MNF PARTY NGE LAL SPEAKER?

MNF Party chuan, Pu Lalduhoma ZPM legis­lature party leader chu Independent MLA ten an tih tur leh tihloh tur Constitution of India-in a duan zulzui in Speaker hnenah hekna an thehlut a, He an hekna hi Rulling party Whip a nih angin, thutlukna pawh he hekna leh puhna zulzuia siam a nih ngei rin leh beisei a ni. 

Mizoram State Legislative Assembly Speaker Pu Lalrinliana Sailo hi, tuboh leh dolung kara awm,  anga ngaih theih a ni mek. A chhan chu, Pu Lalduhoma disqualify turin a awmna leh amah siamtu party chuan CM hriatpuina (ni ngeia lang) in MNF MLA mi 12 ngawtin ban turin hekna lehkha an thehlut rup mai. 

Assembly Speaker-in ni 14 chhunga insawifiah tura hriattirna a pek angin, Pu Lalduhoma pawn felfai takin chhanna a thehlut tawh bawk. 

Pu Lalduhoma insawi­fiahna hi Legal point of View aṭanga teh (ṭan bik neih miah lo) chuan, felfai thawkhat hle a ngaih theih ani. A chhan chu, Pu Lalduhoma hektute hian an hekna zawnah hian lehkha pawimawh leh danin a phut ang evidence pakhatmah thehluh tel an nei lova, Hetiang tel lova MLA disqualify hi speaker tan hian tuang tihchhah piah lama sazuk talh emaw kan tih kha Bawng a lo ni zawk  tih ang deuhva phat­mar a ngai hial maithei. 

Speaker hian, an hek anga a thuneihna hmanga ban tir hi party duhdan ani tih a chiang thawkhat a, a bantir loh chuan, MNF party whip a dodal tihna a ni bawk ang. An hek anga a ban tir  a nih pawhin, a hektute'n an tihtur an tih kim loh te (dan anga zawm tur) haider in a hektute tanin thulai ala lo tih anga hmehbel a awl hle bawk in a rinawm. 

Heng avangte hian, Mizoram State Legislative Assembly speaker dinhmun hi a khirh kual vel hle tiin a sawi theih awm e. 

MNF Party duhdan anga Pu Lalduhoma hi ban tir a nih chuan, Speaker hi MNF party chuan,  huaisen chawimawina no pui or thangchhuah diar hial an hlan duh maithei, Mizo mipui party tan bik nei lote erawh chuan, Speaker leh MNF Party chu ui ek pu tluk pawhin an hmu zui lo maithei bawk. 

The Miller of The Dee thawnthu ang deuh khan, Tuna Speaker dinhmun hi sangin duhawm hle mahse, ram zau taka Lal, niha zalenna neih loh ai chuan, tumah awt leh elrel lova, zalen taka nun hman hi a thlanawm zawk ang em tih hi ngaihtuah tham a ni.