BAWLHHLAWH PAIH
Kar khat liam ta maia nawrh huaihawt vanga bawlhhlawh paih motor tlan tak loh vang te, tunlaia kawng chhia avanga bawlhhlawh paih motor-in paihna hmun ngai a thlen chhoh theih loh vang tea veng ṭhenkhata "Kan remchan dan ang zela paih mai ni se" tia au awm hi enge a awmzia ni ang?
Prime Minister meuhin Swash Bharat Programme a kalpui a, chumi hmain AMC lam aṭangin bawlhhlawh bawm hial te semin faina chungchanga hmalakna a kal mek laia hetiang thawm lo ri hi a va mawi lo em!
Sawi ang khian nawrh vangin bawlh-hlawh paih motor a kal mumal loh hnuah kawng an chhe zui leh a. Mahse ka tih ṭalh duh; "Khawnge kan remchanna hmunah chuan kan paih tâk ang?" tih hi a ni. "Hmana kan duh duhna hmuna kan paih ang khan i paih leh rih lawk mai ang u" tih ang vel chauh niin kei ka hria!
Kawng a ping a nih pawhin bawlhhlawh motor chuan a dân pangngaiin bawlh-hlawh chu rawn khawn leh mai se, khawi hmunah emaw Sorkar hian lo dah khawm-na tur ruahman mai se, kawng a tlang veleh a hrana phurh leh mai turah ka lo ngai a, a harsa viau nge ni ka hre lo!
Mipuiin kan remchan dan anga kan paih a nih chuan, kar hnih deuhthaw kan khawl tawh bawlhhlawh chuan "Tui Luankawr" bawk a pan leh dul dul ang a, ṭawih thei leh thei lo nen a ṭial leh nuai ang a, chhiatna thleng theitu pawh a ni a, hmuh a nuam viauin a rinawm lo. Harsatna lo thleng ta thuta invenna hi kan nei lo a ang riauin a hriat.
Kar khata bawlh-hlawh paih motor vawi hnih lokal pawh duh khawp lo lek lek an awm laia kar hnih deuhthaw kan khawl khawm kan remchan dan anga mipuiin kan paih burh chuan, ṭawp chiah kan hmabak!
Sorkar hian fai hi a duh tak tak lo em ni le? Bawlhhlawh paih motor kan rin aṭanga faina lam kan pan ve bek bek zel leh, mipui tam zawkin kan ngaih pawimawh tak tawh hnu a, thawnthu hluia min let pui leh tum awm ang ziazanga he thu a ri hi chu a fu lo.
Sorkar hian policy ṭha tak duanga bawlh-hlawh paih motor veng tina kar khata vawi hnih tlan tura a rel rual hian, eng emaw rokhawlhna lian tham fe a nih loh chuan inven lawkna ruahmanna chu neih awm tak a nia. Thil dangah pawh ruahmanna kan nei
ṭha lo fo; i ngaihtuah chiang teh ang u.
- Rs Zuala Renthlei