Lawless society
MNF kha term hnih an lal a, an lal tawp lam kha han thlir kir ila, Mizoramah khan dan lekkawh ngam ka hmu lo. A hman hman an nuar a, lungawi lohna lantir kha kan lungawi tlanna ber emaw tih tur a ni. A lal tur an lal ngam lova, a thu ber pawh a ngawi tlat a, inthlan awm tur thlir avangin lungawi lo an do ngam lova, Mizoramah khan roreltu an awm lo.
Congress an sor-kar a, thil dangah kei chuan danglamna ka hmu tehchiam lova, danglamna ka hmuh chu nuar an hmachhawn ngam
ṭhin tih hi a ni. Keini kan la naupang deuh a, hemi kawngah hian Brig Ṭhenphunga Sailo kha a hre phakte chuan an fak a, ani kha chuan sorkar a dah pawimawh a, huaisen takin sorkar dotute a do ngam an ti. MNF khan mi zawng zawng tihlawm (please all) an tum a, a tawpah mi zawng zawng vote an hloh phah ta tho a nih kha.
Commercial vehicle neitute an nuar a, Chief Minister Pu Hawla'n an permit cancel mai tur a ti ngam kha a ṭha ka ti. Hetianga thu ka ziah avang hian Congress ka ni lo tih ka sawi chiang duh bawk. Pu Hawla khan sorkar dinhmun a hria a, an tawlh thei tawh lo a nih chuan intihlungawi tum mai mai hi thil ṭul lo a ni. Lirthei neitute thil phut kha, "Kan lo sawiho ang e..." tih zel tur a ni tawh lova, an nawrh chuan permit cancel-a a thar pek mai kha ka thlawp zawng tak a ni.
Sorkar ber zuam-awma a lan tawh chuan sorkar nawr hi chu Mizo mipuite thiam zawng tak a ni. Mahni ṭanghma
ṭheuh hai tuma heti zat pawl din thei Mizote tan sorkar nawr hi thil harsa a ni miah lo. Sorkar hi nawr kal theih loh, dinna mumal tak nei, tum mumal tak nei a nih chuan kan zuam lo vang. Sorkar hi zuam-awma a lan chuan kan zuam zel ang.
Duh duh nawrh theihna, hlauh tur awm lohna, duh dan dana tâl theihna ram, thuneituin thu a neih ngam lohna ram - lawless society-ah Mizoram hi kan awm zawk tawh a, awm nawn leh tawh lo ang u. Sorkar khauh deuh, huaisen deuh, tâwn mai mai harsa neih a hun ve tawh. Mipui hian vote pawh kan vote duh zawk ka ring.
Thuneitu chuan thu nei ngam se. Mi zawng zawng tihlawm tumna hi ram rorelnaa thil ṭha lo tak a ni. Nuarte zalenna leh nuar apiang thu ber an nihna ramah Mizoram hi chang tawh suh se. Lawless society nih nawm hi a ṭha lo.
- LT Mawia, Mission Vengthlang