Inthlahdah lo ang

Covid-19 vanga kan rilru chiai leh thlabar lutuk kha a reh ṭan niin a hriat, a bik takin Aizawl khaw-pui chu nunphung pangngaiin kan khawsa leh ta, a nuamin a hlimawm a, hun rei tak in­kharkhip hnua zalen leh ṭan kan nih avangin hawina lam apiangah lawmna tur a tam hle. 

A nihna tak sawi chuan inkharkhip kha a hrehawm takzet a, hri leng laka kan himna tur a nih avangin a ngai miau si. Mahse inkharkhip a nih tawh kha chuan taksa mai bakah rilru thlengin a tawt, kan ipik vek vek mai chu a nih kha.

Hripuiin Mizoram a rawn luhchilh tirh kha chuan mipui kan ralṭi a, inhrilh chawp kher pawh ngai loin kan fimkhur tlang em em a nih kha, chumi rah chhuah pawh chu a ni ang state dang nena khaikhin chuan hri kai pawh kan pung thut thur lem lo, a lawmawm takzet.

Sorkar hmalakna mipui lamin kan thlawp ṭha a, nitin a takin a rah kan seng mek zel. Hri kai vei thar hmuh chhuah awm ve deuh reng mah se a dam an tam zawk a, hri vei mek kan neih lai pawh a tlahniam mek zel.

A kai aia a dam lam kan tam miau chuan engtik niah emaw chuan hri kai awm lohna state kan ni thuai dawn - krismas ruai pawh kan ṭheh thei hlauh mai thei a sin, hun harsa karah hian a eng lam thlir mi tan chuan hun ṭha a inher chhuak mek niin a lang.

Kawl a eng ṭan a, kan boruak a muanawm viau tawh lai hian fimkhur erawh a la ngai. Kan ngam loh tur hi kan zuam sual palh hlauh ang tih a hlauhawm thei, tihdam kher ngai loin inven nachang kan hriat thar leh a pawimawh hle.

Tun hnaiah hri kai, mahse an inkai chhawnna chhan hriat loh an awm nual - an zinga tam zawk chuan natna an nei! Health department lam chuan mipui fimkhur zual turin min chah leh ta, thuawih thei Mizo ten sorkar thu zawmin inven kawngah i fimkhur thar leh zual ang u. 

Coronavirus hi a enkawlna damdawi a la awm chiah lo a, inenkawlna tur hi an siam chhuak a nih pawhin mizawng zawng hman theih tura peih fel ni tur chuan hun a la duh rei ang tih a chiang, chuvangin enkawlna awlsam ber mahni inven hi kan ngawihpawimawh thar leh a ngai.