Rel Station Vairengteah (Silchar to Vairengte via Sairang)

Kum 2000 chho vel khan Vairengtea rel station dah a ṭulzia kan CM hlui Pu Ṭhena policy kha ka lo ziak fo tawh a. Mahse, ka beidawng ta a, ka ziak chhunzawm duh ta meuh lo. Tun sawrkar thar ZPM kaihhruaiah hian vawi khat tal ka sawi thar leh châk riau a; awmzia a neih leh neih loh chu thudang ni se.

Kan CM hlui Pu Ṭhena’n chatuan ram min pansan hma khan Vairengte a rawn tlawh ṭumin kan lo dawngsawng a, IB-ahte lo hmuin kan kâwm a, ramri a tlawhna Dholai bula a kalte kan ṭawiawm bawk. Ram vei tak tak mi a ni a, ram hmangaihtu a ni tih hi Zo fate’n Pu Ṭhena kan hriat dan pakhat a ni. Chumia a sawi pawimawh a tih pakhat chu–Vairengtea rel station dah kha a ni a, a kawng tur pawh an survey vek tawh thu sawiin, Aitlang hmun chu a chawlhhmun tur, chuta ṭanga kal chho zelin, Chhimluang phai ruamah kal zelin, Buhchang hrut chhovin phai ruam zelah a kal chho ang a, Sairangah a chhuak thei a ni (Google Map aṭang hian a ruangam tur chu a lang chho nghal ruak thei). Hei hi ram hnuk pawimawh tak a ni.

Vairengtea rel station awm a ṭhatna leh Central lam tan pawh a pawimawh em emna chhan chu–Vairengte hmuna Counter Insurgency and Jungle Warfare (CIJW) School, ram pum huapa sipai training-na hmunpui, Commandant pawh Major General chinin an ṭhutna hmun a ni. Indian Army insingsa ringawt pawh hi turu tak a ni a; Army tan a pawimawh tel dawn. Engati nge Army tan a pawimawh chu Mizoram ro hlu a nih daih theih ang? A va ho awm si ve… Hei tak hi sawi ngai leh pawimawh lai a ni.

Kan state hi Assam, Tripura leh Manipur-in min hual vel a (international boundary chu thuhran ni se), kan depa awm ho hi a tlangpuiin hnam sual takte an ni tlangpui. Mizote min rêp châr hreh lo vek an ni. India rama kan awm ve avangin kan dam khawchhuak leh hram ṭhin a ni ber a. Kum tam tak chhunga kan hmabak chu–vai buh ring lo leh vai siam chhuah ring lo hian mahniin kan dam khawchhuak zo dawn rih lo tih hi kan pawm ngam a ngai. Kan chhehvela hnamte hi an chimawmin Mizote min hlau lo hle. Min hlau lo zel pawhin a rinawm.

Vairengtea rel head a awm chuan Indian Army tana pawimawh rel a service dawn tih hi hriat tel tur a ni a, hei hi Mizote tana pawimawh tak tur a ni. Hei hi Pu Ṭhena khan a hre chiang a ni ang. Ṭhenawm state nen kan han buai chiah chu Indian Army ho lalzia leh pawimawhzia kan hre chiang nawn fo. Rel kal tur hi Indian Army rel service tluka pawimawh a nih tel dawn avangin khawi hmunah mah an lo khawih kawi dawn lo tih hi chiang tel ila. Khawi lai hel pawl tenau emaw, Mizo haw em emte pawhin Vairengte rel lut tur hi an khawih buai ngai lo vang. A chhan chu defence thil a ni tel nghal.

He thu hi a mâwlmang mange tiin i ngaihtuah ru mai thei. A mâwlmang lohzia chu Assam nen kan buai laia oil phur tank lorry trip 10 an chhuaha kan lawmzia kha theihnghilh loh a ṭha ang. Ṭhenawm state nena buaina kan neih reng rengin a ṭhenawm state dangah an chipui an awm khah tel vek avangin khawil ai hmun aṭang mahin Mizoram supply thil a thleng ṭha ngai lo. Kan rel kawng thlengin an suasam ṭhin. Chutiang ṭhenawma nei chu kan ni a, kan nei reng dawn a, an inseamṭha thut dawn lo va, Mizote min hmangaih thar thut dawn lo tih hi hriat tel tur a ni.

Vairengtea rel head a awm chuan heng kan harsatna zualpui hi sutkianin a awm thei ang. Tin, defence khawih thil a nih vangin proposal siam/tuaihnûm leh hi Central lam chuan a pawm rang khawpin a rinawm a, an phûr zawng tak tur a ni ngei ang. Leilawn sang tak tak siam a ngai dawn lo va, Google map aṭangin han thlir chiang ila, a fel chho thlup mai a ni.

Kan sawrkar thar hian Sairang pawh chho turin he rel kawng project thar hi siamin, Pu Ṭhena’n a lo ruahman tawh kha tuaihnûm ṭha leh ta se. Chi leh chi inkarah te, ramri issue-a buaina kan tawh tam takah hian thil zawng zawngah nunphung pangngai a phak lo a nih pawhin, he rel kawng hian min chhâwk zângkhai dawn tih hi a lang sa reng a ni.

Heng zawng zawng piah lamah hian thlai thar hralh chhuah kawngah nasa takin ṭangkaina a nei ang a. Zin veivahna kawngah mi harsa zawkte’n rel chuan man tlâwm zawkin kan veivah theih phah bawk ang.

Four lane kal turah hmalakna a kal chho ruah bawk a, Silchar to Aizawl hi he four lane-ah hian tlan chhung a rei dawn tawh lo hle bawk a, a kawng kal dan tur lah a lang chho ruah tawh bawk. Mizoram hi inkalpawhna ṭhain a thlûr sung mai dawn a; hmar tawp aṭanga chhim tawp thlengin kawngpui ṭha leh rel kawng ṭhain a tan tlang chuan ram hmasawnna hi tun aiin a let tam takin a zuang sang thei dawn a ni.

- Lalnunhlua Ralte, Vairengte

8787640790