KALPHUNG THAR – MIPUI SORKAR A ṭha tur a ni
Ni e, an ṭan ṭha viau reng bawk alawm maw le. MLA tinin car thar a thlawna an dawn ṭhin an titawp ngawt mai phal pawh hi ṭhat entirna chhuanawm a ni.
Ni za chhunga tih tur Chief Minister-in nikum December thla tira a sawi kha erawh a tam zozai a, ka lo huphurhpui ru deuh a. Hlauhthawn ruk ang ta deuh chuan ka hria.
Ṭhian pakhat ṭawngkam khat, "Fate hmangaih leh ram hmangaih hi a sim theih loh." A engakhaw ti ve thei si lo hi ka hah ru ve reng mai. Prime Minister Indira Gandhi emergency laia 'Thawk tam zawk la, ṭawng tlem zawk rawh' tih ang deuh khan, sawi tam ai chuan thawh tam zawk a ṭha.
Election a zo tawh a, ZPM sorkar a ding tawh a. Thlan tlin hruaitute ho hi an ṭawng tam mah mah em aw tia Zoram thlirtu ṭhian pakhat chuan min tih khum. Hman deuh tawha ṭhian pakhatin Minister of ceremonies hi awm law law se a tih fiamthu ti takte kha tunlai thil awmzia hian min hriat chhuahtir thar. A làr khêl zia deuh em? Nge bengsika office leh in lam pawha inngaihtuah hah ai chuan a nuam lama hawi harh chak vâng? Nge sorkar laipui hotute tih hmuh awlsam luat vang aw?
Pu Duhoma ber pawh hian puitu fing , ṭha leh huaisen a va mamawh tehlul em. Tun term chauh pawh a la sei a, term leh pawh ama ho sorkar tluan se ka duhsak vei nen, lungphum tih vel, hawn tih vel vei chu a la awm tam deuh deuh dawn alawm. Lo nghet mup teh rih se, a pu min Pu Ch Chhunga ang mai khan!
Politik hi a lo mak lulai em mai a. Hman leh tun hi a danglam chak hle nâ a, dan ang zela rorelna kalpui (rule of law) a nih chuan zâmna tur a awm lo. Lang tlang (transparency) duh luat vanga minister hova bawr luai luai hi a ṭha ber fo lo. Secondhand kudama vanduaina run thlak thleng te,n matric zawhna lo hriat ruk thua jail-a ûm luh hial takte kha engtin nge ni ta zel tih lam zawkte hi he sorkar thar kan nghahhlelh em em vei leh tihfel tur chu a ni dawn lawm ni? A nih dan (level) tê têa hna chan pual neite tih zel (vil hnai ran chung siin) hi kan thawhhopui pawl pakhat thupuite pawh a nih kha.
- F Lalremsiama, Chaltlang