Haemophilia – Natna Ṭihbaiawm
Mizo ṭawngin a tlukpui a awm ka hre lo a, thisen khal thei lo natna a ni mai e. Haemophilia natna hi a mak hle a, a veite hi an intih pilh emaw, an thisen a chhuah hlekin a tâwp thei mai tawh lo ṭhin.
Ha hni thi ringawt pawh chhiatpui tham a tling a, taksa tih pem emaw, pilh pawh thil hlauhawm leh ṭihbaiawm tak a tling zel mai. He natna dangdai tak mai hian Mizoram pawh a tuam ve mek a, a vei hmuh chhuah mi 26 an tling tawh.
Society a awm:
May 30, 2024 khan sawmna ka dawn bawhzuiin Civil Hospital, Aizawl Conference Hall-ah ka kal ve a. Hetah hian Haemophilia Society, Aizawl Chapter leh INTAS Foundation, Zemabawk ten damdawi an sem a ni.
A natna hi damna damdawi awm lo mah se, thisen chhuak reh thei lo han tihtâwp lailâwkna tur damdawi erawh a awm a, a to viau. Mahse, INTAS Foundation hmalakna zarah a thlâwnin an sem a, damlo pakhatin Rs 12,000 hû an dawng. Thisen a chhuah chuan damdawi hi taksaah an chiu lut a, chu chuan thi pût reh thei lo tur a titâng ve thei. Hei chauh hi an innghahna a ni mai awm asin!
Haemophilia Society, Aizawl Chapter hi a la lian lo a, ṭhang lian zel tura beisei a ni. India ram state tinah society lian pui pui a ding a, sorkar laipui beng an thleng pha. He natna nei hi chuan society hi be pawp se la, damdawi pawh a thlawna hmuh theih dan an dapsak ṭhin. A hautak em a, inpuih tawn a ngai a ni.
Mi 26 chauh maw:
Tuna record-ah chuan Mizoramah Haemophilia natna vei mi 26 anga chhin chhiah a ni; mahse, hei ai hian an tam tih hriat a ni tawh thung. Mumal taka a natna nei zat hriat a pawimawh hle mai.
India sorkar chuan he natna neite hi rualbanlo (disable) zingah a telh tawh nghe nghe. Heti a nih chuan inpuih tawnnaah thil a awlsam zawk nan natna nei nia rinhlelh hrim hrimte chu society hnenah hriattir zung zung a ngai a ni.
May 30, 2024-a programme kan hman hi news lamah ka pe hlawm a, local cable TV-te'n an tichhuak hlawm a, lawmthu kan sawi ni se la. Hemi hnu hian society a awm tih miin an hre ta chauh a, society-a inhmang ka ṭhianpa chu an be pawp nasa ta hle nghe nghe.
Inhriat tawn loh vanga mamawhte an lo inbe thei lo hi a pawi hle mai a, a damdawi mamawh ngawih ngawihte tan inbiakpawh a pawimawh lutuk. Society-a biakpawh theih awm ber, a mawngzâng ber zinga mi Mapuia number 9862357462-ah biakpawh mai tur a ni.
Mak deuh mai chu, Haemophilia natna kengtu hi hmeichhia an ni châwk a, anmahni chuan an vei miah lo a, an fate'n an vei zel thung a ni.
- Zoa Tlau