Mizo hmeichhiate leh rimawi
Tunlai khawvel hmasawnna leh changkan mek zelah hian rimawi lamah pawh hmasawnna hmuh tura awm zel hi a lawmawm tak zet a ni. Rimawi hian Mizo ṭhalaiteah nasa takin hma a sawntir niin a hriat a, a lawmawm tak zet a ni. Cable TV lama rimawi huang en ṭhinte chuan kan Mizo nula ṭhenkhatte'n rimawi band dinin, rimawi hmanrua chi hrang hrang hmanga Pathian fakna hla te, lengzem hlate leh hla lenglawng lam hlate an rem han hmuh hian a bikin kan Mizo hmeichhia (nula)-te hi rimawi lamah hma an lo sawn tawhzia leh an lo nêp lohzia a tilang chiang hle awm e.
Rimawi rem chungchangah hian Pathian biak inkhawmnaahte leh khawtlang huapa thil tih pawimawh neih ṭhinnaahte hian mipate mawhphurhnaah dah mai lovin, kan Mizo hmeichhiate pawhin rimawi rem chungchangah theihna sang tak an nei tih hre reng chungin rimawi hmang hian Pathian tan, kohhran tan, ram tan leh khawtlang tan theihtawpa ṭan la thar zel turin leh rimawi lama hmasawn zel turin kan chah ni se la.
Kohhran hrang hranga ṭhalai hruaitute pawhin mahni ṭhalai member hmeichhe zingah rimawi lama talent nei tak tak inphûm rute hai chhuah kawngah ṭan han la thar zel u la. Nu leh pate pawhin fanute zingah rimawi lama tui tak tak hmasawn duh si, mahse, hmalak dan tur hre si lo leh hmalak ngaihna hre lo harsatna nei an awm ngei ang a, chungte hnenah chuan an harsatnate hriatpuiin, a theih chen chena hma an lakpui zel a pawimawh tak zet a ni.
Mizo zingah rimawi hmanrua hmanga ni tina ei zawnga hnathawkte pawh an awm nual tawh niin a hriat a. Heng mite hian cable TV lamahte leh chanchinbu lamahte rimawi hmanraw hmanga kan Mizo hmeichhiate'n eizawnna hna ṭangkai taka an neih theihna tur lam hawi hi ziah tam a, sawi tam ni ṭhin bawk se la. Hei hian kan Mizo hmeichhia rimawi lama tui tak takte hian nasa takin rimawi lamah hmasawn nan leh ṭangkai taka an hman ngei i beisei tlat ang u.
Kohhran lam hruaitute leh khawtlang lam hruaitute pawhin kan hmeichhiate'n rimawi hmanrua hmang hian Pathian tan, kohhran tan, khawtlang tan leh ram tana taima tak a rawng an bawl ve zel theih nan insen huama nasa taka ṭan lakpui se. Kohhran lama thil tih tur pawimawh a awm a nih pawhin kan Mizo hmeichhiate'n rimawi lamah mawhphurhna pawimawh tak rimawi rem an chan ve theih nan chanvo pawimawh pek tam hi uar thar zel turin leh khawtlangah pawh programme pawimawh hman tur a awm changin rimawi lama mawhphurtu turte ruat chungchangah mipa tan chauh a chanvo siam sak bik lovin Mizo hmeichhiateah pawh rimawi rem lamah chanvo siamsak hi kan uar thar zel a pawimawh a ni.
A tawp berah chuan, kan Mizo hmeichhiate'n rimawi hmanrua chi hrang hrang hmanga hmasawnna leh changkanna an neih meknaah hian duhkhawp lohna lai leh sawiselna tur tam tak a awm ngei ang. Chungte chu sawisel mai lovin, tun aia nasa zawka kan hmeichhiate'n rimawi hmanga rawng an bawl zel theih nan rimawi lama thiamna sang tak tak neite'n nasa taka ṭan lakpui turin kan insawmin kan inchah a ni.
- George L Ralte, Vaivakawn