Congress Senior Vice President thusawi kha
Mizorama Congress Vice President Pu Lalnunmawia Chuaungo-in June ni 14, 2024-a Congress Bhavan-a inkhawma thu a sawiah, hman ni lawka MP inthlana Congress candidate a tlin loh avangin Mizo mipui an inngaihtuah chian a ngaih thu a sawi tih Vanglaini chanchinbuah ka lo hmu a. Ka rilru te te chuan mipui aiin Congress party zawk hi an inngaihtuah chian an ngai fe zawk, ka lo ti ve thung.
Pu Lalnunmawia Chuaungo-in Congress party chu Mizoramah remna leh muanna a awm theihna tura thawh hlawk ber a nih thu a sawi kha chu eng emaw chenah chuan a dik thei ve thoin ka ring a. A thawh hlawk ber an nih leh nih loh chu ka hre lo a, ngaihdan a inang lo thei ang.
Mizorama MP (Lok Sabha) inthlanpuiah Congress candidate thlan tlin a nih loh avanga Mizo mipui an inngaihtuah chian a ngaih thu a sawi erawh a zak lo ka ti. Mipuite hian kawng hrang hrangah (inthlan chungcang kher lovah pawh) inenfiahna tur kan nei ngei ang a, mahse, ram roreltu thlan chungchangah kher kher chuan mipui aiin Congress party-te hian inngaihtuah chianna tur leh inenfiahna tur a let tam takin an nei tam zawk.
Congress party hi India ram leh Mizorama ro lo rel rei tawh ber an ni a, ram hmasawnna leh hmasawn lohna chungchangah pawh an kutah a innghah lian ber a tih theih. Mizoram tan thil ṭha tam tak an lo tih tawh ngei ang a. Chutih rualin, thil ṭha lo tak tak, ram mipuiin an duh hauh loh thilte pawh an lo ti nual tawh bawk ang. Chumi avang chuan an chak vanglai tak nia ngaih lai pawhin nasa takin mipuiin an paih thla tawh ṭhin a, tunah pawh an hnawl mek chu a nih hi. An lo chêt tawh dante chu mipui hian an hre ve kar a, an chhût ve a, Mizoram mipui hian an la duh lo hle rih a ni tih a chiang.
Mipuiin ngaihtuahna an seng ve a, an duh ber an thlang a ni mai a; mipui dem tur an awm lo. Mipuite inngaihtuah chiang tura han tih ngawt mai hi chu, Congress Senior Vice President hian mipui a ngai mâwl mah mahin ka hria. Anmahni, an party hi lo inngaihtuah chiangin, lo inenfiah zawk mawlh teh se.
Pu Lalnunmawia Chuaungo hi mithiam, mi tam takin an ngaihsan a ni a, Mizo mipuiin a thlavang kan lo hauhsak rawn tawh a ni bawk a. Party tui nû but angah hi chuan inchiah ve kher lo se. Party tui nûa inchiaha inbual kher lo pawhin a awmna party hi ṭha takin a hruai thei thovin a rinawm.
- Lalchhandama