Silent Night, Holy Night

"Here we were laughing and chatting to men whom only a few hours before we were trying to kill" - John Fergusion 

Khua a thiangin vanah arsi an pe un a, sikpui rawng, silai leh zen tih loh chu tuar har em em a awm lo. Zaipawl leh rimawi inthum chhawk hriat tur a awm lo va, ngirtling hram takngial pawh. Chu zan boruak vawt leh uap churh karah chuan mahni chengrang chawia zalen hun tur ngaihtuah ngawt pawh thil harsa tak a ni a, ram tan eng tikah nge ka fam ang a, doral eng zat tak famtir ang maw tih chauh lo chuan rilru a luah a. 

Sipai hotu rawn ding chhuakin an unau sang tam nun chante tana hnehna sual chhuak ngei turin a naute a fuih liam liam lai chuan ral lehlam aṭanga eptu pawlin 'Silent night' aw inthum chhawk a, boruak vawh lutuk avanga aw khur ṭham ṭhama an sak chuan a rilru a hneh hle. 

Khawvel sual chhan­dam tura ran in-a lo piang Isua Krista pian cham chu tumahin chu trench khur rawng takah chuan an theihnghilh lo. Lehkha mawi inpe a, duhsakna thilpek leh ruai ropui ṭheh a, mahni hmangaih takte nen, hmangaih tur leh hmangaihtu baihvaia van ruai tan pawha hmangaihtu Isua Krista pian cham lo thleng chuan chu hmuna awmte chu a fan thar leh a ni. 

Eptu pawl zai ri chu chhawnin, indo lova awka inchhawnin lai leh lai takah an intawk a, hun kha leh chen lo insaiin lo intihlum tawh mah se chu zan thiang reh ruih karah chuan remna lal fa lo pian chhan remna changchawiin an thul mawnga mi an phawrh a, duhsak takin an inpe tawn a. Cigar leh cigarette infawh ṭawmin hringnun laimu hmangaihna an infah tawn a, zan thianghlim (holy night) zawng a ni ngei e. 

Darkar rei lote hnua hmelma inchan a, pawisak nei map lova inral sai leh tur an nihna dah ṭhain, savun ham puar siam chawp chu hlimna vawrtawp an thleng ta maw tih mai turin hlim takin an pet a. Zen sawh muk ngawt ai chuan a dawn a nuam zawk ngei ang. 

Hlauhna leh ralṭit awm hauh loin, hun rei lo te chhung pialral nawmchen an tem ni awm takin an hlim a ni. German Lieutenant Kurt Zehmisch chuan 'Heti ang hun duhawm leh ropui dangdai hi a awm leh tawh lo ang' a ti hial a ni. 

Sikpui hunpui khel lova mite nghahfak, in hmangaihna hun duhawm, dam chhunga hmelma inchan tur tan pawha in hmangaihna hun remchang Christ­mas hi a hluin remna hi a va rem em!