Mi pakhat

Duthusam ang tak a, mipui nawlpui ṭhat tlan dual hi a harsain a theih loh tluk a ni. Khawi ram leh hnam mah hian an tlin bik lo va, hnam khat ve reng ruangah chuan a tuithawl ak nawi pawl leh ze nawi tawk nei kan awm ve lo thei lo va. Chuti chung si chuan ngati nge ram ṭhen khat hian entawn leh enrawn an hlawk bik a, awhawm taka an ram leh hnam an dinchanpui theih bik ni ta ang.

Tun dinhmuna ram ropui leh kan entawn te chanchin hi ngun takin thlir let ta ila, hnamin hun pawimawh, harsa leh khirh an tawh lai takin, ‘Mi pakhat’ thuthlukna dik siam tur te, mahni leh pawl bil ṭanghma hai lam ni lova, ram leh hnam tana ṭha ber tur lam hawipui ngam an lo neih bik vang a ni

.

Mi ṭhen khat kan zawng thal vah mai mai lai hian rorelna in sangah chuan ram leh hnam khawih thil pawimawh tak tak rel a ni ṭhin. Chung hunah tak chuan kan chung en leh ringam mi dik, huaisen, ngaihtuahna fing leh  fim tak hmanga ram mipui tana nghet taka ding ngam tur kan mamawh ṭhin. Chutiang mi pakhat lek chuan mipui ai a awhzo va, hnam thinlung thlengin a chawrno thar tir thei a ni. 

Kan ram chhunga awm duh si lo, Tripura Transit Camp aṭanga vote rawn thlak ṭhin tuikukte kawmawh bawl ninawm zia te, kan buaina zakhua a nihzia te kan hre vek a. Kum 2013 MLA inthlanpui vuakvetah pawh khan November thlain MSU leh zirlai ṭhen khat ten Langkaih leiah Banner tar meuhin an lo dang tawh a, khati hun lai CEC VS Samath lim pawh hal hial a nih kha. Mahse West Phaileng lamah an hel tak avang leh security an thawh rip em avangin dan theih an ni ta lo a nih kha. Khang hun lai khan mipui nawlpui kan che chhuak lem lo va, kan ral khat thuthar bengkhawn mai chauh a ni.

Kum 2018 inthlanpui kan hmachhawn mek laiin Mizo hnam tan mi pakhat a lo lang nawlh a. Chu mi pakhat vang chuan thinlung hmun khatin hnam chhan duhna meipui chuan min kang ta hluah hluah mai a ni! A hun takah CEO pawh ni se, a hnial ngam a, hnam tluang hrui nghet taka vuan chungin a dinna ngaia a din tlat avangin Mizoram pawnah sawn chhuahin a awm a. Chu thu a darh meuh chuan a hnampuite thinlung hi fuih pawrh chawp ngai lovin, hawina lam apiangah Lalnunmawia Chuaungo, Principal Secretary thlavang hauhna leh a taka chet chhuah­na kan hmu a, chu chuan hnam rilru nasa takin a chawk tho nghal bawk a ni. 

Khati zat Mizo mipui kan thawhchhuah a, sahaw leh haw haw tel miah lo. A remchan dan ang zela urhsun taka kan pun khawm kha a thleng khat khawp. Rokunga ro min hnutchhiah. “Aw nang Kan Lal Kan Pathian’ kan sak meuh chuan ram leh hnam chhan duhna hnukno kaithoin ṭhen khat mittui pawh a far hial a nih kha.

Chu tah chuan a la tawp mai lova, thu delhkilh hriam tak siamin, mipuiin kan thlawp tluantling hle bawk a. Chumi kal zelah chuan ni 16 January, 2020 Ningani tlai lamah Tripura Transit Camp 6-a awm te an awmnaa awm hlenna tur kan Chief Minister leh Tripura Chief Minister ten Ministry of Home Affairs hriatpuinain inremna an ziak fel ta a ni. Mi pakhat a hun taka che ngam, kan ngaihsan rawn ni bawk vangin inthlan dawn apianga kan buaina tawh ṭhin thaw khat chu a veng ta! Kan zo fel erawh a la ni chuang lo. 

Kan tlangval huaisen hi awm ta lo se tun dinhmun hi kan thleng kher ang em? Mi tlem tein khawhar takin Tuikuk ram dang aṭanga Vote rawn thlak tum an dang leh ang a, a ngai te bawkin kan la kal leh let let ngei mahna. Mi pakhat thil tih hian nghawng a nei lian a, ram mipuite pawh thu khat vuain min kai harh ṭhin a ni. 

Ni 21 January, 2020 Thawh­lehni Parliamentary Stan­ding Committee on Home Affairs Meeting neih ṭum khan kan Hero bawk hi a hun takah a che leh a, phung velh ang maia Chakma Foreigner an pun chak zia leh thuneihna sang zawk an mamawh rih lo zia huai takin a sawi leh hmiah mai a ni. A hun taka mi pakhat thil tih hian kan tan thui takin kawng a sat eng nasa ṭhin asin. 

Kan hnam hi Sazu mei anga a zuih ral mai loh nan ‘Mi pakhat’ nih tling, mi dang lo pian belh zel se kan va ti em!