MBSE RESULT CHHUAKTE KHA
Kumin 2024 MBSE-in result a tihchhuah HSLC leh HSSLC-te kha han thlir vang vangin kan sorkar sikul, sorkarin an zirtirtute pawh man tam tak taka a chhawr, zirna hmanraw chi hrang hrang pawh man lova a tumsak vek sikulte chu Zoram sikul ṭhen hrang hrangte zingah a tichhe ber a ni leh tlat mai a! Kum dang result reng rengah pawh engtizaizia nge maw ni, kan sorkar sikulte hi a tichhiaah an ṭan tlat thin ni! Kumin 2024-ah ngei pawh HSLC result han thlir khan sorkar sikul ngeite kha fail fai vek sikulte kha zuk awm nual a maw le! Sorkar tan pawh ṭan lak a ngai hle mai. A enkawl sikulte hi khuahkhirh deuh se, an sikulte pawh hi ngaihthah lutuk lo se a ṭha hle ang.
Hetih laiin, result han thlir khan defecit sikulte kha a ti ṭha berah an awm leh tlat mai a; defecit sikulte erawh hi chu fak an phu kher mai. Kum tin MBSE result han thlir thin hian deficit sikulte hi a ti ṭha ber an ni kum tin ṭhinte hi an fakawm a, sorkar lam pawh hian chawimawina hlan kum tin an phu hle awm e.
Ka hriat sual loh chuan deficit sikulte hi Mission enkawl sikul a ni tlangpui hlawm a, discipline pawh ṭha tak vek an niin, an zirtirtute thleng pawhin fai leh fel tak tak, naupang ngaihtuah em emte an ni hlawm. May 23, 2024 Vanglaini chhuaka Dr JT Vanlalngheta’n St.Paul’s HSS-a a thawh lai chanchin a ziah khan min tiphûrin min tilungleng tlat mai. Kei pawh mission deficit sikul tho St. Peter’s HSS, Chhingchhipa thawk ṭhin ka ni a, keini phei chu thingtlanga awm kan ni bawk a, admission-ah han fîr ngaihna a awm dêr si lo. A pass tawh phawt chu eng division sawi lovin kan lo admit mai ṭhin kha a ni a. Khang hote kha public exam-a ṭha taka an pass theih ngei nan zirtirtuten theihtawp chhuahin an han hrual ṭhin kha a ni! A lo va hahthlak ṭhin tak em!
Kan principal-te lah khan naupangte tuition pekte kha an phal der si lo. 'Thiam loh nei chuan zirtirtute englai pawhin man lova zawh mai tur' an ti hmiah mai a. Inrinni leh holiday nite hi enjoy ve hlei thei lovin, extra class lak nan kan hmang liam zel a. Mahse, public exam a lo thlen a, result a lo chhuah meuh hi chuan kan thawh rah a lo lang a, HSLC topper han neih meuh phei chuan kan induhin kan hlimpui leh em em thung ṭhin si a. Class lak lai chhung zawng pawha ṭhu ngai lo, exam duty chhung zawng pawha ṭhu ngai hauh lo zirtirtute tan hi chuan naupang chu ṭhahnem viau ṭhin mah se, hmuh kima hriat chian a awl fut mai. Sikul tam takah chuan tlar hma leh tlar hnung lam hi a inthlau viau ṭhin a, mahse, kan sikul angah hi chuan danglamna a awm lo. Zirtirtu lahin englai pawhin a fang kual reng a, danglamna a awm reng reng lo. Sorkar sikul ṭhenkhatah chuan an zirtirtute kha teacher’s platform-ah, chair-ah dawhkan bawhin an ṭhu a, an muthlu vel ṭhin tite’n an sawi ṭhin. Hetiang hnuaiah chuan naupangte an va zalen dawn tak em!
Leave lakte kha a va inthlahrunawm tak ṭhin em! Aikal lak phal kha a ni ṭhin si lo va, ni khat lek sikul ṭhulh pawh kha a uihawm hliah hliah ṭhin. Sorkar sikul tam takahte hi chuan an zirtirtu, kohhran upa ṭha tak takte hian kohhran pawimawhah leave pawh la chuang lovin sikul an kalsan hmiah mai ṭhin a; tin, chhiatni ṭhatni-ah pawh leave la lem lovin an kal hmiah thei zel a. YMA hnatlang tih angreng velah pawh an kal hmiah zel thei a.
Han sawi takah chuan, tun hma lama sikul inspector kan tih maite'n sikul an endik ṭhin ang kha neih leh a ṭha hle ang. Chuti lo chuan kohhran leh khawtlang pawimawh hi sikul aiin an ngai pawimawh zawk a nih hmel tlat ṭhin hi! Hetianga nih chhung hi chuan result ṭha neih a har duh ngawt ang chu. Hetiang taka kan lo zirtirna aṭanga zir chhuak, kan ram rorelna khawlpuia cabinet minister Pu PC Vanlalruata kan nei ta maite hi a ropui ka tiin, ka va chhuang em! A zirlaia dicipline a ngaih pawimawh ṭhin ang kha hlen chhuak zel se tiin duhsakna ka hlan nghal a ni. Tin, tuna Lunglei District SP Pu Jerome Lalmuankima, MPS pawh hi kan sikul chhuak a ni a, a nunah eng emaw chen chu a sikul kalna discipline kha a la vawn a, a naute a enkawlna lamah pawh ṭha taka a tih ka beisei tlat a ni.
Kan ramah hian mission deficit sikul hi a tam vak lo, mahse, kan ram zirnaah hian contribution an nei sang viau lawi si. Chuvangin, kan sorkar pawh hian heng mission deficit sikulte hi hamṭhatna ṭha zawkin thuam se, an service a tawp rual ruala maipár thlawn taka an thlawn tawp ṭhin hi an khawngaihthlak em a, eng emaw pension benefit chhetê tal an neih nan emaw, thil eng emaw tihsak ve ngei ni thei se tiin ka han dilpui nghal a ni e.
- Patrick Z, Chhingchhip