Kan police-te ka vei
Kan chhuanvawr, kan police-te leh force dangte hi kan fak viau ṭhin nain ṭan an lak a ngai. Tun ang renga an kal chuan nakkin lawkah chuan kan buaipui a ni thuai ang. Kan force neihte hi hnuchhui leh thil dik loh chhuizui kawngah chuan an ṭha rih viau a, an chhuanawm viau lai hian inrelbawlna hi a kal fuh lo ṭan niin a lang a, ngaihthah chi a ni lo ang.
Kan force neihte hi an duty laia zu rim nam leh rui hriat a, hmuh tur an awm fo mai a, a ṭha lo hle. Hei hian kan invawnna a ṭhat tawk lohna a tilang a, chubakah kan force-te hian an uniform hi an zah tawk lo niin alang. Mahni pute ruih khum ngam an awm fo mai te hi a zia lo lam chu a ni. An duty lai chuan zu in loin, zu rim nam lo hram teh se.
An hmingchhiatna hi ho tê a ni a, chuvang chuan force ṭha an nihzia lantir nana duty laia zu in lo turin invawng teh se.
Police kan neihho, armed police-te nen hian, tun hma aṭang khan politician ten an duhsak zawng thun nan an hmang ṭhin. Hei hian a chhungah intham lohna, inhlauh lohna te a hring a ni. Politician thiltithei chhungte chu a lu mum pawh nise, phen tur an neih tlat avangin an pute hlau lo an awm fo a, chu chuan discipline a tichhia. Pute emaw, an hotute hlau lo, inphenna tur nei ṭha intite avang hian an pute tan pawn discipline ṭha taka kenkawh a harsat phah ṭhin. Nakkin zela kan police-te ṭhatna tichhe thei a ni.
Dan kengkawhtu leh lekkawhtu an ni tih inhre miah loa uniform nena zu in, an ruih laia an uniform chu inhumhim nana hmanga civil tihbuai ching kan awm ṭhinte kha Home Ministry tan chuan zahna tur a ni. Inenkawlna ṭhat tawk lohzia pholanna a ni.
Tu tute emaw chu hrem ṭhin mah se, hmun ṭhenkhatah chuan tunge thiam lo zawk tih ngaihtuah miah loin, an uniform hak ang ha a niha inṭan tlat a awm ṭhin. Uniform hain mi a tibuai a, a ngam lo a. A hnuah a
ṭhianten a tihbuaia chu an hmunpuia hruaia sawisak chin ṭhin angte kha kan kalsan ta niin alang a, a lawmawm hle. Khatiang thil kha a la thleng ṭhin a nih chuan a fel lo ngawt ang.
Zu khap thlah zalen hma khan, Mizoram pawna duty tura tirhchhuah te zu avangin an rawn buai haw fo a, thihpui pawh an awm fo ṭhin. Chu mai bakah, zu zawrh chhuah a lo nih takah, zu avanga thi police an tam hle maite hi inenfiah nana hman chi a ni. MLTP Act hman hma pawh khan chuti zat chu an thi tho tih vel mai maia kan inhnêm a nih chuan a zia lo ngawt ang. Ram palailengah hel ûm tak tak ngai ni ta se, ralthuam keng zinga tam tak hian an tlin ka ring lo.
Mizorama police-te chungchanga ka thuziah hi anmahni hian an hua a nih chuan hmasawn tumna a nei lo tihna a nih ka ring. Insiamṭhat nan hmang se, hmasawn phah nan hmang thei se a lawmawm ngawt ang. India ram state danga chhui ngai thil a awm pawha Mizoram police-te an rawn pun ni tlak khawpin hma an sawn thei. Tun ang zela an kal chuan nakkin lawkah chuan kan police-te hi kan hmusitin, anmahniah innghah tlakah kan ngai lo ang a, mahni thua dan kenkawh kan tum fur mai ang.
- Ramropuia