SANGHA BOMB THU

Huai taka Sangha Bomb Fee Rs.10000 an chawi thu Post a nih takah chuan a nghawng tur lam thlirpui teh ang.

THU BUL -

Phaizau khuaa Joint NGO chuan Tut lui, Ramri lui leh Saitlan inkar chu humhalh niin vawi tam tak Jeletine hmanga Bomb leh Dynamo hmanga Sangha humhalhte man an phal loh thu an chhuah tawh laiin 21st November 2020 khan Bialtu MLA, Er.H.Lalzirliana hoin Mamit Centre Block President leh hruaitute nen an lo Bomb dur mai a ni awm a, ṭhianho, Pawl leh chhungkuaa Bomb ni lovin MNF Party anga Bomb an nih hmel a, duh tawkin Politics huanga hnuhluh theihah ka ngai ngawt a.

THLAVANG HAUHNA LEH SAWIMAWINA -

A hnu maiah khan Phaizau khaw pa pakhatin kutziakin lehkha a chhuah a, Ngawidawha phalna china an man a nih thu a sawi a, hetih chhung hian a Bomb-tute hian ngaichang ang hrimin an ngawi reng a, Pu Chuauthantluanga hian a hnu lawkah ngaihdam a dil thu leh Bomb-tute hian Phaizau VC-ah an Bomb ngei a ni tih lantir nan VC phut angin Rs.10000 chu Phaizau MNF hruaitute kaltlangin pek an nih thu Social Media-ah a lo thang a, hei hian lui humhalh mekah dan lo angin Sangha an Bomb tih a tichiang ta a ni.

DIKNA ṬAN HLIM -

MLA Er. H.Lalzirliana hi dikna tundin duhtu, Dân ngaina leh dan anga hmalakna turah chuan mi chawthleng pawh benper pawiti lo MLA 12 zinga pakhat a ni a, an hek a, an benpersak zo hlim hlawt a ni. Heti taka Dân leh dikna ngaimawhtu MLA hian eng kawng nge zawh zel a tum hriat a chak awm hle. Amah anga Dân leh dikna ngaina MLA 11 te hian dik lo taka thil titu MLA hi an hêk ve ngam ang em? Dikna leh Dân an ṭan tlatna hi thleibik nei leh tu emaw tana firfiakna hmanrua lek fang a ni zawk thei bawk.

DEMNA LEH BOMB TU HREM THEIHNA -

Demtu langsar zingah CYMA leh nungcha humhalh pawl thikthu chhe tak ASEP chuan "Tun hnuah thleng tawh lo se" an ti ṭawk a, tu emaw intun nunna tura tih leh tuikuk lehkhathiam lo tih ni se, Police Station-a an man lai thlalak thlengin kan hmu leh mahna!

BIOCONE leh Conser­vation Mizoram pawlte erawh chuan dan bawhchhetute hi dan anga an chungah hmalak ngei an phut ngam thung a ni. Phaizau Joint NGO tiamin pawl lian tak 5 laiin demna thu an chhuah a, chutih laiin an dema te ber chuan NGAWI an dawh a, an ngawi chiah chiah mek a ni.

MNF MLA leh Block hruaitute hi hrem theihna dan a tam khawp mai.

1. Mizoram Fisheries Act, Sec. 6 Sub-Section 2 : One to three months imprisonment + upto ₹ 5000 fine [Fisheries Deptt.]

2. Mizoram (Forest) Act, Sec. 24, Sub-Section 6 [inside RF]: upto 6 months imprisonment + upto ₹ 500 fine.

3. Indian Wildlife (Protection) Act  Section 5, Sub-Section 1(c)  [inside TR]:3yrs to 7yrs imprisonment + ₹ 10,000 -  ₹ 2lakhs fine. 

4. Indian Wildlife (Protection) Act [inside PA]: Section 51 , Sub-Section 1: 3yrs to 7yrs imprisonment + fine of not less than ₹ 10,000/-.

5. Biological Diversity Act [inside Community Protected Area]: As per NGT ruling. 

Hei bakah hian Illegal possesion of explosives  hmang­in a book theih bawk.

Pu H.Lalzirliana, MLA hi heng a chunga dan hmang hian hrem theih niin Kum 2 aia tlem lo convict  theih niin a lang.

Supreme Court of India-in dated 10 July 2013 Lily Thomas vs Union of India  case-a Judgement a siam ang chuan Member of Parliament (MP), Member of the Legislative Assembly (MLA) or Member of a Legislative Council (MLC) te chu Court-in kum 2 aia tlem lo a convict chuan MLA/MP/MLC an nihna aṭangin Disqualified nghal tur tih a ni.

Hetih lai hian MLA atanga bân theihna hial pawikhawih hi nungcha hminghmerh puala Department kan neih chhun Sangha Department (Fisheries) chu vawiin thlengin an ngawi hmak a, Opposition Party lam aṭangin nawrna nasa hriat tur awm bawk hek lo. Tu emaw thil tih ni se hmingṭhat duh, Department chan hneh nih duh vang pawhin Jail run thim kan belhtir chiang khawp ang.

MORAL RESPONSIBILITIES -

Dikna leh Dân ṭan tlat avangin British Prime Minister David Cameron chuan EU nena thawh dun a duh laiin mipui Vote-ah duh loh a ni si a, mi chak, mipui duh ngawih ngawih laiin "EU zawm duh lo hruaitu tharte kutah ka innghat e" tiin a Principle-ah a ding nghet a, a bansan a, a bungruate chu amah vekin a zâwn chhuak tak ṭawk ṭawk a!!

England ah vek hian Senior Minister, Dy Prime Minister ni mek bawk, Damian Green chu a Laptop ah Puitling Film hmuhchhuah a nih avangin ama thun, a en ngei tih pawh ni lovah mawh lain a bang ṭhak bawk a!! MP Michael Fallon chu News Reporter a biangah a lo chuk keuh avangin banna a thehluh phah bawk.

August 1956 khan mi 112 thihna Rêl Accident a thlen avangin khatih laia Railway Minister, Lal Bahadur Shastri khan banna a thehlut hmak a, 1987 khan Finance Minister VP Singh chuan Black Money a chhuinaah thil dik lo tam tak a hmuhchhuah chu PM, Rajiv Gandhi nen an thu a inhmuh loh avangin banna a thehlut a, Party aṭangin hnawhchhuah zui a ni. 

Ireland Secretary of State, Peter Mandelson chuan Hinduja Brothers te chu India-ah Bofors thubuai nei tih hrerenga Passport a lo pek avangin banna a thehluh phah  a, Henry Mac Leish, Scotland Minister chu sum hman thiam lo a puhna avangin mawha lain banna a thehlut bawk. Robert Cook, Leader of House of Common, UK Foreign Secretary lo ni tawh bawk chu Iraq run chungchanga a Principle avangin a bang hmiah bawk a, Bolivia President, Ginzalo Sanchez chu a Economic Policy mipuiin an dodal avangin a bang tawh bawk, sawi tur a va tam em!

KEINI AH -

Chelh hram hram, inham tân hram hram, insawithiam hram hram tumin kan hman hlel a, Law & Judicial lamin "Dan hriat loh hi chhuanlam a tling lo" tih thupuia an neih laiin Rs.10000 peka fihlim, reh hmak tur, pawikhawih tih pawh hriat loh leka MLA chhunzawm thei zel ram kan nih chuan a vanduai thlak hle ang!

Ram changkang zawk hruaitute banna tam tak hi sawi mam, thupha chawia reh mai thei tam tak a awm laiin an Principle-ah an dingnghet a, chelh hram aiin ban ngam kha hmingṭhatnaah an ngai zawk! Keini nen chuan kan inthlau hle a ni.

MLA HI -

Dân zah tak leh ngaina, dikna duh luat vanga mi chawbel benper thleng duh khawp hian dan lova a thiltih hi a inpawm a nih chuan mawhphurhna a lain bang ngam se la, a Bomb-pui hote nen lam hian dan anga hrem ngei ni rawh se. 

A nachang a hre lo fo a nih chuan amah tluka Dân ngaipawimawhtu MLA 11 dangte lakah khan kan thikthu a chhia a, anni tal khan dikna tundin nan hek ve se la kan hmin chhunzawm mai thei asin.

A ṭhena ruahsur tira a ṭhena nisattir tawk leka DÂN ṭan ngam kan nih chuan kan dan ngainatna leh ṭanna chu êk pawh tluk lo a ni ngei ang.

TLIPNA -

Enliam leh hriatthiam mai theiha ngaihah Dân dah chungnunna changchawia hekna, Press Conference, bantir hialna pawh kan hreh lo a nih chuan pawl 5 laiin demna an chhuah hial, lui humhalha sangha Bomb luitute chungah hian Zoram hi Rs.10000-ah kan lungawi mai dawn nge, Rorelna dik phut let ve ngam khawpin MLA 12 te hian mipui min hmin tawh tih chu kan hre zel ang chu!