Amc Hotute U, Ziaawm Teh U
Chanmari, Aizawla Agape Multispeciality Hospital chu AMC-in a phalsak chin aia sanga sak a nih avangin AMC hotute'n December 5, 2022 khan langsar tak leh mualphothlak takin an kalhsak a. AMC hi dan zâwm lote chungah khawng takin an kal ṭhak ṭhak dawn nia ngaiin kan lo lawm ve em em a. Mahse, AMC-in an kalhsak chhan kha chhut chhiat awm chuang loin, tunah chuan damdawi in a kal mawp mawp mek. Mi ṭhenkhat phei chuan an sak belh leh tawh niin an sawi nghe nghe. Heti leh mai mai tur si, ngati nge mualpho taka an kalhsak kher?
Bawngkawn-Leitan leh Chanmari-Chaltlang kawng hi chhak lam leh thlang lam khâm a ni a, eng emaw chen hi protected area-ah a ni; in sak phal a ni lo a, phalna neia in sak a nih pawhin kawng aṭanga a hlat dan tur chin bithliah a ni.
Bawngkawn Haflong chhak deuh aṭanga Leitan thlenga protected area puan hnu leh protected area-in a huam chinah hian in sak a awm nual tawh. He kawng hi ni tin deuh thaw AMC Mayor-in a paltlang kawng a ni a, eng tih mah a tum lo em ni? A tirah chuan mau leh tarpauline mai mai hmangin bûk an sa a, a hnuah thingzai leh rangva hmangin ṭha zawk an sa leh a, chutianga sak thar deuh chu paruk a awm. AMC hian tuna a ṭhiahsak loh chuan nakin deuhah chuan RCC-in an la sa zui ngei dawn tih a chiang - dan lehkawh leh ṭhiahsak a harsa sauh tawh ang.
Protected area-a RCC building sak lai pakhat chu TV lamah tarlan a nih hnuah AMC-in hma a la ve hnuhnawh a, kumin kum tìr lam khan 'stay order' a pe ve a. TV-ah tihchhuah ni lo se hma an la kher ang em? Stay order awm reng mah se, an sa chhunzawm zel tho a, tunah chuan an luah lut tawh. AMC stay order awm chunga kut an thlak chhunzawm zel dan leh tunah phei chuan an luah lut tawh tih hi AMC Mayor hian a hmu ve reng ang, ni tin deuh thaw kaltlangna hmun a ni miau a; mahse, hmalak a tum lo niin a lang.
AMC hotute hian dan an siam ve a, a ṭha; mahse, lekkawh an tum chuang si lo. Thupek an chhuah ve a, a ṭha; mahse, a taka kenkawh an tum chuang si lo. AMC hotute nêp lutuk hi a manganthlak. Tuna a lan dan chuan, AMC dante leh thupekte palzût ngam apiangte an nihlawh mai dawn niin a lang. AMC hotute u, ṭang u la, ziaawm teh u.
Bawngkawn leh Leitan inkar protected area huam chhunga in sak, thlâm tiat lek leka sakte hi AMC hian a bawhzui thuai a ṭul e. A tira mau leh tarpauline mai maia bûk ang deuha an sak kha tunah chuan thingzai leh rangva hmangin ṭha zawk an sa deuh vek tawh. In sak phal lohna hmuna in sa an nih miau avangin in ṭhiahsak a ṭul ang, tuna ṭhiahsak a nih loh chuan nakin deuhah chuan RCC-in an la sa zui ngei dawn tih a chiang. AMC hotute u, tunah hian hma in lak nghal a ngai; ziaawm teh u.
- Zoramchhana