Board chairman-te lawmman

Ni 6.6.2024 (Ningani)-a Pu Lalduhoma kaihhruai sorkara Council of Minister ṭhukhawm chuan ZIDCO Ltd., MIFCO Ltd., ZOHANDCO Ltd., MAMCO Ltd. leh MKVI Board chairman-te lawmman (hononarium) a tipung a. Heng board chairman-te status hononarium and entitlement ennawn rawtna agenda Council of Minister-in a pawm ang chuan, thla tina an lawmman (hononarium) Rs 8,000 ni ṭhin chu Rs 40,000-in an pun a ni.

Ngun taka ngaihtuah a, rilru lai tak pu chunga chhûtpui chuan, heng chairman parukte thla khat lawmman Rs 8,000 ni ṭhin Rs 40,000-a hlan chhoh hi a âwm hle a ni. Politics-a inbeih nana kaih luh chi pawh a ni lem lo, mi rilru tluang pangngaite chuan thîk chu sawi loh, âwm an tihpui a ni.

Tunlai hian hmun ṭhenkhatah leh khawi hmunah emawte chuan he thil hian khel a hlawh viau ni awm tak a ni a. Sorkar liam taa SEDP board phuah chawp zet mai board 14-te nena khaikhin phei chuan, tuna board chairman-te lawmman tihpun hi mipui lam pawh hian âwm an tihpui niin a lang.

Sorkar liam taa SEDP board 14-te enkawlna tura sorkarin kum 2022-23 atana pawisa a hman ral ringawt kha cheng nuaih 303.93 a ni. SEDP board pakhat zel khan LDC pahnih leh IV grade pahnih ṭheuh a keng tel bawk. LDC-te khan thla khatah Rs 16,920 ve ve leh IV grade-te'n Rs 11,990 ve ve an hlawh. SEDP board tinte hnenah khan lirthei hire-na man atan thla khatah Rs 70,000 leh office expense atan kum khatah Rs 5,00,000 pek a ni bawk.

SEDP board 14-ah khan MLA ni mekin an enkawl board 10-te enkawl nan kum 2022-23 chhung ringawt khan Rs 2,03,38,400 hman a ni bawk. Tichuan, MLA ni lote SEDP board palite tan Rs 1,00,55,360 pek a ni. SEDP board 14-te inenkawl nan hian kum 2022-23 chhûng ringawt khan MNF sorkar khan Rs 3,03,93,760 a pe a nih kha.

Khatiang zawng zawng han chhût phei chuan, a bik takin MNF unaute tan chuan tuna Mizoram sorkarin ZIDCO, MIFCO, ZOHANDCO, MAMCO leh MKVI Board chairman-te lawmman ennawnsak a, an thla khat lawmman a tipung hi han sawisel viau chi niin a lang lo.

Kum 2022 July ni 25 thleng khan MNF sorkar khan mau/raw ṭiak cheng nuaih 450.14 man a lei hem mai. A ṭum khatnaah ṭiak 84,000 supply niin, Rs 67,20,000 man a ni a, ṭum hnihnaah Rs 86,03,000 man ṭiak 1,22,900 supply niin, ṭum thumnaah Rs 2,96,91,750 man ṭiak 3,87,000 supply leh a ni. Khang mau/raw ṭiak zozaite kha tunah eng tak ang maw le.

SEDP board 14-te tana pawisa luang ral zozaite leh mau/raw ṭiak leinaa pawisa luang ral zawng zawngte ngaihtuahin, tuna ZIDCO, MIFCO, ZOHANDCO, MAMCO, MKVI board Chairman-te lawmman Rs 8,000 aṭanga Rs 40,000-a tihsan hi thil mak a ni lo va, an hnathawh nen pawh a inhmehin, an phû hle bawk a ni. Chuvangin, he thu, board chairman-te thla khat lawmman tihpun hi sawi pûn viau leh sawisela khel viau tur a ni lem lo e.

- MC Lalthianghlima