LALMANGA NU HLAWH RAWIH NI (June 21 - Equator hmar lam ni rei ber ni)

Kan chenna leilung hian Orbit-ah kal zelin ni a hel a, a helna kawng Orbit chhim tawp ber chu June 21 hian a thleng ṭhin a. Chu chu Equator hmar lam Tropic of Cancer zone-ah ni zungin a chhun hun a ni; he mi ni hi Equator hmar lam tan ni rei ber ni a ni a, Summer Solstice an ti. Mizo pipute chuan, 'Lalmanga nu hlawh rawih ni' kan ti.

Kan pipute Rûn leh Ṭiau kara an awm lai, an thlangtlak hma AD 1500 velah khan a chi bing te tea an awm lai chuan Chhakchhuah ho chu Seipui khurah an awm a, Ngente ho chu Chawnghawih leh Saihmunah an awm a, an khawpui zawk chu Chawnghawih a ni. Chawngthu ho chu Sanzawl leh Bochung ho Pangzawlah an awm. Ralte ho chu Suaipui leh Saihmunah an awm.

Ngente ho lal chu Chawngchawna a ni, a fapa chu Chhunruma a ni. Chhunruma fapa upa zawk chu ‘Lalmanga’ a ni a, a fapa naupang zawk chu Ngaiha a ni. Lalnu (Lalmanga nu) chu Ngaiha nu hian a lan a ni mai thei. Hmanlai lalte chuan nupui pakhat mai nei lovin, pahnih pawh an nei ṭhin.

Heng hun lai hian indo an ching tawh hle a, lal ni tur chuan huaisen leh salrual nih a ṭul. Lal hlawh atan tha pekte an lo ching ṭhin a, a chian zawk nan hei hi han sawi hmasa ila. Tlangkhuaa Hnamte ho lal Chhanpiala a thih hnu khan Seipuikhura Chhakchhuak ho lalah an va sawm a, anni chuan Tlangkhuaah lal ṭhut an peih lo a, Paruala te sawm turin an lo ràwn a. Zahmuaka te chhung (Paruala te) an va sawm chuan, an lal hlawh atan sa an kah emaw, an awh emaw apiangin a pang (a nâk) kutphah beng an pe ziah ang tiin an inrem a ni.

Zahmuaka te chhung (a fate Zadeng, Palian, Thangluah, Thangur, Rivung, Rikhum) chu Tlangkhuaa Hnamte lal an va nih chuan kulh an veng ṭhin a. Zahmuaka te chhungin kulh an ven zan chuan ral an hnai ngai lo va, chuvangin, anni chu an lo lama thawk hman lovin kulh vengtu berah an ṭang ta a. An khuate chuan an lo an thlawhsak ta ṭhin a. Chutichuan, a lo rei zel a, an lal hlawh atan tha an pe zel a. Sa nâk an pek pawh lal sadar pek a lo ni chho ta a, lal hlawha tha pek pawh a char saa pek a lo ni ta a, lal buh chhûn (fathang) a lo chhuak chho ta zel a ni.

A chunga thu hian lal hlawha tha pek hi a lo awm ngei tih a tichiang. Kum 1954 vel khan kohhran tam takin petromax an la chhi lo va, Laṭin Effar (Made in England) kan chhi hlawm. Tedim-ah khawnvartui ṭin 1 (BOC) hi Rs 27 vel man a ni. Khawkhat nei nung deuhin an han lei a, kohhranin tha 40 velin kan hlawh ṭhin. Chutianga hlawh hlama tha rawih ni chu ‘hlawh rawih ni’ tih a ni reng ṭhin a ni. Hlawh hlama tha rawih ni hi ‘lâwm rawih ni’ tih hmang an lo awm tak hi chu tun hnai mai a ni. Tun hma deuh khan pawisa a la tam loh avangin thil tam tak hi tha hlawha hlawh chhuah a ni ṭhin.

Chawnghawih khuaa Ngente lalnu (Lalmanga nu) chuan an lal hlawh tha a rawih ni hi ni chhinchhiahna Dawhkilh tualah a phun a. Chu dawhkilhin a thla hlim bial a neih loh ni chu a chhinchhiah a, chumi ni tak chu ni rei ni-ah a ngai ta a. Chu mi ni tak chu tun thleng hian ‘Lalmanga nu hlawh rawih ni’ tih a lo ni zel a ni. Hei hian kan pipute hun aṭang khan thil an lo chîk dan leh an finzia a tilang chiang hle. Chuvangin, Chawnghawih khaw chhimchhaka mel 1 vela hla ram zâwl chu ‘Lalmanga nu lo zawl’ tih a lo ni reng a. Tin, ‘Lalmanga nu hlawh rawih ni’ tih hi ṭhenkhatin 'lawm rawih ni’ sawi an tum ṭalh ṭhin. History bu hlui ber berahte chuan ‘Lalmanga nu hlawh rawih ni’ tih a lo ni deuh zel.

Vawi khat chu Chawnghawih khuaa Ngente ho rammu hlawhchham haw lam chuan Limkawnah Thangchunga Hualngo an hmu a, an man ta mai a. Ani chuan râl ka ni lo min khawih suh u a ti a, mahse, an that ta tho va. Chumi avang chuan Seipui khua Hualngo ho chuan Ngente ho chu an rûn ta a ni. A ṭhen chu Hualngo zingah an awm zui a, a ṭhen chu Zongte leh Selawna Zadeng leh Thangluah an bel a. A nawlpui chuan Chawnghawih chhuahsanin Vapar khaw rala Ṭiau chhak Ngente hmunah an chhuak a. He hmunah hian hla phuah thiam Pi Hmuaki, a nung chunga phûm an tih thlan a awm. Chumi hnuah Darkhaiah, Bapuiah an phei a, Manipur-ah, Kachar phaiah, Haflong lamah an chhuak ta hlawm a ni.

Chawnghawih Ngente khuaah hian vawiin thlenga thil hriat reng tlak a awm nual a, chungte chu:

• Lalmanga nau Ngaiha Tuikhur

• Lung au (Lungpui lianpui keh, huai neia ngaih a awm)

• Lungphun tam tak, milem tukhum lama sam zial leh kut ding lama se chhun fei keng. Kût laia lam ni awm tak invuan or inkaihkuah kual

• Lalmanga nu lo zawl (Lalmanga nu hlawh rawihna lo zawl)

Tunlai hian ṭhangthar, hmasang thu leh hla hre chiang hlei lo ṭhenkhat hian ‘Lalmanga nu lawm rawih ni’ tih tum tlata Whatsapp lama post ta vak vak kan la awm cheu ṭhin. Khang hun lai khan inhlawhna a awm dawn em mi, te an ti tak deuh deuh a. Mizo pipute khan pawisa pawh an la nei lo, mahse, thil inleina tam tak chu thil inthleng kha a ni. Kum 1940 aṭanga kum 1950 vel thleng khan, phurh hlân Fehem, Emping, Empai, Paikawng, Laduang, puanthân (thawmhnaw) leh a ṭhuina kha tha peka hlawh chhuah a ni ṭhin. Kum 1954 vel khan kohhran hian khawnvartui BOC ṭin khat kha tha 40 velin kan hlawh ṭhin. Pumkai tha pek pawh ni thaa pek kum a tam mai. Chutianga thaa thil hlawh chhuah rawih ni chu hlawh rawih ni emaw, tha rawih ni emaw an ti ṭhin.

Lâwm rawih ni erawh chu ṭhian zaho pali emaw, aia tam pawh an inlâwm a, lo hran hranah an infeh chhawk a. Ṭhiante loah an va feh a, an va fehnate tan chuan an 'lawm rawih ni' a ni ta ṭhin a, chu chu a ruaitute tan chuan lawm rawih ni chu a ni. Lalmanga nuin a lal hlawha a khuate tha a rawih hi chu hlawh rawih ni emaw, lal hlawh rawih ni a ni. Ṭhian za ho inlâwm rawih ni nen chuan a dang daih tih hriat hran a ṭha hle.

Kum khata Equator hmar lama ni rei ber ni June 21 chu calender kan lo neih hnuah chuan Mizo chuan 'Lalmanga nu hlawh rawih ni' kan lo ti ta ṭhin a. Kan history-a ziak hengahte hian kan hmu thei:

* Zofate chanchin HLCA bu phek 32-na 1st Edition 1995

* Mizo chanchin by Rev. Liangkhaia phek 31-na 5th Edition 2022

* Mizo History by Hrangṭhiaua phek 330

* Pu Buanga Dictionary phek 283

* James Dokuma Dictionary phek 187

- C Lalaudinga