RAM LEH HNAM HUMHALH

Mizote hi ram leh hnam humhalh duh mi tak niin hun rei tawh tak aṭang khan YMA a pawhin kum puan thupui atan te a lo hmang tawh ṭhin. Ram leh hnam humhalh hi kan sawi fo tawh. Kan ram leh hnam a him em tih erawh zawhna chhan har tak a ni ta awm e. 

A him lo a nih chuan tu nge mawh phur ang? Kan in puh kual mai mai te hian a lang tlat. 

Kan mi thiamten an sawi ṭhin hi ngai thla liam mai lovin zawmtu i ni zel ang u. Nitin hian thil pawimawh tak tak tiin hun kan hmang ṭhin a, chung te chu ram leh hnam hum­halhna hmanraw pawimawh tak a ni awm e. Amaherawh chu a zung kan la kar pha lo deuhin a ṭhen a zar thlakin a ṭhenin hlawiin ṭangkai hle mahse a bul kih emaw a nih loh chuan kan in thian seng dawnin a lang lo. 

Hmasawnna daltu sualna, hleprukna, zawmthawtna leh ṭha nia kan hriat anga min awm tir thei lotu hi theih ang anga a bul aṭanga kan zawn chhuah a ngai ta e.

Thuthlung hluia Israel hnam humhalh duhtu dang lam ngai lova kha tuna kan rin kan Pathian hi a ni. Chuvang chuan ngaih­dan mumal tak neih hi a va ṭul tak em. A var chu a var kan tih ngam a, a dum chu a dum kan tih ngam a hun ta. Mi ṭhahnem ngaiten ram leh hnam humhalh kawnga hma an lo lak mek laiin hnam dang nupui leh pasal lo neih te hi thil zah thlak a va ni em.  

Ram leh hnam humhalh chungchang ah hian sawrkar kan mawh puh a ni thei, eng emaw chen chu mawhphurhna lian tak an nei e. Chumi ai chuan mahni hi kan pawimawh zawk. 

He kan ram leh kan hnam humhalh chungchang hi kan tlawmngai pawl hruaitute kutah dah mai lovin kan theih tawkin kan awm hmun ṭheuhah ṭan i la ang u. Kan ram leh hnam rawngbawlna pawi­mawh tak hi feh chhuak thei lote pawhin kan awm hmun ṭheuhah ṭan la zel ang u. 

Hla phuahtu chuan kan vanglai hun leh ni zawng te kan ram tan a hlan zel in fam dairial pawh chang ila, kan sakruang Mizoram tan, a ti. Kan ram leh hnam kan humhalhna kawngah mawhphurna lian tak kan nei ṭheuh a, kan ram leh hnamin hmasawnna ropui leh chhinchhiah tlak a neih zel theih nan Pathian chakna hmangin kan hmelma hneh zel turin ṭan i la thar zel ang u.