Sava I Vawm Tur A Ni Lo

Mizoram hi a reh ta tlawk tlawk mai le. In lamah chuan mihring thâwm te, motor thâwm te, mobile ri te, TV rite chu nilenga kan ri hriatte chu an ni mai a. Chungte chu kum lama upate, lungleng mite leh damlote tan a khamawm em em a ni.

Nova hun laiin tui a let dawn khan LALPA chuan nungchate chu an rêm mai loh nan Nova kha lawngah a hruai luhtir vek a nih kha. Nungcha leh mihringte hi awm ho tur leh siamtu fak ho tura dinte kan ni a. Siamtu hmaah chuan kan lan mawi dan te, kan hlut dan te, rimawi hmanga amah kan fak dante a inang lo ṭheuh a ni.

Mihring thil siam mawina leh ṭhatna te, thil siam thâwm ri leh mihringte thâwm ri hmanga inawm tlei kan tumnate chu ninawm mai an lo chang zo ta.

Sava rawng mawi tak tak te, an pian zia danglam leh nalh tak takte chu hmuh tur an awm pha tawh lo va. An hrâm ri mawi leh ri danglam tak takte pawh hriat phak an ni ta lo. An aw mawi tak tak te, an rawng nalh tak takte chuan hringnun hi a tihlim ṭhin a. An tel lo chuan hringnun a khua a har a, savate pawh mihringte bula an awmin, an aw te, an lan mawinate an entir bawk ṭhin.

Savate chuan anmahni tina theitute lakah inhumhim nan mihringte bulah an lo awm ṭhin a. Savate hian thing zar pakhat pawh an titliak ve lo. An âwm a nêmin an nun a nêm em em a; zing aṭangin siamtu kutchhuak ropuizia nilengin an fak ṭhin.

Chutiang ang khawpa zaidam leh nunnêmin siamtu chu an fak mawlh mawlh laiin, keini'n ke zungpui tiat lek pawh an sa eiah kan ît a, kan tihlum zel mai hi a pawi em em a; in bul leh daiah sava hmuh tur an awm ta lo.

Sava ṭhenkhat chuan kan thlai ei chhetu rannungte chu chaw atan an lo ei zo zel a. An chaw ei an êk chhuah aṭangin thing a lo ṭiak leh a, chungte chuan ramngaw an lo siam leh ṭhin a ni. Hengte aṭang ringawt pawh hian savate hi mihring tan an hlu em em a ni tih kan hre thei ang.

Khawiah ṭuan che u maw?

Sirva lengho zawngte,

Riahrun rem leh turin,

Lam ang lo let u la,

Zoram nuam i din thar leh ang u.

- H Neihchungnunga, Durtlang