Zo fate tana volleyball arsi lian Vardingliani (Dingdingi) a chawl ta!

Vardingliani Varte, Dingdingi hi Pawl Kut thla, tahrik ni 18-ah a piang a, Kanan Veng, Aizawla Pu Zosangliana Varte leh Pi Ramnunsangi te nupa fate zinga a laita a ni.

Dingdingi hian naupang tê a nih lai aṭangin infiamna dang zawng aiin volleyball a ngaina a. Kum 10 mi vel a nih chhoh laiin Kanan Vengah volleyball a lar chho hle a, SAI pum chhuak Mahlimi te, Zothani te lar chhoh tak tak lai rawn nang chhoin, Kanan tlanga an volleyball practice-na sir velah chuan ball remchang apiang lo khawih kual vein hun a hmang ve ṭhin. Hetih laia an coach Pu AC Vanlalhuma chuan a ball khawih vel chu hmuin, volleyball zirtir tlak a ni tih a hmu a, an zinga practise ve ṭhin turin a ti ta nghal a. Dingdingi pawhin a aia senior rual karah volleyball a zir chho ve lauh lauh a ni. A chhungte'n an tuipuiin an phurpui em em a, kawng engkimah an chhawmdawlin an ngaihsak zui a, a tan kawng zau tak an hawnsak a ni ber mai.

Kum 1998 a lo her chhuah meuh chuan tleirawl tê niin, Miss Mahlimi hoin Central YMA buatsaih volleyball tournament-ah telin, a vawi khat tournament khelhnaah champion nomawi a chawi a, mipui hmelhriat a hlawh chho nghal. Heta ṭang hian hawikir tawh loin, a dama a hriselna a ṭhat phawt chuan volleyball nena ṭhen hran hleih theih loh khawpin a nunah volleyball chuan bu a khuar chho zel a, Zoram dung leh vâng a dêng chhuak zui ta a ni.

Final khel tura duan:

Dingdingi hian kum naupang lam a nih laia tournament a khelh tawhnaa an champion-nate mumal takin a chhinchhiah lo hlauh mai a. Chiang taka a hriat theih chinah ngawt pawh CYMA tournament-ah ṭum 6 zet champion nomawi a chawi tawh. Ṭum 14 lai final-ah a inlan tawh bawk a; inter village lamah pawh record ropui tak neiin, hnuhma duhawm tak a hnutchhiah. Tournament a khelh tawh ho reng rengah final an luh lohna hi chhiar tham lek chauh a ni.

Club lama a khelh tawhna–Kanan Sporting Club, Excise Deptt Sporting Club leh 2005-2017 chhung zawngin Power Department Sporting Club-ah a khel a. Power SC-a a khelh chhung hian MVA tournament-ah ṭum 6 chiah champion loh an nei a, an champion zat tak hi chu record bu en let loh chuan sawi a harsa! Hmeichhe PVL hmasa ber kum 2017 khan Power SC chu champion puiin, best player a ni.

Dingdingi hi volleyball khel tur hrim hrima duan emaw tih mai tur a ni a, a inkhelh hun chhungin final a khelh lohna tournament chu chhiar tham lek chauh a ni. Champion team-a a tel tawhnate pawh chhinchhiah mai harsa zawk a ni.

Mimal chawimawina:

Dingdingi’n mimal chawimawina a dawn hmasak ber chu CYMA Tournament, kum 17 a nih kuma best spiker atana an thlan kha a ni a, hemi hnu hian hnung lam hawi tawh loin, mimal chawimawinain a ûmin a ûm a ni ber. A inkhelhna zawng zawnga mimal chawimawina awm thei–Best Spiker, Best Player, Most Outstanding Player, Most Valuable Player tihte hi vawi 20 zet a dawng tawh. Kum 2012 khan Mizoram External Excellence in Sports Felicitation chuan 'Outstanding Performance in Volleyball Award' an hlan a, Aizawla Mary Kom a lo kal ṭum khan he chawimawina hlan a ni. Volleyball a khelh chhung hian chawimawina awm thei zawng zawng a dawng kim ti ila, a khelhna position aṭanga dawn theih zawng zawng chu a dawng kim a ni.

India tân a khel:

Kum 2001 khan Dingdingi hian Mizoram tan a khel ṭan. Naupang tea Mizoram ai a awh theih avang hian volleyball a thiam em tih hi in zawh fo chi a ni lem lo! Hetih hun laia anmahni enkawltu Sir Rina chuan, "Mizoram ai tunah chuan i awh thei tawh a. Hetah hian tawp tum hauh suh ang che. Mizoram mai ni lo, India ram aiawh thei turin bei fat fat ang che," tiin a fuih a; he fuihna hian hma lam pan châka tuihalna a pe a ni. Mizoram aiawhin national junior tournament-te zuk khel ve ṭhinin, a bio-data lo laksak ve ṭhin bawk mah se, India ram tana eng level-ah mah khel tura koh zui an hlawh ngai lo! Mahse, Dingdingi hian a tana hun ṭha her chhuah hun chu a nghak fan fan a, Mizoram tana kum 10 zet a khelh hnuin chu hun ṭha chu a hmu ta!

India ramah hian mihring maktaduai tam tak kan cheng a, chung zing aṭanga India aiawh tura mi 15 vel thlan chhuah hi thil awlai leh samkhai a ni lo. Mahse, Mizoram mai ni lo, North East aṭanga a hmasa ber (?) ni turin kum 2010 khan India aiawh tura thlan a ni ta! India aiawh tura thlan a nihnaah hian a phena mi pawimawh em em, sawi hmaih thiang lo pakhat a awm, chu chu Miss Mahlimi a ni a, ani hi India coach ni tura koh a ni. Dingdingi hi Gandhi Nagar, Gujarat-ah a vawi khat ‘trial’ naah final selection hmachhawn tur zingah a tel a, India camp a zawm ve ta a ni!

India camp-a awm ngawt hi India aiawhna tur a la ni lo cheu; selection paltlang tur a la thui! Final selection neih a nih hmain Dingdingi hi a kala lungte awm vangin Hi-Tech Hospital-ah enkawl a ni a, damdawi in a chhuahsan aṭanga ni hnihna lekah final selection an nei zui a! Practice-na hun pawh nei loin a hmachhawn ve tawp a, India aiawh tura thlan zingah a tel ve ta! Hetih hun laia amah puitu leh atana theihtawp chhuahtu Miss Mahlimi leh MVA hruaitute chunga a lawmthu hi a sawi bâng thei lo.

Tichuan, kum 2010 khan Asian Youth Women Volleyball Championship, Kuala Lumpur, Malaysia-ah India tan a khel ve ta. Hemi ṭum hian NE India aṭanga khel thei hmasa ber a nih thu an hrilh nghe nghe.

Mizoram tân:

Sawi tawh angina, Mizoram tan vawi duailo Dingdingi hi a feh chhuak tawh a; hlawhtlinna eng emaw zat changin, final thlen phak loh ṭum pawh an ngah viau mai. A hnuaia kan tarlante hi Mizoram tana lawmman a dawn tawh ṭhenkhatte a ni:

. 2005 khan East & Northeast Zone Tournament, Assam-a neihah Mizoram hmeichhe team kha 3-na an ni.

. 2006-ah National Women Sport Festival, Jammu-ah 3-na an ni.

. 2007-ah All India Rural Sport Meet, Aizawlah champion an ni.

. 2007 NE Sport Festival, Sikkim-ah champion an ni.

. 2012 NE Games, Aizawlah champion an ni.

. 2014 & 2015 Niathu Sport Festival, Dimapur-ah NECS hmingin an tel ve a, an champion ve ve. Kum 2015-ah hian Best Spiker lawmman a dawng.

Kan tarlante bakah hmun dangahte Mizoram tan hian ṭum 20 chuang a feh chhuak tawh a ni.

A châwl dawn ta!

Hun a inher zel a, mihring tuina avang leh volleyball hmangaih vanga hun rei zawk khel thei dinhmuna la ding chungin, harsatna hian tu mah a zuah bik si lo va. Kum 2022 aṭang khan khûp hliamin a bawh buai chho a, duhthusamin a dam hleithei ta si lo va. Chu bakah, chhungkuate din a, pasal fanaute nen an nih ve tak diah avangin a game ngainat leh âtchilh, a hmangaih rumrut mai chu a chawlhsan dawn ta der mai.

Pasal a neih hma leh a neih hnu thleng pawha a duh thâla a inkhelh theih nâna hun remchang petu, a chhungte chunga a lawmna te, a pasal R Vanlalhriata (Hriattea) thlawpna ṭha tak avanga a hlimna zawng zawngte kha tunah chuan a nunhlui a chhui kir ruala a hnuk no kai chhuaktu a ni tawh ang. An fanu Vanlalfini (4yrs) leh an fapa Zonuntluanga ten a sûlhnu zuiin, a nu hmingṭhatna khûm turin volleyball court chhungah nunchan an la rawn zir chho ngei ang a, nu lunglenna chawk tho a, pa lawmna siamtu an la ni ngei ang!

Naupang zawkte thlir rawn leh entawn, Mizo hmeichhe zinga volleyball thiam ber tia mi tam takin an sawi fo tawh tur, Vardingliani Varte chu a inkhel thlir tur awm tawh lovin, inkhel thlirtu lamah a ṭang dawn ta. A uiawm a, a ngaihawm vawng vawng bawk ang. Mahse, Mizoram volleyball tana a sûlhnu hnutchhiah zozaite hi theihnghilh a ni tawh lo ang a, hriat reng a ni kumkhua tawh ang. Tunah chuan a châwl dawn ta. Ṭhangthar zawkte fuihtu ṭha tak ni zel turin duhsakna kan hlan e.

Hei erawh tarlan loh phal chi a ni lo. Dingdingi hian volleyball a khelh chhung zawnga amah thlawp tlattu, a chhung leh khat te,ṭṭhenrual ṭhate mai bakah, a pian a seilenna, Kanan Veng mipui thlawpna zawng zawngah lawmthu a sawi mawlh mawlh a ni.

“Dingdingi, i thutlukna a zahawm a, i sûlhnu hnutchhiah zozai avang hian volleyball lover-te thinlungah i châm reng ang a, theihnghilh i ni tawh ngai lo ang. I chhungkua, pasal fanaute tan nu chhuanawm ni reng la, i hmangaih volleyball chu chawlhsan ta mah la, volleyball hi Zo fate’n kan khelh chhung chuan i hming a dai tawh ngai lo ang.”

- Rohlupuia Renthlei