MIPUI TAN MIPUITE THLAN MAYOR

Kan khawpui rorelna In-a (Municipal Corporation) hruaitu tur inthlan pawh kan lo hnaih leh ta hle mai. He rorelna In hi engti ang taka pawimawh nge a nih tih chu kan hre ṭheuh ang a, abikin tunlai COVID-19 hri dona kawnga inkhuahkhirhna felfai zawk kan neih theihna aṭang ringawt pawh hian a chiang viau mai awm e. Aizawl Municipal Council/Corporation kan neih ve ṭan aṭanga hmasawnna tam tak hmuh tur a awm laiin, tun aia hmasawn lehna tur awm thei angte han ngaihtuah sauh sauh zel pawh hi a sualna a awm chuang awm lo e. A pawimawhna leh a ṭangkai tur anga hmanchhuah zawh loh hi thil pawi tak tur, kan hriat miah loha kan tu leh fate chenna khawpui ruangam leh ruhrel tihmelhem thei thil a ni. Chuvangin, he rorelna In hi engti angin nge kan kalpui ang a, engti angin nge kan thuam chak zel ang tih hi kan ngaihtuah tlan a ṭha khawp mai.

India ram rorelna hi chhawng thum (3 Tier System) anga kalpui a ni a. A chung berah Central sawrkar awmin, State Sawrkarin dawt lehin, a tawp berah hian Tualchhung Rorelna In (Urban and Rural Local Body) an awm leh a ni. Tualchhung Rorelna In hi 74th Constitutional Amendment Act 1992 aṭanga kan neih, kan ram danpui Part IX A (Article 243-P aṭanga 243 ZG) hnuaia ziah luh a ni a. Tualchhung Rorelna In (Local Government) kan han tih hian ṭhuang riat awm lehin, heng - Nagar Panchayats, Municipal Corporation,  Cantonment Board leh a dang dangte hi a huam vek a ni. British hunlai aṭang khan tualchhung sawrkar neih ṭulna hi lo awm tawhin, Lord Ripon's Resolution of 1882 zulzuiin chung rorelna In-te chu din an lo ni tawh ṭhin (Kum 1870-ah Lord Mayo-an Municipality President chu direct election hmanga neih a nih theih dan tur riruang a  lo siam tawh). Chu kalphung chu chhawm zelin tun hun hi kan lo thleng ta a ni.

1. The Board of Councillors - Heng mite hi councillor atana mipui thlan tlinte an ni a. Aizawl Municipal Corporation hian councillor 19 neiin chung zingah chuan hmeichhia 6 an awm. BoC hnuaiah hian Standing Committee awm chhawng lehin, heng committee peng hrang hian rorelna awlsam leh chak zawkin an kalpui ṭhin.

2. Chairman - Chairman hi Mayor kan tih hi a ni a. Mayor hi Councillor-ten an zing aṭangin an thlangchhuak leh a ni.

3. The Chief Executive Officer - Commissioner tia koh a ni bawk a. State sawrkarin bureaucrats (IAS/MCS) aṭangin a ruat a ni. Municipal Council-in CEO a nei a, Municipal Corporation-in Commissioner a nei ve thung.

Tun lai hian Municipal Corporation Chairman leh State Sawrkarin a ruat Commissioner-te inkara thuneihna inchuhna leh chumi nghawng zel rorel mumal theih lohna thleng ṭhin avangin, Mayor hnena thuneihna tam zawk pek duhna a lian sawt hle a. Tin, a tha tichak turin India ram khawpui lian zawkah te chuan Mayor hi mipuite thlan tlin ngei a nih (Direct election) duhna a lian sawt hle bawk a ni. Kum 2016 khan Shashi Tharoor chuan Parliament-ah private member bill, Mayor tha tihchakna tur leh Mayor term kum 5 a nih theih nan a lo pu lut tawh a. He a bill put luh hian India Constitution Article 243R siam rem a tum ber a. Amaherawhchu, pawm a ni ta lem lo a ni.

India ram hi mipui chitin chitang inpawlhsawp kan nih angin, mi pakhatin kalphung ṭha ber tura a ngaih chu midang tan a lo ṭha ber bik viau kher lo mai thei bawk a. Amaherawhchu, democracy laimu, mipuite kawng zawh tur leh an phu ang tawk thuneihna pek ve (Decentralisation of power) ngaihpawimawh hmasak aia thuneihna tam zawk inpek leh inhai vur tumna hi India ram politics ṭhanmawhbawk a ni tih a lang chiang zel bawk. He kan kalphung ngai pet pet reng mai hian kalphung ṭha zawk tura a riruang duan chhuah tam tak pawh ngun taka han thlithlai chu sawi loh, leh lam hawisan chunga hnualsuat mai chang a nei ṭhin reng a ni.

Keini'n Indirect Election kan kalpui laiin, State ṭhenkhat - UP, MP, Chhattisgarh, Jharkhand leh Uttarakhand-ah te chuan Mayor thlan hi direct election hmangin an kalpui mek a. Heng kalphung danglam nuaih hi India Constitution-in Tualchhung Rorelna In-te State thuneihna (Seventh Schedule - List II - Entry V) hnuaiah a dah vang a ni a. Chu theihna hmang chuan state tinte chuan anmahni remchan dan angin kalphung an insiam chawp mai thin a ni.

Mayor thlang tura tuna kan kalphung hi a chhe ta lua e kan ti hauh lo. Chutihlaiin, kan sawi tum ber Mayor tha tichak lehzual tur chuan The Mizoram Municipalities Act 2007 hnuaia Chapter III (3.17), a bikin Chairman chungchang hi siamrem kan mamawh lo maw? India ram hmun dang tam takah chuan Chairman hian kum 1 chhung term, pawh sei theih tiamin, a chelh thei a (Local Government in India Still Carries Characteristics of its Colonial Heritage - by - Mayraj Fahim, Local Government Adviser ). A term chelh chhung erawh Indirect-a thlan a nih chuan, chanvo-sa-hauh theihna (Security of tenure) a nei lo ti ila kan sawi sual awm love. Maharashtra Municipal Corporation (Amendment) Act 2000 hnuaia Mumbai khawpui inkaihhruaina hi lo en leh ta ila. Hetah hi chuan Mayor term chu kum hnih leh a chanve (Fixed tenure) aṭangin kum 5-ah (councillor-te term chelh theih hun chhung zulin) pawhsei a nih thu chiang takin a intarlang thung. The Mizoram Municipalities Act 2007 hian Terms of Office hnuaia Chairman-chungchangah, a thlawn theih dan (Removal) chauh ni lo; hna a chelh theih hun chhung leh kalphung hi chiang deuh zawkin chairman huangah ngei tarlang ve thei se a va tha dawn em! Indirect election hnuaiah "fixed tenure" chu lo nei thei dawn lo pawh ni ta se, "term" tal chu ziah lansak ve hrim hrim a ṭha lo maw? Chairman hian councillor tam zawkte kalh zawngin thutlukna siam thei lo mah se, member dangte nen hian thuneihna leh hna chelh (Power and functions) kawngah danglamna tam tak an nei tawh. (The Mizoram Municipalities Act, 2007 Act kan chhiar hian a lo funkim lo a nih erawh chuan min hrethiam se)

Hei aia tha leh chak zawk hian Tualchhung Rorelna In hi kan la siamrem thei em tih ngaihtuah chungin, Direct Election leh Mayor hi bureaucrats thuneihna ang pek a ṭhat zawk theihna tur i han tarlang dawn teh ang -

1. Mayor thuneihna tihsân - Khawpuia mihring pung zel tur ngaihtuah chungin, Mayor hian hei aia thuneihna sang zawk kenkawh hi a mamawh hle a ni. Tuna kan kalphungah hi chuan a hmingin executive lu ber chu a ni ngei mai. Mahse, thuneihna tak tak (Real executive power) chu Commissioner thuneihna hnuaia awm a ni. Commissioner hi State-a sawrkarna fawng chelhtute ruat an nih tlangpui ṭhin avangin, he Tualchhung Rorelna In hian state sawrkar awn lam zawng ang zela kal chang a ngah lo thei lo a ni. Economic Census of India 2017-18 ah khan India ram mipui 1/3 chu khawpuia cheng ang an ni a. Chung khawpui mipuite mamawh chi hrang hrang phuhruk thei tur chuan, khawpui rorelna hian mahni a inrelbawlna chak leh ngialnghet a neih a ngai a ni.

2. Mayor thutthleng inchuhna mipui vote hmanga neih - Mayor hi mipui vote hmanga thlanchhuah theih a nih chuan, mipui lakah a mawhphurhna (Accountability) a hrechiang ang a. A hna chelh theih hun chhung chiang zawk (Fixed tenure) a nei ve thei ang. Chu chuan amahah inrintawkna tam tak a siam thei bawk ang. Direct Election kan neih theih chuan Chairman hian a tlinna Ward bil bik chauh ngaihtuah lovin, khawpui pum ṭhatna turin ngaihtuahna a seng thei zawk bawk ang.

3. Independent Candidate-te Mayor atana ruatna remchang - Mayor thlan nana Direct Election neih hi party nei lova chuhtu siam theihna (Non-Party Line) a nih phei chuan, party-in campaign-nana sum a sen ṭhin tam tak tihhniamna a nih dawn bakah, ṭhalai zawkte tan ram rorelna zawm ve theihna hun ṭha a ni bawk ang. Tin, party behchhan nei lo Mayor chuan hna a thawh dan kawngah pawh, State-a sawrkarna siamtu party tan phurrit a thlen lovang a; mipuite mit hmuha langtlang (Transparency) Mayor a nih a lo ngai tawh zawk bawk ang.

Rorelna ṭha a awm theih nan chuan thuneihna kengkawhtute hi an pawimawh em em a. India ram hi thuneihna insem (Decentralization of power) in kan awm a, tin, heng rorelna In chhawng thuma ṭhen a nih hi kan ram Danpui "Basic structure of the Constitution huangchhunga Federal Structure" hlawhtlinna tarlanna a ni bawk, tin, mipui thlan tlin ngei hruaitu leh dan kengkawhtu nihna dik tak neitu Mayor kan neih hi Democracy lungphum mipui rorelna nemghettu a ni.