Thing Phun A Hun E

Fûrpui a lo thleng leh ta. Hlo thlotute pawhin hlo thi har deuhte chu a zungin lei a sik chuan an nung zui leh mai ṭhin. Chutiang khawp chuan hlo a nung duh tawh. Hetih hun lai hian bazarah kal la, thlai phun tur an zawrh i hmuh chuan lei la, inah pot-ah dahin bathlarah hûng la, ni rei lo te hnuah thlai puitling i nei reng mai ang.

Hmanlai chuan thing leh mau a la tam a, kan ram hi ngaw dur pui puite'n an la vawng dai ruih a. Mahse, dimdawihna nei miah lova mihringte kut thlakna avangin Zoram hi a lo bua zo ta a, phul hmunah a inlet mek a ni. Kan rama thing leh maute hi hnam dangte tihchhiat a ni lo va, a chhunga cheng Zo fate tih chereu a ni. Siamṭhat lehna hna thawh pawh kan tih ngei ngei tur, kan bat tlat a ni.

Eng vangin nge thing leh mau lo chereu tate chu tun hma huna a awm angin kan din thar leh a ṭulna tiin ngaihtuahna i lo hmang teh ang. Tunah chuan boruak ṭha hîp tur oxygen min petu thing bukte a awm tlem

tawh avangin thâwk lama harsatna nei kan lo tam ta em em a ni. Boruak min vawng daitu rawn thlentu thing buk an awm tlem tawh avangin, ni zung sa tak lo tla thlate chu lo do daitu ramngawte an awm ta lo va, ni sa lutuk avangin lu nâ te, taksaah vun natna chi hrang hrang te, khaw lum vanga chauh nghulhnate a rawn thleng a. Tuihna siamtu thing zungte a tlem tawh avangin tuihnate an kang chat nasa a, kan thlai chinte'n an tuar nasa. Tui khamkhawp hman tur kan nei tawh lo va, tui thianghlim lo kan in aṭanga kan taksaah natna leh harsatna a rawn thlen te chu sawi sen pawh a ni ta lo. Hei bakah hian khawmual leh lui dunga nungchate'n nasa takin an tuar a, an lo rêm phah zo ta a ni.

Hetiang dinhmun chhe takah hian kan ram a awm mek a, a chhunga cheng Zo fate hian nasa takin kan tuar mawlh mawlh reng a ni. Hetiang dinhmun aṭanga kan tal chhuah leh theihna awm chhun chu thing kan phun mawlh mawlh mai hi a ni. Fûr hun thing phun hun lo thleng hi hunbi nei, liam leh mai tur a nih avangin hmanhmawh takin a tam thei ang ber thing i phun mawlh mawlh ang u.

Scientist-te chuan kumin hian boruak lumna chu degree khat leh a chanvein a san belh a, insiam ṭhat nan kum hnih chhung chauh kan nei ta an ti. Mizoramin boruak kan dawnna Bangladesh leh Tripura tlang ram ngaw ṭhate pawh an kit chereu zo tawh a, boruak lo kalte pawh an lum zual ta hle mai.

Hawh u, ramngaw din thar leh turin thing phunin i feh chhuak ṭheuh ang u.

- H Neihchungnunga,

Durtlang