Chief Minister intilal lo!

Mizote’n Chief Minister leh minister, MLA-te hi 'Intilal tak leh chungnung chungchuang' anga kan ngaih ṭhin dan fel lo a awm a! Ṭawngkam fuh tâwk lo kan hman pawh a awm. 'Thlan lal' kan ti teh tlat a! Lal (king & queen) ni tura kan thlan a ni lo tih kan hriat fuh a pawimawh. Kan aiawha roreltu leh dan siamtu tur (legislator)-te an ni.

'Sorkar' tih chu 'Mipui' tihna a ni mai a. Nimahsela, tun hma lam aṭanga rualû zawkte’n an sawi dan a dik loh laklawh avangin, 'Mahni thu chauh hmanga roreltu' (dictator) emaw kan ti a nih loh pawhin, chutiang tiat chuan kan hmu tlat ṭhin. Anmahniah hian kan tel ve (participate) a ni tih kan theihnghilh loh a pawimawh bawk. Mipui laka han inlawkleu vel tur leh induh viau tur an ni lo tih kan hriat a ṭul a, 'An tih chu kan tih a ni' tih kan hriat a ngai.

Mihringin mizia kan nei hrang angin, a ṭhen chu biak huphurhawm angreng tak, a ṭhen chu biak nuam, a ṭhen chu ṭawng tlem leh ṭawng duh deuhte pawh an awm ve bawk ang a. Venhimna lam (security) chungchangah te, a hun bi-châ taka thil tih an ngaih avangin lirthei ṭha leh changkang bika thuam an ngai a, chu chuan 'mipui rawngbawl' an nih a entir.

Chief Minister a nih lai, kum 1996 daih tawh khan Pu Lal Thanhawla hi sorkar thil pawimawh buaipuia Bombay Airport-ah thlawhna aṭanga a chhuk chiah kha vengtute’n zah takin an lo dawngsawng khup a. Pu Hawla chuan, "Bombay-ah leh zel... a va hahthlak ve," a ti. Chu chuan a entir chu, venhimna rip tak kara khawsak rengte hi an ning ve a ni tih a hriat theih. Mahse, sorkar inmikhual dan (protocol)-ah a ngai tlat si a ni.

Chief Minister a nih tawh loh hnu khan Delhi Mizoram House-ah Pu Hawla te nupa chu an innghah fel vek tawh hnuah hmun danga insawn turin an ti teh tlat a! A tlâwmthlâk hle. Sorkar hotute lal dan indawt kan tih mai 'Order of Precedence' a awm a. Tah chuan Ex CM-te hi cabinet minister ni lai aiin an la chungnung a. Chuti chunga Mizoram House aṭanga chhuahtir an ni ta mai kha, a nihna an hriat loh luat vang a nih a rinawm.

Pu Hawla te nupa hi hriselna lam ngai pawimawh, ei leh in thu-ah pawh buh (rice) chu an in lama ei ngai meuh lo, thlai lam (vegetable) hlang deuh chauh ei ṭhin an ni a. Nimahsela, thingtlang an zin chhuah changin khaw pakhata an ei siam, an ei zo chauh kha, a piah leh khuaah an lo buatsaih leh si a; î-hê loin a ei phei ve mai zel an ti.

Chief minister hlui Pu Zoramthanga pawh hian CM a nih lai khan Aizawl aṭanga khaw hnaivai deuh leh thingtlang lama a zin dawnin CM behbawm lirthei paruk velin a zui duah ṭhin kha hnawk a ti ru ṭhin hle niin an sawi a. "Ngawi rû, nangni chu lo kal lo mai teh u," tih châng a ngah hle a ni, an ti.

CM a nih tawh loh hnu kum 2012 khan Pu Zorama hi Lunglei Circuit House VIP Room-a a innghat fel vek tawh chu room dangah insawn tura hrilh leh a ni a. “Nia maw le, khawiah pawh ka mu thei e,” tiin, a Bag nen a inkhai chhuak ve leh mai bawk. A nihna takah chuan a room lo luah tawh chu Mizoram Governor emaw, Chief Minister ni lai emaw, Assembly Speaker-te chauhin an luanlân thei. Lunglei High Power Committee Chairman (MLA)-te'na an chhuh theih a ni lo! Pu Rama hi a zâwna kum 10 chhûng CM a nih lai khan zan lamah a khawharin ṭhutthlengsei ban lukhama TV en ve mai a chîng a, ring nâ (spondylities) a neih phah a ni awm e.

Pu Zoramthanga hi mi dang tirh kawngah leh thil tihsak tura kawh kawi mai aiin, mahnia tih ve mai tum chi a ni a. Chief Minister kum 1998-2008 leh 2018-2023 a nih chhung pawh khan CMO, ama pisaah dawhkán hrûk fai, electric power line fel lo siam leh bulb fuse thlâk ngai ang te, purdah (puanzár), chhuat phiah, hmunhma hnawk hâwl faite hi amah hian a ti leh mai ṭhin a; a staff-te mak tih pawh a hlawh fo an ti.

Hnam dang chief minister ngaihsânawm tak pakhat chu Punjab CM hlui Surjit Singh kha a ni. Tamil Nadu, Uttarakhand, Andhra Pradesh leh Andaman and Nicober Inslands-ahte Governor leh union minister chhuanawm tak a lo ni tawh bawk a. Venhimna nena hual khup reng mai kha a ning ve hle ṭhin.

A nupui leh amah vengtute zawng zawng pawh thlimin zanlaiah inchei danglamin a chhuak ru a. Chandigarh aṭangin truck-ah chuangin Delhi a pan a, Lucknow lam thlengin, hmun kilkhawrah, leilet thlâm kawta hruia siam khum (charpoy)-ahte a riak a, mimir dinhmun hriat a duh vang a ni.

A chang leh an man a, police constable-te’n an vîn hrep a, lung inah an khung titih thul. A mangang ve ta deuh chuan khatih lai UP chief minister Mulayam Singh Yadav chu biak a duh thu a sawi ta a. Anni chuan, "Nang tehlul hian kan CM i be lo ang e. Anite chu pathian tluk lai a sin. I â a nih hi," an ti a. Surjit Singh chuan mi narân dinhmun chu a hre chiang ta kher mai. Hlawhtling inti takin a haw ta a! Chuta ṭanga a zir chhuah chu lehkhabuah a ziak ta a, 'Story of an escape' tih chu a ngainawmin hralh a tla tak zet a ni.

MNF sorkar hmasa, kum 1998-a a rawn ding phat pawh kha, minister pakhat thingtlanga a nu, Mizo nu mâwlmang ve tak mai chu police-in a fapa chu an veng tih an han hrilh a, "Awi, ka fapa chu, chuti fahrana vên ngai khawpin a nun a râlṭi a ni maw?” tiin, a ṭahpui lo chauh a ni awm e!

Chief minister leh minister dangte hi a ṭulna vang zawka venhimna pek an ni tih hre lo a, 'intilal' emaw ti tlat kan awm a. 'Lal emaw inti' chu an lo awm mial thei a. Mahse, an nihnain a ken tel zawk a ni tih kan hriatpui fo a pawimawh.

- Zobiakvela (Masena)