Kan kher te mah mah lo maw?
Patling ve meuhin mahni hming ziak langin "Inkhawmpuiah chhang an sem man to lutuk" tih vel mai mai an khel a, chu chu kan chanchinbu lian berin ṭha takin a lo chhuah zel a. Kan thil khel hi a tenauin kan chanchinbute thu chhuah duh zawng pawh hi a holam ta lutuk lo maw?
Keia ngaihdan chuan ram pum huap chanchinbu kan neih chhun anga ngaih theih Vanglaini meuhah hi chuan mithiam leh chal tlangte thuziak a nih loh pawhin lehkha ziak mi leh thil hre deuhten ram leh hnam nghawng thei thil an chai turah ka ngai. "Kan Bial Inkhawmpui chhang man a to lutuk, ruaiṭhehna senso nen phei chuan nuai tam tak a ni," tihte an rawn ziak a, heng hi chu an vei a nih chuan mahni lawina kohhran chanchinbu lamah ziak se, a effective zawkin ka ring.
Keia vei ve hi chu Aizawl khawpui kawngpui kan nek leh nasa tawh leh kan duh anga sanga in kan sa leh mai mai tawh hi a ni. Kawngpui nek rana in sak thar leh a ṭhente chu kea kalna footpath tichhe ngam ngatte an awm ta a, heng in sak tharte hi kan Aizawl Municipal Corporation hian an vil thei lo a nih chuan Municipal Corporation neih hi eng nge maw a ṭulna awm le?
In sak san zawngte leh in sak theihna chinte pawh bithiah a ni a, chutiang chuan tun hma deuh khan Aizawl Development Authority khan nasa takin ṭan an la a, in
ṭhenkhat chu an stay a, chhut chhiatte pawh kha an nei hman hialin ka hriaa ka hriatreng dan hi a dik chuan.
Tunah hi chuan veng tam takah buil-ding lian leh sang tak tak an sa leh tawh a, hengte hi lirnghing leh khaw chhiat changa
ṭhenawmte mut titui lo tu an ni si a, hei hi AMC hian an ngaimawh lo em ni?
Keia ngaihdanah chuan kan khawpui hi a tawt tawh a, mipui leh lirthei a pung zel a,a tawt belh zel dawn a, khawpui sawnna tur hmunhma a awm chuang zi lova, tuna a nih ang anga khuahkhirhna ṭha nena in sak dan vila parking ṭha siam bawk chuan enkawl ṭhat theihah ka ngai a, tunah hi chuan enkawltu nei lo khawpui a ang berin ka hria a, kan Municipal Corporation thawm kan hriat ṭhin kha chu, "Chu chu an sorkar leh tawh zawk," tia musical chair vel mai mai kha a ni a, tuna AMC thar lah hian 'chhiah an lak belh' tih bak sawi tur an la nei mang bawk si lova, Aizawl khawpui vil hna hi uluk takin thawk se, a bak thawk lo mahse kei chuan kan ṭhatpui zawkah ka ngai a ni.
- Lalmuanpuia