Missionary ni tura kohte tan
Zofate hian Chanchin Ṭha hril hi nuam kan ti a, Chanchin Ṭha hril tura koh nia inhria pawh kan tam. Missionary tur lak a nih apiangin Kohhranho leh Para-church-te’n lak sen loh ṭhalai rual an la hmu zel a ni.
Nikum October thla khan thingtlang nula ka hmelhriat nen Aizawl Bazar-ah kan inhmu a, “enge i rawn tih?” tiin ka zawt a, a ni chuan Missionary turin ka rawn Interview-a tiin min chhang a. Kei chuan, “an la che em?” tiin ka zawt a. A ni chuan nui var var chungin, “Ṭum 3 ka dilna a ni ta a, min la la chuang lo,” tiin min chhang a ni.
Kan in chibaina kut kan la vawn reng lai chuan, “Kum-3 chhung vel chuan lo inbuatsaihna i nei em?” tiin ka zawt leh ta a. A ni chuan, “inbuatsaih lo, inbuatsaih ngaihna pawh ka hre hlei nem,” tiin min chhang ta a. Ka ngaihtuahna a kal thui ta hle a ni.
Missionary tura koh nia inhria mi engemaw zat Mizoramah hian kan awm ngei hmel a, chung mite tan, an lo inbuatsaih vena tur kan sawi chhuah chu a ṭul mang e tiin ka ngaihtuah ta a, mithiam zawkte’n ṭul an tih leh kimchang zawkin an la rawn ziah chhunzawm ang chu.
1. Ṭawng Zir : India rama rawngbawl tur chuan Hindi thiam a pawimawh. Aizawl-ah hian Bawngkawnah Hindi Bible School-a awm a, Hindi chhiar thiamte tan chuan pan ngei chi niin ka hria. Hei hi a lo remchang lo a nih pawhin Hindi zirna hmun ‘Spoken Hindi’ hmun hmun engemaw zat awm tawhah hian Hindi engemaw chen lo thiam sa turin lo inzir hi ṭha dawn hle in ka hria. Hei hi kan la ti pha lo fo a nih pawhin Hindi ziak leh chhiar thiam turin mahni hmunah M.S. Evangelist, Hindi zirtirtu leh Sipai bang remchangte rawnin hmalak nachang hre ta ila, a va ṭha dawn em! Tin, mahni Kohhran leh venga hnamdangte zinga rawngbawlna (M.S / Non-Mizo Fellowship) ah te theihtawp chhuaha tel nachang hria ila, inbuatsaihna ṭha tak a ni ngei bawk ang.
2. Pathian Thuzir: Bible thu hrim hrim hriat hi a pawimawh hle. Missionary tura koh nia inhria chuan a tam thei ang ber Bible chhiar a, chang tam tak vawn tum tur a ni. Tin, B.Th/ B.D/ B.Miss han ni ve kher lote tan pawh C.Th te lo zir nachang hria ila, Pathian thu hriatna leh Kohhran chanchin hriatnaah min pui nasa dawn a ni. C.Th zirna hi ka hriat ve chinah Mission Veng-ah PBS te, Sihphir Neihbawih-ah DTI-te a awm a ni.
3. Ṭawngṭai: Missionary tura koh chuan ṭawngṭaina nena nasa taka inbuatsaih nachang a hre tur a ni bawk.
4. Kohhran Kalphung zir: Kohhran hian kalphung leh kal dan, tih ṭhin dan leh chin dan tam tak ziak leh ziak lohte a nei a, heng zawng zawng hi hriat kim sen chu a ni vek lo ang; amaherawh chu, mahni chauha awm hun pawha buai lutuk lo leh kalhmang hre lo lutuk nih loh nan, hetiang lam hawi lehkhabute a tam thei ang lo chhiar a ṭha a. Pastor leh Upate rawn nachang hriat hi a pawimawh khawp ang.
5. Thusawi: Rawngbawlna hi peng hrang hrang awm mahse, a ki pui pakhat chu thusawi hi a ni. Missionary chuan mite hmaah thu a la sawi fo dawn avangin hemi atan hian Pathian hmaa
ṭawngṭaia lo inbuatsaih lawk a ṭha hle ang. Tin, lawmna/ lungngaihna/ damlohna/ thihna hmuna chhiar mai tur Bible chang engemaw zat lo chhinchhiah lawk nachangte pawh hriat a ṭha.
6. Medical: Nurse leh Health Worker lam hna hi ma-mawhna a san avangin heti lama lo inbuatsaih pawh a
ṭha ang.
Missionary ni tura kohna dawng an awm a nih chuan Kohhran/ Hmeichhia/ Ṭhalai Committee-te pawn bengvar chhuah ila. An inbuatsaihna turah hian fuihna leh ṭawng-
ṭaina bakah sum leh pai thleng pawhin insenso huam ila, Pathian leh Kohhran tan a va hlawk dawn em!
- Denghmingthanga, Kulikawn