Serchhip bial mipui kutah

Tun dinhmunah Pu Lalduhoma chu Assembly term khat chhunga By election avanga bial hnih hloh thei dinhmunah a ding ta reng mai. A bial a hlohna hmasa zawk kha chu a tur ve reng a ni a, han sawi zui vak tur a awm lo. 

A bial pakhat zawk a hloh danah erawh sawi leh sel a kai nasa hle mai a; ban a nih hnu deuh lawkah ZPM lam chuan Law court-a kal lovin mipui court lama chin fel turin thutlukna an siam thu an puang der tawh bawk a. 

Hetia han ngaih­tuah mai chuan ZPM thutlukna siam hi thutlukna huaisen angreng tak ni-a a lan lai hian ‘ngam loh chalah chil an hnawm’ ang mai a ni palh ang tih erawh ka lo hlauhthawnpui deuh tlat a ni. 

Pu Duhoma ban a ni tih mipuite’n kan hriat veleh khan a nawlpui (social media lamah chuan) kan lainat tlang viau mai a. Kan khawngaih ru angreng hlawm ni tein ka hre deuh a; mahse, he ti lai tak hi a nia ‘venthawn’ ngai lai tur leh ZPM tan ‘ngam loh chala chil an hnawm’ a ni palh ang tih ka hlauhthawnpuina lai tak chu. 

Tun dinhmuna Pu Duhoma khaw­ngaihtu tam tak hi chu inthlan ṭhat leh huna ‘vote’ thei lo tur kan tam em mai a, hei hi a ni an cho sual ang tih a hlauhawmna lai tak chu. 

Congress lam hian Pu Duhoma hi thlawpin candidate siam lo ngawt ta se, nakina politics-a an hmelma la ni leh thei tur lo vulh len kha a fuh viau lo thei ve tho bawk si. Lehlamah Pu Duhoma talin Assembly house-a opposition a uap hram hram loh chuan ruling lam an ‘in luling’ lutuk ang tih a hlauhawm ve leh tho bawk a. Democracy kal­phungah Opposition ka ber hup beh a nih miau chuan, mipuite hriatna beng hi nasa taka hnawh pin a ni tel ve thei nghal tlat bawk si. 

Pu Duhoma ban chhehvel leh By Election lo awm tur boruak hi chu a la ngaihnawm chho dawn chauh a nih hmel a; engpawh ni se, kan ram hma­khua pakhat chu Serchhip bial mipui kutah kan innghat ṭhup a ni ta ber e.