Domestic worker-te pawimawhna hriat a ṭul
Khawvel puma awmpui hna thawktute ni, International Domestic Workers Day - June ni 16 pualin chibai u le. Khawvel hmasawnnain a ken tel, mahni in lum chhuahsana hnathawk kan tam tial tial a, kan hnathawhnain a zir vang nge, a zir loh vang zawk, kan in chhung min enkawl felfaisak turin puitu kan mamawhna a sang ta. In chhung sekrek khawih turin mi dang kan rawih a lo ngai ta ṭhin a ni. Hetah hian hnathawh tur leh eizawnna mamawh avangin mi tam takte'n mahni in lum chhuahsanin hmun dang ram dang kan pan nasa ta hle mai. Amaherawhchu, domestic worker/housemaid-te humhimna dan hi a ṭha lo em em a - kut tuar, rilṭama awmtir, hah lutuk vanga dam lohna tawk bakah, pawngsual leh thahte thlenga tuar an lo awm tawh ṭhin. India ram aṭanga hmun danga hnathawk tura kalte bakah, ram chhungah ngei pawh harsatna tawk an awm tawh a ni.
State leh dan lamah hnathawka chhawrtu leh a chhawrte inkar harsatna sutkian hi a tlem em em a, NGO hrang hrang leh kohhran ang zawng pawha hmalakna awm thei se a ṭha khawp ang. Heng min puitu tura kan rawihte hi chhungkaw châwmtu, harsatna tawk thei, damlo thei leh hah thei, a chhawrtute ang bawka mihring an ni a; inhriatthiam tawnna leh inzah tawnna nen a kan inchhawr a pawimawh.
Domestic worker hna hi chi hrang hrang a awm a:
(i) Hun puma thawk: Ina awm chilh a, a ṭul ṭul thawk
(ii) Lâng kal: Ni tin an hnathawhna hmuna kal ṭhin emaw, darkar bia kal.
(iii) Tih tur nei bik: Ina awm chilh emaw, lâng kalah emaw, tih tur nei bik, entirna'n - in chhung enkawl leh insûk, nau awm tur bik, tar leh upa enkawl tur bik leh a dangte.
Mizoram ah domestic worker-te tan agency felfai tak, in register-na sawrkarin a siamsak leh an thawh tur azir te, tawnhriat an neih tawh azirtea an hlawh pawh uluk taka duan bakah, health insurance leh life insurance-te siamsak a ṭul tak zet. Labour, Employment Skill Development and Entrepreneurship Department hnuaiah training-na mumal awm se, an thiamna azirin skill leh unskill certificate pek theih ni se a ṭha khawp ang. Agency mumal ni lo, mahni sumdawnna atan mi ṭhenkhatte'n commission sang tak tak lain mi ina awm tur leh awm duhte an lo be kual ṭhin a, hei hi sawrkar hian tihtawp emaw, dan hnuaiah in register tura hriattir ni se, a chhawrtu tur leh a thawktu turte himna atan a pawimawh. Danin naupang kum tling lo chhawr a khap tlat a, tun hnaiah kum tling lo ram danga tirh te, mahni in chhunga hlawh hniam zawka lo inchhawr tawk hmuh tur leh hriat tur a awm leh ṭhin; dan mumal taka siam a ṭulzia a tilang chiang em em a ni.
Hetiang lam ah hian Ferrando Integrated Women Development Centre Peace Home hnuaia project pakhat, Ferrando Domestic Workers Alliance (FDWA) New Hope, Bawngkawn hian hma an la nasa a, Guwahati leh Aizawlah mi eng emaw zat training neihtirin, hnathawhna mumal tak an lo siamsak tawh ṭhin. An hnuaiah hian Aizawl veng hrang hrangah branch din niin, member-te'n hna an thawk ṭhin a, Covid lai pawh khan FDWA hian domestic worker-te hi ei leh barah ṭanpuina ṭhahnem tak an lo pe tawh bawk.
An tel loa kan awm theih tawh loh, chhungkaw eizawngtu/châwmtu ni bawk domestic worker-te hi an dikna chanvo humhalh leh an mawhphurhna pawimawh tak hi kan ngaih pawimawh a hun tawh tak zet zet a ni.
- Duhawmi Chawngthu