai a, a ṭawng chak chak te, enga mah hmaa mi lo dem chiam mai te, ngaihtuahna hmasa leh hnuhnung zawk pawh nei thei lo khawpa mi sawi apiang awih mai zel kan nih chuan, mi sam leh mi tih nuam tak kan ni tihna a ni a, kan inzir a ngai hle tihna a ni.
Social Media-a kan hmuh zawng zawng te, kan thu hriat zawng zawngte khaikhawm leh finfiah lem lo hi kan tam khawp mai. Hemi a nih vang hian thil reng reng kan thliar thiam a ngai a, a chhan kan hriat hi kan tih tur a ni. Mahni awm hmun aṭanga ngaihdan tlangaupui phawng phawng 'Phone Pasalṭha' kan tam ta lutuk hi a veiawm a, a taka che chhuak ngai lo lo hi an nih duh viau lehnghal. Sawi ringawt chu a awl, a taka tih hi kan harsat tlâng chu a ni. Inkhel pawh hi a entu tan chuan sawi a awl a, a takah erawh a har zia an sawi fo ṭhin. Pu Lalnunpuia Hrahsel in a lo sawi tawh angin Social Media hi Sawisel Media ah kan hmang ta mai emaw tih tur a ni. Mizo Tlawmngaihna chu tun hnai chhiatna karah a takin a rawn lang chhuak a, a chunga kan sawi tâk ang chiah khian thil ṭha titu mi inpete avangin kan thang mawi a, chhiatna karah Mizo tlangvalten a takin tlawmngaihna an lantir hmuh kha a va nuam tak em!
Mizo tlawmngai tak tak, mahni in lum kalsana ṭanpui ngaite tana pen chhuak, thawh hreh nei lo mi eng emaw zat an awm. Ṭanpui ngaite ṭanpui tum tlat, mi dang tana inpe eng emaw zat an awm tih hriat leh hmuh ringawt pawh khan thla hi a muang veng veng zuk nia! Kei ngei pawh hian mi dang ka la mamawh dâwn a, mi dang buaipui ngaiin ka la awm dâwn, inmamawh tawn vek kan ni. Suangtuahnaah hnam dang an lang mawlh lo, mi dangte tana a sur a sa hnuaia che chhuak ṭhin, phut let nei loa tlawmngai - Mizo Tlangvalte ngei a ni ka rilru luahtu ngei chu!
Tun hnai chhiatna vangin inkalpawhna tam tak a ping a, damlo leh mitthite zawn an ngai a, tun hmaa kan tih ṭhin angin hlânga inzawn a ngai hial. Kawng mumal lo, leimin kara che chhuak tlangval tlawmngaite kha fak an phu ngawih ngawih a ni. Mizo nih hi a nuam a, chhiat tawh ni hian a nuam zual bîk emaw tih mai tur a ni. Kan inpui tawn liam liam te, kan intuamhlawmna te, kan inngaihsakna adt. thil kan tih khawm let let hian a chhunga chen a tinuam a, hnam dang kan ngai bîk lo. He hnama ka piang hi ka lawm a, a ṭul huna hnam tana pen chhuak ṭhin Tlawmngaihna vawng nungtu, Mizo hnama kan piang hi lawm nachang i hria ang u. Mizo Kristiana kan piang ringawtte hi lawmthu sawina tham a tling. Zonun Zemawi hi a vul zel theih nân nang leh kei hi kan pawimawh a, Mizo hnam tan eng nge ka tih ve theih? tih rilru hi put i tum zel ang u.
- Vidpuia Hrahsel