Social media hman thiam i zir ang u

Smartphone a lo chhuak a, internet khawvel chu kan kutah kan hum ta reng mai. Social media platform hrang hrang smartphone-ah hian an rawn bilh tel a, mihring smart pangngai chuan an hman thiam nghal mai laiin smart lem lo rual bawkin social media platform - WhatsApp, Facebook, Instagram, etc. te hi an hmang thiam lo a, hengho hi mihring hman leh awm âwl hlei hlei an ni mai si. An awm âwl luat avangin an duh loh deuh deuh thil an dam chhunga ser reh thei tawh lo pawi chu anmahni ngeiin an khawih ta ṭhin a ni. Ṭhenkhatin saruak thlalak leh mipat hmeichhiatna hmang laite an live a, ṭhenkhatin an saruak thlalakte an zuar thul. Ṭhenkhat thung chuan mahni engmah ni ûk si loa political party hruaitu hrang hrang mimal nun zeldin thu bâwl nen chawm kawpin nileng zankhuain kan râkpui a ni.

Ṭhenkhat thung chuan mi dang nun tihrâlkhelh tumin ṭawng dang English, Hindi, etc a thu maksak leh insawiṭhaihna lam thil ziak apiang a dik leh dik lo pawh ngaihtuah hauh loin, phelh leh phuai deuh phengphungin Mizo ṭawngin an letling a. Kristian sakhua pawisawina lam thu a nih ngat phei chuan mi thiam leh degree nei ṭha pui puite hi a khâr chhâwng (forward) taima an ni nghe nghe. Hetiang thilte hi rilru zim tak kan put avang leh India ramah hian enhran bik nia kan inzirtir tlat rah a ni. India ram sorkar hotute rilru put hmang nia kan suangtuah chhe lutuk ang hian a tak takin thla hnih khat lek pawh kan chungah hian han awm ngat se, nuam kan ti nâ maw chu?

Politics lam sawihona group hrang hrang an awm a, a lûn chur chur hle mai. Mahse, heng group tilûntute zingah hian Mizoram nghahfâk mi thiam leh hriatna nei ṭha, future politician han tih tur ang hi pakhat tê mah an awm lo ti ila kan ti sual thui lutuk lo ang. Social media-a political party ṭan lam neia mahni party ni lo leh mahni party hruaitu ni lo nileng zankhuaa ṭawngkam hriam leh chhe tak tak hmang bei kual rengte hi an awmna political party-ah pawh nihna fumfê nei lo leh nihna pek tlak lem loh, an ṭan party an sorkar pawha party office vela tirhkah leh vawksa kg. hnih/khat vela fuihpawrh theih level hi an ni reng lo ang tih tu nge sawi thei?

Chuvangin, Mizoram mipui nawlpui tana thil ṭangkai leh sâwtpui tur thil sawi tur social media-ah kan hria a nih loh chuan ngawih i chuh teh ang u. Prime Minister ropui leh rorum Indira Gandhi khan, 'ṭawng tlem la, thawk tam rawh' (work more talk less) tih kha India ram politician-te leh mipui hnena a thuchah nung reng tur a ni.

Social media platform a awm hnu hian nileng zankhuaa râk reng mai kan tam ta hle a, rilru fim leh ṭawngkam ṭhain a lo daih seng bik lo a, mi dang thinlung kan hliam pheng phung a nih hi.

Nang erawh chu ṭawng tlem la, thawk tam rawh.

- Huna Kawlvawm