Written by
- JH Malsawmthanga
PUMKHATNA DIK TAK MNF-AH
Kan Bible chuan, mipa leh hmeichhia an inneih chuan 'pum khat' an ni tih a sawi.
Pum khat an nih ang takin an chhungkaw khawsak kawngah, an ṭangkaina hrang hrang, an finna leh thiamna zawng zawng hmangin an inpeizawn a, chhungkaw ngelnghet tak an din ṭhin.
Pum khat han tih hian, nupa chauh ni lo, Pawl leh Political Party pawh an in pum khat chuan an chakin hma an sawn a, hmelmaten an beihna leh sawi chhiatna lakah pawh nghet takin an awm thei ṭhin.
Chutianga pumkhatna nei ṭha chu MNF Party hi an ni. Kan hmuh angin Congress party chu an hruaitu hlun leh chak, Dr. H Thansanga, Pu Zalawma, Pu Rokamlova, Pu Liansuama, Pu Saikapṭhiana leh mi chak leh ṭha tam takin an ṭinsan tawh.
PC pawh an hruaitu chhuanvawr tam takin an chhuahsan tawh bawk. Chutiangin ZNP phei chu an Vice President eng zat chiahin nge bansan tawh le? Party ding thar ZPM, hmanni maia piang pawh an hruaitu ṭha tam tak ten an chhuahsan leh tawh bawk. Heng hi an pumkhatna a ṭhat loh vang leh, hruaitu ṭha leh chak an neih loh vang a ni tih alang.
MNF Party erawh chuan beihna nasa tak an tawkin, sawi chhiatna nasa tak an tawk ṭhin a, dawta sual tinreng a beihna an tawk chung pawhin an nghing chhin ve tlat lo.
Hruaitu hrang hrangte chuan an hma ṭheuh an sû kua a, a laimu-ah an in sawh nghet tlat a nih hi. Headquarter chauh pawh a ni lo, Sub-Headquarter te, Block leh Unit pawh hi an nghet tlat a ni.
Chhungkua a han inkhak leh inbauh lah an nei ngai hek lo.
Hei hi a chhan bulpui ber chu, an thurin 'Pathian leh kan ram tan' tih hi an vuan nghet a. Chu tih rualin an hruaitu ber Pu Laldenga leh Pu Zoramthanga lakah mipuiin rinna an nghat a, mipuiten an rin ang chiaha an hruaitute an rinawm leh an inpumkhatna ṭhat vang a ni.
'MNF' tihah hian Hnam thinlung, Mizo hnam hmangaihna a lang ṭhin a, harsatna eng pawh lo thleng se an nghing ngai lova, an in sawh nghet tial tial zawk ṭhin. Hei hi a chhan ber nia lang chu hruaitu ṭha, chak leh Pathian ṭih mi an neih vang a ni.
Pathian chakna an rin tlat vang a ni a, an President hian an Policy a hriat chian em vang a ni bawk. Chu chuan mipui a hîp a, Pathian pawhin mal a sawm niin alang.