MPSC exam buatsaih hun hi
Kum 2011-a Mizoram sawrkarin a lo chhuhsak tawh Grade Pay 4200 chin hna lak chu Mizo Students' Union hmalakna leh nawrna avangin kum 2013 kum lai hawl vel
aṭang khan Mizoram sawrkarin Mizoram Public Service Commission hnuaiah a pe let leh a, a lawmawm hle. Grade pay 4200 chin MPSC-in a lak leh takah chuan MPSC-in advertisement, Exam, interview adt. Zawng zawng pawh an ti zel ta a. Kum 2014 kum laihawl kan chuan kai meuh chuan Exam tur neuh neuh MPSC hnuaiah a awm ta nual mai a, chutiangin kum 2015 leh 2016 ah pawh exam tur chu a awm
ṭeuh zel ta mai.
Mizoram chhunga hna chungnung ber ber MCS, MPS, MIS adt. exam tur aṭanga tlema hniam deuh UDC, Primary teacher, Middle teacher, Asst. adt. exam tumte tun thleng mai hian MPSC office kawtah kan inpel suau suau ta reng mai a nih hi. Departmental exam buatsaih hmachhawn tur ai chuan ngaih pawh a ngam ta. A thiam thiam leh a tlingte chauh dik taka lak an nih tawh avangin lehkhathiam inti tan hna hmuh loh thuah pawh mahni lo chu inmawhpuh tur dang a awm ta lo.
Hetianga exam chung changa kan tarlan duh tak chu exam hun hi a ni. MPSC in hna an laka exam beitu tam tak hi chu hna nghet mumal nei lo kan ni hlawm a, a ṭhen chu exam tura full time-a inbuat-saih te, ṭhenkhat a aia ṭha zawk beiseia exam te, ṭhenkhat mimal (private) hnuaia inhlawh chunga exam tura inbuatsaih leh exam hmachhawn kan ni nawk hlawm mai. Private hnuaia hnathawk emaw, pute neia hnathawk tan chuan exam tura chawlh dil hi a inthlahrun awm ṭhin si a, tin mitin hian damloh ni, chhiatni ṭhatni kan nei vek a, chutiang hunah chuan kan hnathawhnaah chawlh lak a ṭul ṭhin. Chutiang a nih avang chuan MPSC-in exam hun a siam hi Mizorama office kal loh ni Saturday-ah emaw, Sunday-ah emaw hian buatsaih ni thei se a va lawmawm dawn em!
Minister ṭhenkhat leh officer ṭhenkhatte eng nge maw changa office ṭhulh tura Holiday sawn an phur ang leh 'bandh tih thawm a rik dek dek a, khawnge ram hruaitu ka ni a lawm le tia office kal luih pawh tum chhin peih lo, ṭhahnem ngai hnathawh (over work) peih lo ang em chu kan MPSC hotute hi in ni ve lo ang tih kan ring tlat a. In
ṭhatlai, in thiam in finna zawng zawng ram tana in lo hmang tawh ṭhin angin in tan hah thuah hnihna ni mahse, MPSC exam hmachhawntu tam takte dinhmun hi hriatthiamna tarmit vuah chunga min thlirpuia MPSC-ina exam a buatsaih
ṭhenkhat hi chu Inrinniah emaw, Chawlhniah emaw tih theih dan a awm lo'm ni?
Chawlhni tak hi chu Kristian zaa za dawn lai awmna ram kan nih avangin a chi loh maithei, mahse UPSC, SSC, Bank PO adt. exam hun atana Sunday hi chu tu khaw khain kan sawisel ngam chuang lo niin a Lang. Khawchhak lamah khian grape chingtu pawl pakhat hian an pawl hminga Wine Shop neih duh loin an khar an ti a, mahse chu wine shop duh lotu pawlte chuan Zawlaidi & Zowine alcohol content 14% vel awmna wine siam leh zawrh chu pawi zuk ti chuang lo a! Chutiang deuh chuan Sunday-a exam hun pawh hi ṭha ti lo an awm maithei, mahse ṭha ti lotu fa te khan UPSC exam chi hrang hrang hi Sunday-ah an exam fo ṭhin thoin a rinawm.
MPSC hotute u, MPSC hnuaia exam hun hi exam beitute tana engmah tih thulh lutuk chuang lova a tam zawkina kan exam tlan theihna hun ṭha a nih theih nan Inrinniah emaw, Chawlhniah emaw exam hi buatsaih dan han ngaihtuah hram hram teh u. Tichuan, hna sang zawk beiseia exam, sawrkar hna thawkten ram tana sawrkar hna an thawh ṭhulh chuang si loin leh sawrkar hna ni lo private hnuaia hnathawk tan pawh inthlahrung taka hotute hnena chawlh dil reng ngai tawh loin exam kan hmachhawn thei ve tawh dawn a ni.
- Lalhminghlua NKB