MNYF-in Tourism Minister an puhna kha
Mizo National Youth Front chuan June ni 6, 2024-a press release an tihchhuahah chuan Tourism Minister Pi Lalrinpuii chu dan kalha cheah an puh. An puhna ber chu, Tourism Department-in Anthurium Festival titawpa Leitlangpui Music Festival buatsaih an tum chungchangah a ni.
MNYF-te hian thil an hre ṭhelh niin ka ngai a, chuvangin, kei mi tling lo leh ṭawmkailo hian ka'n chhang ve teh ang. An tarlan pakhat, Mizoram Allocation of Business Rules 2019-ah Music chu Art & Culture Department khawih (subject) a nih thu tarlan a ni a; a dik a ni.
Mahse, Art & Culture hi nodal department a nih rualin, music/rimawi hi an ta a ni lo a, an thuneihna liau liau a ni lo a, an tel lo leh an pawmpuina tel loin music festival emaw, concert emaw buatsaih theih a ni lo tihna erawh a ni lo. Chuvangin, Tourism hian anmahni project liau liauin Central aṭangin fund an hmu a, an duh angin festival pawh an buatsaih thei alawm. Music festival buatsaih a nih dawn avangin Art & Culture pawmpuina leh hriatpuina a ngai lo, Art & Culture Dept. chauh hi music festival buatsaih theitu an ni hek lo; phungbawma an insawm duh leh duh loh erawh an thu thu a ni. Tourism Department thil tih danah hian Art & Culture Dept. leh a changtu Minister palzûtna a awm lem lo e; an duh danin an ti thei miau tlat.
Anthurium hi pangpar a ni a, sorkarah chuan Horticulture Department lam chan a ni. Kum 2006 emaw aṭangin Anthurium Festival buatsaih ṭhin a ni a, a buatsaihtu/huaihawttu chu Horticulture Dept. ni loin, Tourism Dept. a ni. Tourism Dept. leh Horticulture Dept. ṭangrualin an buatsaih dun anga sawi theih a ni a, mahse, a ni chiah lo.
Anthurium Festival buatsaihna senso hi Tourism Dept. tum vek a ni a, Central aṭanga sum an hmuh hmanga an buatsaih a ni. A hlawhtlin lehzual theih nan leh hmalak a awlsam zawk nan Horticulture Dept. leh anthurium chíngtu pawlte an thawhpui mai a ni zawk. Chuvangin, Anthurium Festival buatsaih tur emaw, buatsaih ṭhin titawp tur hian Tourism Dept. hian Horticulture Dept. phalna a lak a ngai lo a, anthuriuam chingtu pawlte phalna an lak a ngai hek lo. Horticulture Dept. leh anthuriuam chingtu pawlte hian Anthurium Festival titawp an ui ngang a nih chuan, sum an neih bawk chuan Tourism Dept. tel loin an buatsaih zui thei tho mahna le.
MNYF hian an chuk fuh lo ka ti a. Tourism Minister laka action la tura Chief Minister an phût leh zilhhau tura ZPM Val Upa Council an phût hi ka nuih a lo za ve lutuk a!!! Sorkar khen burna tur an hre mai si lo a, remchang lo chungin, sawi pawr tur zawng lui ngar ngarin an khêng teih ni maiin ka hria!
- Zoramchhana