Hlain Hna A Thawh Theih Dan

Hla hian mihring nunah kawngro a su hle mai. Ṭawng pangngaiin a sawi lan zawh loh miin a vei em em chu, hla tawi te pawhin chiang takin a sawi thei ṭhin.Hla chu chem hriam ai pawhin a hriam a, silai ai pawhin a chak a, a thleng thui zawk bawk.

Silai mu chu hlam zali zanga piah lamah chuan a chak vak tawh lo va, a hnathawh lah minute khat let a ni. Nimin lama kahchhuah tawh phei chu chakna nei lovin leiah a tla mai mai a, hla erawh chuan khawvel pawh hel chhuak mah se, a da chuang lo. Hmanlaia hla pawhin a dawngtu azirin chakna chu a ngai rengin a nei a ni.

Mihringa phurna awm hi ṭingṭang ang a ni a. Ṭingṭang chu mumal nei taka khap a nih chuan hla lawmawm leh lungchhia, hla lungleng te a nih dan tur ang takin a rik chhuahpui ṭhin. Thil eng pawhin a hrui a deh chuan a ri mai a, lunglenna lam hla chuan a tilungleng a, khawhar zai chuan a tikhawhar a, mihringa phurna awm chu a vela dektu azirin a hlimin, a lungchhiain a thinur ṭhin.

Saikuti chuan hla phuah leh zai vel a nin avangin a nuṭapa khaw danga pem tawh chuan a haw em em mai a. Hmuh remchan hun huna velh hrepah a vau ṭhin. Vawi khat chu sa a ai dawnin a uin Saikuti chu a sawm ta ngei a. A lo vuak hrep an hlauh avangin Saikuti chu a tel ve an phal ta lo va, mahse a kal ve ta tho va. An inah chuan sa leh zu chu an lo chen dur dur mai a, luhka a luh pah chuan:

Tualah nghal chhawl a zingtu run emaw,

Satin kap dai sakhmingthang hlei chhung kan ni,

tiin a zai lut a, a nuṭapa chu a hmin ta em em mai a, Saikuti kha nopui pe rawh u a ti ta nghal a. Heta ṭang hian a nuṭapa pawhin a ngaina ta em em a ni.

Heng aṭang hian thu aiin hlain hna a thawk chak zawk tih a lang. Pathian meuh pawh hi ṭawngṭaina leh hlaa zawl thluk theih a ni ve bawk a, Baibul ah pawh a thil tum a ṭhulh leh tak thu kan hmuh hi.

Simin ka lo kal e aw Lalpa,

Ka sualna ngaidam rawh, ti tak taktuten Lalpa zahngaihna an zawl thlu nge nge ṭhin.

- Rev. Siamhnuna, (Presbyterian)