BUILDER OF THE NATION

Hmanlai chuan school zirtirtute hi khawtlangah pawh pa râwn tling, mi zahawm, vantlang pawhin an chung en an ni ṭhin. Eng vang nge kan tih chuan dik taka a thiam leh tling ngei zirtirtu atan lak an nih vang a ni kan ti thei awm e.

Hun leh ni a lo ral zel a, tunah chuan zirna in din dan kalphungte'n a zir tâk loh vangte pawh a ni thei ang. Khawtlangin zirna in an din a, ṭhenkhatah phei chuan hlawh mumal lo leh hlawh tlem te tea chhawr an ngaih avangin a khawtual mi emaw, hmuh remchan ang angte chhawr an ni a, hna ṭha zawk dang nghak chunga thawk, hna dang hmuh veleha chhuahsan leh zeng zung hnaah zirtirtu hna leh zirna school chu kalpui a nih vangte pawh a ni ang. Tun dinhmunah chuan ram leh hnam siamtu/dintu (Builder of the Nation) tia koh zirtirtu hna chu vantlang leh mipui mimir pawhin hna zahawmah an ngai ta meuh lo.

Kan zirna kalpui danah lah quality aiin quantity-ah hma a sawn chak ta zawk a. Zirlaite pass-na division a sang tual tual a, hna zahawm leh sorkara dinhmun pawimawh chelhtu civil service officer leh central service officer-ah pawh tling zo an tlem ta tial tial a nih hi. Tun hma hun mei eng leh bati hnuaia lehkha zir ṭhinte kha tunlai ṭhangtharte hian phak lohna tam tak kan nei ta niin a lang a, hei hian kan ram zirna darthlalang a tarlang chiang hlein a lang.

Zirtirtu dinhmun chawikan a ngai

Higher secondary school teacher-te lecturer an lo ni ta a, college lecturer-te assistant professor an lo ni ta. Primary aṭanga high school-a thawktute erawh teacher nihnaah hian an lung a la awi pawh a ni thei e. A bik takin trained graduate teacher-te hi department danga an rank leh level puite aiin mipui vantlang mitah leh rilruah zah an kai lo zawk ti ila, kan sawi sual tam kher awm lo e. Trained graduate teacher-te ngat phei chu an dinhmun thleng tura an kalkawng thuizia leh college degree chhuah hnuah pawh kum 2 tal tawp training nei lehte an ni a. Zirtirtute chu mihring enkawltu, ram leh hnam hmsawn nana a ki pawimawh tak vuantu, IAS, engineer, pastor, doctor, lawyer, etc. te chher chhuaktu, office hour vawng dik ber, hna pending ve ngai lo, eiruknain a tihbuai ve loh hna thianghlim, democracy ram kalphungah inthlan (election) a awm reng renga chhawr nasat berte an ni.

Amaherawhchu, a nihna (designation)-ah hian officer emaw, inspector emaw, chutiang ang lam hming chu a tel ve lem lo a, thuneihna (authority) lah an nei lem lo bawk. (Naupang ngawhngawl leh sual fal takngial hrem tur pawhin tianga han vuak chu sawi loh, aw-ka vîn deuh leh ṭawngkam hriam deuh hlek pawha an hrual ve theihna ṭhin pawh tunah chuan laksak ang mai an ni tawh a. Mithiam chhuak thar tuai tir te tete’n system thar ṭha zawk ni tura an ngaih, a hnua a taka hman zui tak, ṭha zawk chuang si lote pawh tunlai kalphung tharah hian a awm ta nual em tih hi zirchian a, paih ngai paihin, a ṭha zawk tur ngaituah a, a field-a thawktute rawn chunga kalphung thar duante hi a ṭha hle mai thei). Teacher tih ringawt ni lo deuh hian an thawhna school azirin an designation hi siam thar ni se la. Entirnan: trained graduate teacher chu high school-a thawk a nih chuan institution officer-I, middle school-ah institution officer-II, primary-ah institution officer-IlI ti ang pawhin an designation hi thlak ni se la. Hlawh leh hamṭhatna ai mahin nihna (title) hian mihring nun hi a phuarin, designation hi mimal nun phuartu pawimawh tak leh vantlang mimirin hna ṭha leh zahawm tehna fung atana kan hman ber pakhat pawh a ni.

Department danga thawk group khata an awm rualpui leh an pay level pui, officer/inspector title nei (ṭhenkhat phei chu gazetted rank hialte pawh an awmin a hriat) an awm nualin a rinawm.

Headmaster-a luh harsatzia leh service record nei ṭha eng ang tan pawha service chhung zawng pawha thleng phak chuang lo tur teacher zingah engzat tak awm ang maw! Hei hian headmaster dinhmun sanzia leh promotion pawha thlen harsatzia a tarlang chiang hlein a lang. Chutih laiin, headmaster-te pawh department danga an level puite nen khaikhin chuan an dinhmun hi mipui thinlungah chuan hniam tak a ni. An level puite zingah hian quarters nei lo leh motor pawh kawl lo hi chu an tam lo mai thei. An service-in motor kawl a mamawh lo kan lo ti a nih pawhin an level pui department danga mi, lirtheia designation plate tar vah thei an awm nuk mai thei. Hlawh leh hamṭhatna dawn hi chu eng department-ah pawh ni se, mipui mimir vantlangin kan inhriatpui vek lem lo. Hna zahawm leh hna ṭha kan tehna ber chu an nihna title/designation leh authority an neih dan atangin a ni.

Chuvangin, Builder of the Nation kan tih zirtirtute hi kum tin September ni 5 (Teachers' Day)-a a hming/thu chauh ni lo, a taka school-a thawktute chawikan hi kan ram kalphungah hian thil ṭul takte zinga mi, sum sen belh ngai chuang hauh si lo, thua chinfel theih ni si a ni.

Thawktu lak chungchang

Zirtirna hna thawktu lak hi direct competitive examination kaltlangin, thianghlim tak leh induhsak falna bik tel loin, a thiam leh tling ngeite chauh an thawh theihna turin lak ni se la. Hei hian kan ram zirnaah quality aia quantity-a kan chungnunna hi zawi zawiin, a kum telin a thlak danglam ang a, ṭhangthar zirlaite zingah division phua mi quality chher chhuahna kawngah kori a tu hle ang. English subject zirtir turin college-a English subject la, Mathematics zirtir turin college-a Mathematics la, Science zirtir turin college-a Science la, chutiang zelin criteria pawh siam ni se la. Hei hian tun aiin quality education-ah hmasawnna a pe zual ngeiin a rinawm bawk. 

- David L Chhangte