INTRANSITIVE VERB

Verb chi hrang hrang zinga hlâwm lian tak pakhat intransitive verb hi heti hian i han sawi fiah dawn teh ang:

A hmasain transitive verb kan tih chuan a tuartu/a lo dawngtu (object) tel lova kim thei lo hi a ni a; intransitive verb erawh object ngai lova mal din thei hi a ni.

Intransitive verb hi engtia ṭhen leh sawi fiah tur nge? Intransitive verb tia kan sawi chhan ber chu a tuartu awm lova thil tih emaw, che emaw kha a ni. Kan taksa thihráwl, thâ, hriatna (sense organ) leh kan taksaa thil paih chhuahna (excretory system) bâkah khuarel thil vânga chê/thil tih sawina a ni ber.

Entirna: nui, ṭap, lungngai, lâwm, zuang, vir, kal, tla, hnâr tum (snort), e (daikal) etc.

•    Lala a ṭap hawm hawm mai.

•    Sângi lâwm chu a zuang tawr tawr.

•    Kan lei hi darkar 24 chhungin a vir chhuak.

•    Lei hipna avangin chung lama thil awm hi lei lamah a lo tla ṭhin.

Intransitive verb ni si, Mizo ṭawnga thumal pakhat anga kan neih ve loh a awm nual bawk. Entirna: lu thing, bân vai, ke khai, lei chhuah (loll), hnâr tum (snort),

Lei chhuah: Mizo ṭawng thumalah sawina kan nei lo; amaherawhchu, kan tihrâwl, thâ leh sense organ hmanga kan kâa lo chhuak mai a ni a, intransitive verb a ni. Tun hnaiah ṭawng lerh angin ‘blêh’ kan ti fo. Lei chhuah sawi nân ‘blêh’ tih hi tun hma aṭanga kan lo neih sa chu ni se intransitive verb-ah pawh thumal a ni ang. 

Entirna: Sangi chuan lei a chhuah hlui mai.

A sentence en chuan transitive verb ni awm tak a ni. Lei kan chhuah hian eng nge object? Lei maw? Ni lo, lei hi a tuartu a ni lo; thil titu, kan tihrawl, nervous system leh thahrui hmanga chê a, kan kaa lo chhuak mai a ni. Lei chhuah aiah thumal pakhat 'blêh' kan lo hmang si lo va, kan buai ta a ni. Kan thu chheh hian transitive verb leh intransitive verb a ṭhen lo; kan thil tih zâwk kha transitive verb leh intransitive verb-ah ṭhen a ni zâwk e.

Lu thing: Mizo ṭawng thumalah lu thing sawina kan nei lo; amaherawhchu, kan tihrâwl, thâ leh sense organ hmanga thing kan nih chuan intransitive verb tho a ni.

Bân vai - Bân ka vaikan tih hian ‘vai’ hi ama tihráwl, hriatna leh thâ hmanga vai a nih avangin intransitive verb a ni. Mahse, kan bân vei lam kha che thei lovin zawi ta vek se, ding lama chelhin, vei lam chu kan vai a, heta ‘vai’ hi transitive verb a ni thung.

hnâr tum (snort): Mizo ṭawng thumalah hnâr tum sawina thumal kan nei lo; amaherawhchu, kan tihrâwl, thâ leh sense organ hmanga tum ri mai kan nih avangin intransitive verb tho a ni

Tichuan, sentence-ah heng—thumal pakhat anga kan neih ve loh hi kan hman dâwn chuan kâra pronoun dahin kan hmang ṭhin.

•    Lala chuan a lei a chhuah zoh zoh zêl.

•    Sangi chuan a lu a thing leh mût mût ṭhin.

•    Mi zingah hnâr i tum leh dût dût ṭhin.

•    Tlâng chhip aṭangin bân ka rawn vai ang.

Hetia kan sawi hian transitive verb a ni ta tihna a ni lo. Transitive verb hi kan thu chheh avanga transitive verb ni ta ni lovin, a chunga kan sawi tâk ang khian kan thil tih chêt dân azir a ni zâwk.

Eng nge i thin?

=> E le, ka lu maw le.

Hetia kan sawi chuan kan lû kha ama tihrâwl, thâ leh sense organ hmanga chê ni tawh lovin, kan kut hmangin kan thing tihna a kâwk thei a, ‘thing’ khi transitive verb niin, ‘lu’ hi object a ni ang.

Mi bâwng thlun ka chhuah ru.

Bâwng ‘chhuak/chhuah’ hi amaha chhuak ni lovin ka chhuah a ni a, heta ‘chhuah’ hi transitive verb liau liau a ni. ‘Lei chhuah’ hi thumal pakhat ni se emaw, ‘blêh’ tih hi lei chhuah sawi nana lo hman ṭhan tawh chu ni se, kan ṭawngah inhnialna a awm lo tur a. ‘E’ sawi mawi nâna ‘daikal/inthiar’ tih thumal (intransitive verb) kan nei ang hian ziah zawmin emaw kan lo hmang tawh si lo.

Kan thil tih sawina thumal kan neih leh neih loh avanga transitive verb leh intransitive verb hi ṭhen a ni lo. A example leh thu chheh lamah kan buai a, a ṭobul lam kan ngaihtuah thleng ṭhin lo.

Hnam mawl leh hnam hnufual chuan an ṭawngah thumal an nei tlem a, hnam changkang zawk bakah tun hmaa ṭawng—Hebrai, Grik, Latin, etc.) chuan thumal an ngah.

Kan ṭawngah pawh hian intransitive verb ni si, thumal anga neih loh kan nei nual:

mit khap, dár chhin, ke chhek, mit khap, hnâr tum, lei chhuah, bawp khawkherh, ke phût, bân vai, bawp khâi, kut bêng...heng hi Sap ṭawngah chuan a awm nual a, Hebrai ṭawngah chuan a kim viauin a rinawm. Bushman-ho ṭawngah chuan thumal alawi an neih pawh a rinawm loh.

Lala a dâk vah mai. Heta ‘dâk’ hi intransitive verb a ni ngei mai; amaherawhchu, a thil tih tlukpui tho “ring tun” hi ni ta se, ‘ring’ hi object, ‘tun’ hi transitive verb tihna a ni chuang lo. Kan hriatna, thahrui, leh thihrâwl chakna hmangin kan tun mai a ni. ‘Ring’ hi a tuartu a ni lo.

Kan thil tih sawina thumal kan neih leh neih loh avanga transitive verb leh intransitive verb hi ṭhen a ni lo. A example leh thu chheh lamah kan buai a, a ṭobul lam kan ngaihtuah thleng ṭhin lo a ni e.