Mimal Nun & Khawtlang nun tihdamna

India ram lailum zawka kut dawh naupangte khu ṭhenkhat chuan lainat takin sum fai hmangin an ṭanpui a, mahse mithiamte chuan kutdawh hmanga eizawnna (beggary) zawk tih bo a nih hma chuan kut dawn naupangte retheihna chu chin fel a ni dawn lo a ni tiin an sawi.

India ram Prime Minister atana Narendra Modi thlan a nih rual khan tunhma kum naupang te a nih laia nupui a lo neih dan te, a nupui a kalsan dan te nasa taka tarlan a ni. Mahse, mithiamte chuan Narendra Modi-a thiam loh ni lovin India rama ‘naupang inneih dan’ (Child Marriage) zawk chu dem tur a ni tiin an sawi thung.

A tawi zawngin khawtlang nuna harsatna ching fel tur chuan a siper buaipui mai lovin a hnukpui hmachhawn a ngai ṭhin.

Tun hnaiah Mizoram chhunga zirlai result a chhuak thar a, chumi rual chiah chuan school ṭha leh ṭha lo nia kan hriatte nasa takin kan khel thar bawk.

Zirlai - nu leh pa aṭanga mi thiam, ei leh bara mi ngel nghet, hun thawl nei, tuition kai phak leh zirna environment nei ṭhate leh zirlai - nu leh pa lehkha thiam lo, hnathawk chunga zirte chu inelna dawhsan pakhatah an inel ta a, hei hi tehkhawng dik a ni thei ang em?

Hna an thawh tak tak hunah erawh chuan hna thawk ṭha leh ṭha lo te, mahni awmna tura awm lo te, rinawm leh rinawm lo te, thiam thei nun inthlahdah si te, mi tumruh rethei si te an awm nuai ang.

Hetianga zirlai chi hnihten School/ College kawngkhar an rawn kik mek lai hian kan dinhmuna a siper lai (Board Exam result, school larna, adt) ringawt thlir lovin kan ram pumpui kan thlir nawn a ṭha ang.

Tin, zirna ṭha thingtlang zirlaite thleng phak neih kan duh chuan kan zirna kalphungah hian ‘thingtlang quota’ a awm tur a ni bawk ang.

- Lalramnunpuii Punte